結咗婚十幾年，好似已經唔太愛。《相愛十年》: 徘徊（二）
他摸一摸她的髮，去洗澡，再上床睡覺。
- - -
幾天後，阿朗替Hin作遺體化妝。
Hin跟阿朗同齡，都一樣年輕——假如人有七十歲命，他只過了一半都不夠。
阿朗感受到Hin的痛苦，他的面容並不舒展，有疤痕；雖然血跡已被清理，但難掩觸目驚心。
可能是因為，Hin是阿朗認識的人，所以感覺和平常不一樣；像在樓梯口看見自己的棄置家具，殘破、熟眼、無奈。他不明白，怎麼好端端的就躺在這裏呢？
生命無常，真的令人非常無力。
一邊掃粉，他想起和峰仔的對話：
「同阿Hin唔多聯絡，但都唔會生疏，就算幾耐冇見，有嘢揾佢幫佢都會義不容辭；明明同佢唔算熟，但聽嘉欣——啫係我嗰個大學同學講，佢真係幾好仔，都幾好人士。」
峰仔一口氣喝了幾啖酒，續道：
「傷心，唔係真係特別傷心，但都有啲婉惜。個天真係唔公平，啲好人就咁早死。都痴撚線，交通意外喎？屌。你話，嘉欣同佢個仔應該點面對？
咩理想、現實呀……冇咗條命，仲可以做到啲咩？精神長存？
如果係你，你死咗，或者阿嫂死咗，你哋會點？唔通留喺回憶裏面就好好啦？
都戇撚尻，咁容易就死咗，屌。」
「唔好飲得咁快啦，你就嚟醉。」
「最多咪同你一齊啪粒朱古力，有咩所謂。」
「不了，我已經有老婆㗎啦。」
「你知就好啦，好好珍惜啦，唔該你啦大爺。
嘉欣喊得幾慘……點放得低呀？好心你哋啲在生嘅人就醒醒定定啦，好好傾吓偈好難咩？」
「你好感慨喎。」
「係呀屌，因為我真係唔會忘記同嘉欣講講吓嘢，佢突然間話阿Hin走咗——你知唔知嗰吓我幾odd？之後我見住佢扮堅強但轉個頭喊到仆街，成個人係完全崩潰，屌，頂唔順，明明之前仲好哋哋，我仲同其他大同去過佢屋企食飯，講埋哂啲無聊嘢，都可以笑一餐嘅。
宜家呢？」
「嗯。」
「宜家個人都冇咗啦。」
「嗯……」阿朗不知怎回應。
「我好驚，萬一我女朋友有啲咩事，咁點算？」
「唔好諗咁多啦。」
「邊個知？人咁化學。」峰仔歎。
阿朗不語。
而他可以做的，就是專心化好Hin的遺體，還他不輸在世時的模樣。
完成後，他在殯儀的轉角走廊裏見到峰仔和一個眼睛紅紅的女人。
「嘉欣，呢個就係阿朗。」
峰仔開口介紹二人。
「辛苦哂你。」嘉欣伸手握一握阿朗。
「今日佢話要嚟揾吓阿Hin……所以我同佢嚟見吓你。」
峰仔解釋他們為何在這。
「嗯。放心，佢會好好哋嘅。」阿朗嘗試安慰。
感受到一點關心，嘉欣又哭起來：「好。
嗰一日朝早，我因為佢冇幫細路換片而嘈咗佢兩句，跟住佢出門口之後，同我講，之後唔會唔記得。
佢放咗工之後，同我講話喺樓下商場等啦，一齊買吓嘢。
之後……就冇之後了。」
「節哀順變。」
「嗰一日，只係一個好平常嘅日子，好平常嘅事。」
「嗯。」
「都醫學昌明啦，救番一個人，應該唔難㗎喎。但係，就係唔得。人定勝天？原來係，生死有命……點解偏偏係佢？偏偏係我老公？
我唔係接受唔到佢死，雖然真係……但……」
嘉欣已說不下去。
她不敢執拾家的任何與Hin相關的東西，就當他只是出了一次普通的街，上了一次普通的班，和平常一樣。
「我想佢番嚟……」
她已經過了最起初的衝擊階段，最初知道的時候，一滴眼淚都流不出，一切感官麻木，情緒停止，沒有和無法發難；但是，到現在，世界和自己都清晰知道，Hin已被白布封口，忽然就覺得，要用悲痛餞別。
不要什麼體面、冷靜、沉穩，她要失儀，她要表達切膚之痛，她要哭。
她要見他——每次，她這樣想的時候，又會後退，她還有和他的兒子，還要照顧他們的家人。
她有情緒性的生理不適，心因性，無法進食，常常作嘔。在熟悉街道隨便走走，偶然也有窒息的感覺，要不停深呼吸，用力睜眼和閉眼保持步伐。
可是她知道，一旦回家，又要人模狗樣地活着了。
阿朗點點頭，表示明白；峰仔遞上一直準備的紙巾。
阿朗記起，有一次，夜半醒來。
他沒有什麼知覺，可是，慢慢感受到身旁的被子漏了氣，也聽見思思一呼一吸地大聲喘息。
矇矓間，他問：「做咩醒咗嘅？」
「我夢見你死咗。」她的聲音因沒喝水而沙啞。
「夢啫，瞓番啦。」
「好真啊個夢……你唔知點解俾人斬死咗，堅持咗一陣，喺度同我講咩、咩要好好照顧自己同埋棉豬。」
「傻瓜，我冇事啊。」
「你仲叫我唔好太掛住你，要move on，揾第二個男人嚟照顧我……有冇搞錯呀！」
她悲傷。
「我都想你開開心心咁過。」他揉了揉眼。
「冇你點開心？」
「知啦知啦，我會小心啲㗎啦，好冇？」
「你仲同我講你收埋咗好多錢喺舊皮鞋鞋底，叫我攞番出嚟。」
她像突然想起了什麼，又笑了笑他。
「哎呀，俾你發現咗添！」
當然，他沒有把錢藏在鞋底。
「係？你講，你仲有幾多嘢瞞住我嘅！」
「係啦係啦，冇嘢敢瞞你呀。」
當時，阿朗經歷了Fiona的一戰，倖免於難，常常心有餘悸。
他抱一抱思思，漫不經心地問：
「咁如果俾你揀，你寧願我出軌，定係死？」
她不假思索：
「當然係寧願你出軌。」
「吓，出軌咁衰，賤男死全家喎。」他調侃。
「真㗎，寧願你出軌。」她垂眸：「都好過成個人冇咗。」
他好像隱隱明白她的意思，但是，沒有再想下去；凌晨時分，世界應該安睡。
現在，他看着嘉欣，好像更理解思思的意思。