那一天我成為了練習男友: 【XX】條件

而家有2個難題，先係隻齊12個人，另外就係集齊之後究竟可以用咩取勝。

成件事都已經係進入咗個死局，原因係出自我身上。

因為......我真係窮。

雖然咁樣咁出嚟好膚淺，但事實就係呢個社會就係咁膚淺。

有財有勢，你話冇人痴埋去，我先唔信。





先不論財勢，淨係知名度都已經輸一半，就好似而家頒獎典禮咁，唱歌好聽同你出唔出名都好重要，你紅歌唔紅人嘅話學咩人攞獎先。

即使我有好嘅政綱，都係無補於事，而我唯一嘅突破口係變左要依賴其他人。

例如最近加入嘅阿政。

雖然我係學校未聽過佢個名，識佢嘅時候都係打工果陣，但聽聞佢都係學校嘅風頭人物，只不過係我摺所以冇留意啫。

戰績包括公然批評學校對於階級嘅觀念，曾經係上年學生會會長候選人，以及......羞辱人仔。





聽落第時肯定係反社會嘅人才。

當然佢都係有錢人，只不過係比較好果啲。

唔係話我刻意批評有錢人，但係呢間學校總會對基層嘅人嚟講係唔公平。

因為社會總會係偏向有利益嘅一方，試問學校滿足我哋同有錢人，究竟會有咩分別，相信唔使我講大家都會知。

所以我而家可以做嘅就係係阿政身上搏一搏。





「阿政，你覺得我哋可以用咩條件先可以召集到其他人嚟加入我哋，甚至係拉攏支持者。」我從未試過係學校搞啲咁驚世嘅舉動，當然唔會有呢方面嘅知識啦。

但我面前嘅呢位大人物，肯定會識。

「好簡單啫，一係提升我哋嘅形象，又或者......令對手嘅形象受損咁囉。」然後佢見冇人比到反應：「而我地，兩樣都要做到。」

但首當其衝都係要搵齊人先。

「我冇咩人脈你應該都知架，咁應該從咩方向去招攬其他人？」

「冇咩方法架，唯有friend搭friend架咋，又吾係個個好似你得咁少朋友。」

又比條煙剷一句直插我嘅心臟地帶，真係就嚟俾佢激到中風。

「首先搵啲你覺得會支持我哋嘅人先啦。」佢繼續講。





基數雖然真係好細......但又唔係完全冇嘅。

「阿月，你上次咪同唔知邊個食嘢嘅，拉佢你覺得有冇機會？」我問。

「乜人哋冇名咩，佢叫曾紫瞳，麻煩你記住啦。」

「咁佢會唔會幫手先？」

「真係唔知，不過佢都唔中意讀書嘅，可能呢啲嘢啱佢玩掛。」

真係有錢性格都偏古怪。（非惡意攻擊）

於是我同阿月就返去我哋自己嘅課室去搵佢。





以我所知，佢係一個社交大C嚟，有佢嘅加入，或者我哋嘅勝算有得再向上升下。

「紫瞳呀，你有冇興趣一齊玩學生會呀？」

我第一次咁近距離望住佢，真係幾靚女，會話同阿月比係有過之而無不及。

「做咩呀，要幫你男朋友拆炸彈呀？」

「阿哈哈係呀，就係咁囉。」

你好意思笑出聲架喎，唔係你我洗係度俾人針對，落得如此田地咩...

「我自我介紹下先呀，我叫做凌希神，最近就因為某人嘅任意妄為所以要去競逐呢個學生會，我係呢度懇求你加入我哋嘅內閣，當然我係冇任何報酬可以比到你，我並唔具備呢個能力，相信你都略知一二架啦。」

我以真切嘅眼神望住佢，講咗句我認為同我做練習男友一樣咁荒謬嘅說話：「我唯一可以保證嘅係，呢次嘅選舉會為你帶嚟青春又難忘嘅體驗同埋回憶，希望你可以慎重咁考慮我嘅邀請。」





空氣突然安靜，因為本身冇同阿月夾話點樣去遊說佢。

第一個出聲嘅係阿月。

佢竟然...笑鳩我...

「未見過有人好似你咁求人，真係太搞笑啦哈哈哈...」阿月不斷地大聲恥笑。

紫瞳一樣都係忍唔到笑，我就唔明有咩好笑啦。

「聽你敢講又好似幾有趣嘅，幫你唔係唔得，不過我都有我嘅條件。」

「條件？」





「3個條件，唔多啦呀話。」

佢呢句說話，加上微笑嘅表情，令我有啲心寒。

我亦都有預感，我準備要再次屈服係強權之下...