結咗婚十幾年，好似已經唔太愛。《相愛十年》: 二十八歲（三）
棉花糖小學三年級，更有自主意識了。
不再是那個温糯的女孩，開始駁嘴、反抗，時常忽然沉默、認真思考，懂得相對清楚地表達個人感受。
「下星期家長日啦，爸爸媽咪，你哋睇吓邊個時間唔得閒？就劃走佢。」
「咁快攞成績表啦？」
家長日的那天是星期六，阿朗和思思都有空，只劃掉七點半至八點半的最早時段，讓大家都多睡一會兒。
如果去過家長日，就知道老師不外乎也是說一些無聊的話——
如果你是一個品學兼優的學生，就和你看看成績表，說要繼續努力、看好你。大概五分鐘就可以出來了，誇稱過後，老師只跟家長寒暄：「佢喺屋企乖唔乖？」
如果你是一個在各方面也表現平平的學生，老師會說：「好乖啊，不過有啲靜，平時可以再踴躍啲，參加多啲課外活動。」一邊指着成績表的某處，說不過不失，有進步空間，替你打氣，再和家長說：「放心啦，佢幾好。加油！」
如果你是一個成績下游、上堂長眠的學生，老師就會滔滔、滔滔、滔滔不絕，大江大海極度澎湃。通常，不斷來回成績和品行，皮笑肉不笑地向家長展示禮貌：「嗯，佢呢其實真係聰明嘅，只係太懶同埋曳、又唔聽老師話，你睇吓有啲科，其實都唔係咁差；但都有啲科可以考得更好，至少希望佢合格啦……總之呢，我覺得佢幾有天份㗎，可以嘅話，就督促吓佢啦，都叫佢唔好嘈住其他同學仔上堂，乖乖哋啦。」
棉花糖一家在課室門外等，比原本約好的時間多等了十五分鐘，內進，只見老師和顏悅色：
「悅思幾好啊，成績唔錯，而且平時都好乖嘅。但係都真係好靜，而且睇番呢一欄，係空嘅，可以俾佢參加吓唔同嘅課外活動。」
老師指着「其他活動歷程」一欄，又補充：
「其他同學都有參加好多㗎，悅思得閒都可以去玩吓，當放鬆吓。」
然後看着棉花糖笑了笑，又向夫妻二人點頭。
思思回應：
「好啊，我哋會再傾吓。」
五分鐘後，打開門，離去。
阿朗說：
「等十五分鐘，然後見五分鐘……好啦，宜家我哋去禮堂書展啦！」
棉花糖故上前帶路，遙遙領先身後的阿朗和思思，思思將成績表放進folder，收進手袋。
思思對阿朗說：
「不如我哋叫棉花糖學吓興趣班？」
她本來以為別人也沒有在參加很多課外活動，所以才讓棉花糖順其自然。
「學咩？」
他覺得不用將剛才班主任的話放在心上。
「唔知……但學校應該有唔同校隊或者學會？好多人都參加㗎喎。」
贏在起跑線？也許，已比其他同齡小孩落後很多了，現在追回來吧。
「等等問吓佢想唔想先，如果唔想就唔好逼佢啦。」
「但萬一佢真係咩都唔想，就完全冇參加任何嘢啦喎，個欄空白嘅。參加多啲嘢，課外活動分加咗，操行都會好啲吖。宜家啲小朋友個個都玩好多嘢㗎啦，得棉花糖唔係，我有啲擔心。」
棉花糖的操行是B+，但其實，如果她多參與校內活動，一定可以達到A級。學校的評分制度，到底並不是讓你乖乖上課、交齊功課就叫完滿。
「為咗加分而參加好咩？其實佢宜家操行都夠做啦，咁乖，洗咩同人比喎。」
「可能佢想呢，當學多樣興趣咋嘛。」
「真係想嘅話，就一早報咗啦，要我哋逼咩？」
阿朗勾起從前被母親逼使考取好成績、好操行、好獎勵的記憶，自我代入，覺得作為家長應該更尊重孩子的意願才對，不應拔苗助長。
「可能係因為佢起初唔想玩呢？要人提吓先參加嘛。」
思思則想起自己小時候擁有的莫大自由，她就是因為沒有逼、沒人理，過分羨慕他人能被管束，最後再大一點，才自行報不同的校隊，自我增值，已覺遲緩，當然的社會風氣還未流行自發性興趣。
如果棉花糖有他們提點、教導，可以更早地學習更多書本以外的知識。
「問吓佢先啦。」
阿朗皺眉，他不認同思思的想法，但又不想與其爭吵，壓下內心想法，鼻子吐出重重的氣息，繼續跟在棉花糖的背後。
思思知道他不悅，可是，又覺得自己沒有錯，同樣沉默。
換着以前，這一種小事根本挑不起二人的情緒。他們都是相對平和的人，有什麼都好好說，最後爭一時之氣，可是隨即又和對方道歉。
「我想買呢三本書，得唔得啊？」
棉花糖回頭，舉起其中一本英國文學作品以作示意，問阿朗和思思。
二人同時說：
「得！」「番去係咪會睇㗎？」
「買咗咪知睇唔睇。」「唔好咁快做決定。」
「鍾意咪買，諗咁多做咩？」「買咗唔睇，好浪費。」
阿朗從棉花糖手上拿走那本書，抱在懷內，問她：
「你仲有冇其他嘢想買？」
他見思思不再作聲。
「我仲想買顏色筆，想畫畫。」棉花糖手指文具區。
思思抬眸，說：
「屋企好似仲有好多噃，用哂先啦？」
棉花糖說：「又係喎，咁遲啲先買啦！屋企有，唔洗買～」
她故牽着思思和阿朗，走到收銀處付款。
阿朗將書收進背包，和思思說，算是温聲地哄一哄她：
「如果佢唔睇，就我哋睇囉，係咪？橫掂八折喎。」
思思瞪一瞪他：
「我英文好屎。點解小學會有英文版四大悲劇賣㗎？咁深。」
「我讀俾你聽咪得，當係睡前小故事好唔好先？」
他們笑一笑，又似從未發生過任何事，然後再去吃飯。
再年輕一些的時候，不是這樣的。以前，總喜歡將問題刨根究柢，要說到大家完全「爽」、完全釋懷才會轉移到下個問題。
不能說是好或不好吧，只是有些事情，到底與舊時不一樣了。
其實，如果可以一直下去，也挺好的。反正，所有的感情都會走向平淡安穩，難不成七十歲還攀到高峰綁繩玩笨豬跳墜落過山車嗎？
只要不在其他方面起波瀾，絕對，可以一生一世。