我嘅靈魂困咗喺架巴士入面: 01

過咗一陣，刺眼嘅陽光將我叫醒咗。望多兩望，我竟然坐咗喺一㗎巴士上層嘅車尾。我望向出面，呢度都係慈雲山中總站，但係架車停咗喺116個車坑轉出去果條路。我跑到車頭，見到前面泊咗一架救護車同一架警車。抬頭一望，車箱內證明呢架巴士嘅身份嘅牌仔，白底紅字咁寫住 — 「JE1672」

點解我會喺JE1672上面㗎，我唔係同Alex追緊JH4035嘅咩？係喎！Alex呢？佢去咗邊呀？我落到樓下，見到啲救護員爬落車底度唔知做咩，又隱隱約約咁見到馬路上面有啲血跡。我心諗乜啱啱撞咗車咩？我諗住落車睇吓發生咩事啦，見咗開咗嘅中門，我諗都冇諗就即刻行過去。點知個頭竟然撞到啲嘢，但係度門開咗個喎，點解出唔到去嘅？我再試多次，都係出唔到，我行去前門再試，都係一行就撞到啲嘢，就好似有一塊無形嘅力場喺度。我點都突破唔到，跟住我又試埋司機位隔離嗰隻窗，結果都係一樣，成架車都好似包圍晒強化玻璃咁，將我困左喺架巴士入面。

我冇咁嘅心情同埋時間去諗點解我出唔到去，因為出面有另一樣吸引到我嘅嘢。救護員喺車底救咗一個成面血嘅少年，真係慘啦，咁後生就竟然被捲入車底，我睇佢都凶多吉少㗎啦。咪住先，點解佢個樣咁熟口面嘅，唔係喎，呢個我嚟㗎喎！我點解會俾人捲咗入車底㗎，究竟發生咩事呀，我係咪死咗呀？

IG: stitch_stitch_driver