結咗婚十幾年，好似已經唔太愛。《相愛十年》: 徘徊（一）
思思清理一下衣櫃，扔掉了一些舊衣。
阿朗問：「唔啱着啦？」
「唔係啊，仲啱着。」她抬頭回應。
「咁做咩要揼？」
「都差唔多着咗十年，係就係冇穿冇爛，但係就係舊咗，着到厭啦。」
衣服還是老樣子，她已重複穿衣很多很多遍；不再新淨，唯有不要了，沒有什麼不好，只是倦怠。
衣物如此，她恨，人呢？卻是不可能丢棄的。
「哦……」言未既，他的手機震了一下。
「喂，係咪仲未死，聽晚一齊食個飯好冇？」峰仔WhatsApp阿朗。
「好。」
「上嚟你度？」
「唔啦，出去飲杯嘢啦。」
「慘，好耐冇見阿嫂，有啲掛住佢……煮啲嘢添。」
「遲啲啦。」
峰仔心想，阿朗竟然沒有回應他的調侃，怪怪的；但他們能有什麼事嗎？恐怕沒有了。
「我聽晚會同峰仔飲嘢。」阿朗擱下手機。
「淨係峰仔？」思思差點想揶揄他。
「係。」
「好，唔好咁夜番，帶鎖匙。」
她不會再似以前那樣，乖乖在客廳沙發上站起迎接他。
「好。」
- - -
「你係咪仲撈緊死人化妝？」見面，坐下，峰仔問。
「係。」
「我有個大學同學，佢老公死咗，想揾人化妝，佢想男人化番男人，你接唔接？」
算是英年早逝，真令人婉惜。
「噢……好。」
「兩年前先去完佢哋婚禮，點知宜家竟然咁樣。由大學開始就一齊，上年先生咗個仔……唉。」
「因咩事？」
「交通意外……好似唔知點樣超速又唔知點樣切線，所以俾車撞得好嚴重。」
「哦……」
「你都好似見過佢老公，我哋以前一齊凑腳叫你嚟過幾次踢波，佢叫阿軒。」
「嗯。」阿朗得一點點印象，記不清容貌。
「遲啲再通知你。你最近點？」
「咪又係咁。」阿朗喝了一口。
「睇落好頹喎，你做乜嘢？」
「冇點啦，男人老狗，唔撚多講。」
「同阿嫂嗌交？」
「唔係。我覺得仲衰過嗌交，我哋冇嘢講，或者就算好似要嗌交咁，但最後都係會收皮。
你明唔明一種感覺——
就算我哋靜靜哋坐喺度，但感覺，都仲係好似不斷咁嘈咁，好似好多嘢都應該要係咁。其實好撚多嘢想同佢講，但係總係講唔撚到，同佢對望都有少少大壓力，好似已經嘈緊交咁……
有時，會誤會自己已經唔想再對住佢……唔係，我意思係，係有啲壓力，但我都仲係好愛好愛佢……
好奇怪，但我唔識講，啫係，見到佢唔喺屋企，第一吓係鬆一口氣，唔洗好似唔多自在咁，但係下一秒，又會有啲掛住佢，好唔適應宜家咁。
但我唔知點樣解決，結咗十幾年婚，唔通仲好似熱戀咩？
屌，點解你杯嘢冇郁過㗎？」
「點解大壓力，你哋變咗？發生咗啲事？嗱，雖然我一定冇你咁了解阿嫂，但係對住佢點解會大壓力？佢唔似係啲會咄咄逼人嘅人吖。」
峰仔拿起酒杯抿了抿，他聽不懂這個故事——
咩叫對住老婆大壓力？
「係啊，佢唔係。唔係個人變，我同佢都係，只係慣吓慣吓就係咁，譬如唔講個女就冇嘢好講咁。
但我唔想再係咁。我唔想同佢好似唔知想點咁，啫係我明明feel到佢都應該係在乎嘅，佢就算換銀包都keep住我張相……
呢件事我都好有責任，但係如果講出嚟、黃咗咁點算？萬一佢同我唔係諗埋同一樣嘢咁點算？」
「點會……佢點諗你唔知㗎咩？可能佢都覺得有問題，你諗真啲。」
「其實，好似真係。但係最後我哋冇溝通到。」
阿朗又呷了一口酒，但醉不來，醉不得。
「屌，乜你咁撚麻煩，你將以上嘅嘢講俾佢聽咪得囉。尤其是係『我真係好愛你』，邊有女人俾人愛唔開心，大家都開心咯，咪可以繼續傾囉。」
峰仔拍了阿朗的肩一下。
「你啱。」
思思幾乎佔據了阿朗一半的人生。
他坦然承認，他有很多缺點，譬如他佔有慾強、不安全感高；也不復當年勇，不夠決斷，不敢果敢，但那也是因為，他能夠失去的東西越來越少了，一個三十歲的人，計較的東西少了，但計較的程度高了。
不知道為什麼，也很容易感到不快和頹喪，好像鬰鬰不得志那般。
但男人嘛，有時，很難將這些東西坦然說出口。
尤其是他，總怕分享內心感受，別人會離他而去。他信思思愛他，可是，他怕他令她不夠幸福——
如同他曾經犯錯那樣。人的心是十分齷齪的，真相永遠埋藏在不見光的天，有很多想法都不能浮上水面，但與愛不愛無關；你了解你枕邊人很多嗎？其實不然。他將更多更多的親密和動作鎖在自己的心裏，逼自己正視這只思思不知道的事，告訴自己，若然同樣的事重演一次，她一定會非常非常傷心，所以他不要再犯。
Fiona之後，他每天都提醒自己要規行矩步，不可再有異心，無論原因是什麼。
所以，他曾經以為，只要二人相安無事，那麼，就可以永遠快樂，永遠好好地過活下半生；怎知生活本身就是挑戰。
他愛她。
他們並不是因為有了棉花糖才成婚的，他們都不是這般「委曲求全」的人；相反，只為真摰的愛走入婚姻。
「麻撚煩，你都咁大個人。」
「屌。我都唔想講呢啲嘢，但係我真係好愛佢。」
「So？咁更加要講清楚啦，其實都唔係好大問題啫，你都識講大家都緊張，啫係仲有心啦，有心就去做囉，有咩咁難喎，冇咗個老婆咪仲慘。」
「但我覺得係，更加要小心啲喎。」
「聽唔撚明。」
「你快啲結婚。」
「得，睇吓我家娘娘幾時開金口肯嫁俾我先。」
峰仔與女友戀愛三年，感情穩定。
阿朗回家，客廳燈沒有亮着，進房，看見思思假𥧌。
他摸一摸她的髮，去洗澡，再上床睡覺。