我嘅靈魂困咗喺架巴士入面: 02

「究竟發生咩事呀？有冇人可以話我知啊，我究竟係咪死咗呀？」我不斷咁同出面嘅人大嗌，但係好似冇人聽到我講嘢咁。我又試過向出面嘅人揮手，但係都係冇人見到。我再望向嗰個瞓咗喺擔架床上面嘅少年
「究竟嗰個係咪我嚟㗎？我嘅靈魂係咪出咗竅啦？」一連串疑問喺我個腦入面彈出嚟。當我回過神來，救護車已經開走咗。咁我依家點算，又出唔到去，又冇人見到我。算啦，都係去後面坐陣先，好快我又唔小心瞓着咗啦...

「呯！」發生咩事呀，啱啱嗰啲咩聲嚟㗎？咦，原來已經天黑喇，我行到車頭，啲警車都已經走晒啦。淨係得返一架拖車喺前面，原來啱啱嗰啲聲係工程部幫架車上勾嘅聲，睇嚟要拖架車返廠啦。我跟住架巴士一齊返到九龍灣車廠，好快工程部嘅人就將架車泊咗喺近休息室嘅泊位。呢度附近都泊滿晒爛溶溶嘅巴士，睇嚟泊呢度嘅巴士都係待修巴士。搞掂晒啲嘢之後啲人好快就走晒，又得返我一個喺度。我啲電話銀包全部都唔喺度，咁唯有睇吓隔離休息室部電視啦！啲電視節目鬼死咁無聊，睇到我差啲又瞓着覺。突然，我嘅視線俾電視機最底嘅一行字吸引到 —「少年疏忽過馬路被巴士捲入車底不治」

過咗冇幾耐，電視就播新聞報道。第一單新聞就係呢單少年俾巴士撞死嘅新聞，我聚精會神咁望住個電視。好快，我就聽到新聞主播讀出「車禍死者為XX大學學生XXX Jason」，再望下入面幅相，涉事巴士就係JE1672。睇到呢度，我個腦又一片空白啦。我而家都不知所措，究竟爹哋媽咪佢哋同Alex而家點呢，我好擔心佢哋。同埋我唔係死咗嘅咩，點解我而家喺JE1672入面㗎？

IG: stitch_stitch_driver