那一天我成為了練習男友: 【XIX】Ex同事

7日提名期，14日候選期，講真，點部署好。

人物不嬲都唔廣嘅我點樣搵人組隊。

仲要尋日咁大單嘢，搵到人都無聲望啦，真係選條鐵咩。

人哋有權有勢，難聽啲講，我就欠債窮撚，點鬥。

「阿月，我哋點搞呀，已經過咗3日啦，都無進展。」





「你吾洗擔心啦，尋晚我就係為咗搞掂先咁落力諗好我哋大概要點做。」

係真先好呀，最後玩到要轉校我真係吾知仲可以講咩。

首先要解決最大嘅難關，就開點樣湊夠人去選，如果吾係就萬事冇商量。

我哋要搵到10個人， 然後再分配好啲職位先。

職位有會長，外務副會長，內務副會長，財政，秘書，校政，福利，康樂，傳訊合共9個，總共要有12個人。





我就冇乜人脈嘅，嚟嚟去去都係阿基個班嘅啫，然後阿月就係新嚟新豬肉，理應都唔系識好多人。

結論係我哋有機會未打先輸。 

「搵你啲朋友幫拖咪得囉，做嘢緊係搵熟人架啦。」

 所以話呢條友真係冇乜腦力，如果係要搵做到嘢嘅人咁緊係輕鬆啦，但選學生會從來都唔係靠實力嘅。

 所有嘢只要冇人氣冇票數嘅話，基本上係唔成立。 





我有諗過對策，就算我推行對唔富有嘅學生有利嘅校政，都只係會吸納都呢少部分人投票，至於大趨勢嘅有錢人我真係無從入手。 

「我會話我唔想拖佢哋落水，呢個係我哋嘅問題，除非佢哋話自己要玩，如果唔係我唔會主動搵佢哋幫我手。」

 「友情牌唔係呢啲時候打架咩？」阿月問。 

「呢啲只係叫利用，我絕對唔係呢啲人。」

 所以阿月諗嚟諗去都只係呢個方法，嚴格嚟講就係... 冇乜撚用。

 唉......都係搵定另一間學校準備著草算吧啦。

 「老友，你單嘢好似都幾好玩咁喎，可唔可以侵埋我玩先。」

 呢把聲，聽落好熟咁。





 ...... 

「點解你會係度架，煙鏟。」

 此時此刻，我唔敢相信呢個人會係我面前出現。

 我嘅ex同事，阿政，唔知佢叫咩名。

 「謂，係個排打工太大壓力先扮嘢食幾支啫，而家返學唔食架啦，你最好吐口水講過。」

 「呢個唔係重點，你唔係話自己冇再讀書咩。」

 「係有啲意外，之前太寸比老豆懲罰，叫我自己好好反省下，之後就轟咗我去佢有入股嘅萬食屋閉關停學一年。」





 「咁荒謬嘅事，果然係有錢人嘅世界。」

 究竟身邊啲人可以有嘅奇葩，真係拭目以待。 

「講返重點先，你學生會單嘢，我早有耳聞，使唔使我幫你。」阿政問。 

「但你有咩理由要幫我，話晒對面條友都係學校嘅龍頭，對你冇著數喎。」

 「做人唔使下下咁樣算計嘅，我想幫下朋友唔得咩，又或者......我只係想參與係呢啲青春嘅遊戲之中咁囉。」

 我沉思咗一陣。 

「我好有可能令到你以後都唔會有美好嘅校園生活，即使係咁，你都願意去協助我？」

 「當然，我驚我老豆多過佢啦。」 





「咁一言為定。」

 我同佢握手，終於搵到一個（可能）可靠嘅人選。 

希望佢唔係嚟troll我。

 另外我嘅朋友，阿基同芷期，本身我都冇去特別搵佢哋，但佢哋考慮咗一陣都話決定嚟幫我手，我好慶幸識咗呢啲同我共患難嘅朋友，而唔係會阿諛奉承嘅人。

 而家已經召集到5個人。 距離目標，仲有7個，四日時間。 都仲係差好遠，究竟可以點樣說服其他有影響力嘅人嚟幫我呢？