我嘅靈魂困咗喺架巴士入面: 04

「你喺度做乜嘢？」

吓！佢唔係應該見唔到我嘅咩？點解會咁㗎？
當我仲諗緊呢啲問題嘅時候，個師傅又再打斷我嘅思考
「我係講緊你呀，唔好以為我見你唔到！」

「吓師傅你點解會見到我嘅？我死咗啦喎！」

「我梗係知你死咗啦，啱啱先喺報紙度見到單新聞，仲有你唔好以為我唔認得你啊Jason！」





「師傅你識我？」

「你真係唔記得咗我？我係David啊，你中學Geog呀sir啊！」

「哦！我記得啦，我仲記得你嗰次玩VR嚇到仆街添！你教完我哋form 4之後就唔做啦嘛，你之後去咗邊呀？」

「你班友仔淨係記得我啲黑歷史🤦🏻‍♂️，嗰陣時我冇教書之後就跟咗個師傅，學咗少少驅魔術，所以而家咪見到你囉！」

「咁我而家即係點呀？我係咪冇得投胎啊？」





「嗱！而家你呢個情況我都唔係好清楚，但肯定嘅係你嘅靈魂會一直跟住呢架車，直到呢架巴士到咗佢生命嘅盡頭，你先可以投胎。」

「即係我要跟到架車退役為止？仲有成年喎！」

「一年好快就過啫，同埋你知唔知而家架巴士同你嘅意識連為一體㗎？」

「即係依家我嘅意識可以操作到架巴士？」

「冇錯，咁咪啱晒你呢個巴膠囉，不過唔好亂咁玩架車啊，費事嚇親人同埋架車有咩損傷對你都冇好處㗎。」





「ok！」

IG: stitch_stitch_driver