那一天我成為了練習男友: 【III】麻煩你送我回家
就係咁，混混噩噩又返完一日學，又要去做嘢啦。
其實我人生都算係幾充實，樂觀啲諗嘅話，至少唔係廢青，日日淨係識打機，出去吃喝玩樂。
「希神，今日我哋去基哥到打機，你會唔會嚟呀？」一個叫阿良嘅同班同學問我。
阿良亦都係有錢仔中的一員，私人司機接送，成日踩單車個陣見到佢架車駛過嘅。
「不了，今日有嘢做，你哋玩得開心啲啦，走先啦拜拜。」
我明明係一個高中生，過嘅生活卻係打工仔生活。
所以同時，我都好羨慕阿基佢地班蛋散，生活無憂。
算啦諗咁多托咩，比啲心機返工好過啦，命運係由自己改變架嘛，正面啲！
我飛快地踏上我嘅單車，一路向萬食屋嘅方向前進。
「嘩希神你今日咁早嘅，足足早咗15分鐘喎。」店長問。
「係呀，今日唔知點解好想做嘢，所以咪開turbo嚟囉。」
其實係因為諗緊戈樣嘢，所以先咁快過度嚟，為咗用工作麻醉一下自己。
的確，阿月開出嘅條件非常吸引，但萬食屋同樣地重要。
佢哋所帶比我嘅嘢，係難以取代的，因為我真係真係好鍾意呢度嘅大家。
「我去換衫先啦。」
說罷我就入咗更衣室。
「打醒十二分精神，開工啦凌希神，唔好比情緒影響工作。」我望住鏡子，不斷對自己講呢番說話。
對客人，要時刻保持微笑，亦表現得專業，先係一個好嘅員工，你個係我對自己嘅小小要求。
「歡迎光臨，三位系咪？請過泥呢邊坐。」
「係嘅，一份安格斯牛柳粒同埋火山朱古力，請稍等。」
「承為78蚊，現金系咪？多謝晒你，下次見。」
今日表現唔錯，生意都一如以往咁多，實在太好啦。
「歡迎。。。點解係你架。。。」
頂你個肺，點解會係你架。。。允天月。。。
佢帶著另一個人嚟，同班嘅曾紫瞳，另一位我班嘅女神級人馬。
不過佢讀書好渣，如果唔係有錢嘅話，恐怕我都唔會係度見到佢。
而我同佢亦無乜交雜，所以除咗知佢係邊個之外，我都吾知一切有關任何關於佢嘅嘢。
只係知道佢好受其他同學嘅歡迎，可以話係我哋級社交大使。
話說佢哋幾時咁friend架？
「嘻嘻，你好喎希神，估唔到係呢度會撞到你添。」阿月打量咗我幾眼。
肯定唔係撞到咁簡單，我賭乜都得。
「係囉，咁啱嘅，兩位呀嘛，請跟我嚟呀。」我勉勉強強地展露笑容。
我諗應該冇乜人知我係呢度打工架喎。。。女人就是恐怖。。。
吾知以為佢跟蹤我添。
「請問食乜嘢呢兩位小姐?」我強顏歡笑地說著。
「要個朱古力甜甜圈呀唔該。」紫瞳係好鍾意食朱古力嘅，如果我無聽錯嘅話。
「咁你呢小姐？」我望向阿月。
「要杯Hazelnut Cappuccino得啦唔該你。」
「好嘅，麻煩兩位小姐請稍等一下。」
仆你個街，你嘆下午茶還嘆下午茶，但點解要嚟呢度嘆呀大佬，系咪想逼死我。。。
算啦佢哋快啲食完我再打發佢哋走。
「喂喂，希神，你識佢哋嫁？邊個係你女朋友呀？」店長嘅奸笑，搞到我起晒雞皮。
「識都算識嘅，但我真係冇女朋友呢店長，唔好成日屈我啦。」
「衰仔，你咁樣無青春架啦，高中點可以唔拍拖架，你店長我以前都係情場高手嚟架，可謂一笑傾城，要唔要過兩招俾你？」
「又吾見你而家有，淨係識係度想當年...」
「你 講 乜 嘢 話 ？」她專登拖慢語速。
我聲都唔敢出，都係專心啲工作好，應間又比佢打就真係會出人命。。。
「朱古力甜甜圈同埋Hazelnut Cappuccino，兩位請慢用。」
佢哋都無繼續煩我，實在係太好喇。
「你啲朋友咁靚女嘅，你有冇暗戀人呀？」阿惠問我。
「咪玩啦兩個都唔熟，同埋點解你咁想知嘅？你又唔似啲咁八卦嘅人啊。」
「冇冇冇冇野呀，就真係問下姐，唔得咩？」
唔駛咁緊張嘅，我問下你姐，有唔係嚴刑逼供。
「又冇話得唔得嘅，反正我又唔在意佢地兩個。」之後我反問「咁你呢阿惠，有冇暗戀嘅人呀？」
「關你咩事姐，你去做嘢啦！」
女人真係女人，佢問就得，我問就唔得，仲要鬼死咁惡，嚇親寶寶了。
就係咁，紫瞳坐咗半個鐘就已經走咗，而阿月。。。成粒鐘都唔走係想點，雖然佢無影響我嘅工作，但仲係感覺有啲啲唔太自在。
唔經唔覺已經做咗一粒鐘嫁啦，終於可以放一放break抖個十分鐘。
我行咗過去阿月張檯到。
「介唔介意我坐一坐低？」我友善地問。
「唔介意，請坐。」
我緩緩地坐低，然後再問佢：
「點解你坐咗咁耐都唔走呢？」
「因為。。。因為我唔識路。。。」
我無聽錯呀嘛？
「你唔好玩啦，咁我想問你點樣嚟架。。。」
「我搭的士嚟架囉。」
「咁你搭返的士就咪得囉，咁簡單嘅解決方法你都諗唔到，個腦生草架？」如果連搭的士都唔識，真係可以考慮下放棄做人。
「屋企有啲遠，唔係好夠錢，今日冇帶夠。」
你究竟比唔比得起我份糧架，好似有啲詐騙嘅成份喎。。。睇嚟我要重新審視下佢嘅可信性。
「咁你想我點呢小姐。」
「其實我有個不情之請，唔知你肯唔肯聽。」
「聽吓亦無妨嘅，不過要諗下先囉。」
「你送我返屋企得唔得呀？」
「你屋企係邊？」
「淺水灣。」
含晒，咁遠，呢度係沙田區喎小姐。
豪宅區嚟喎，咁有錢架咩。
「你點解唔叫紫瞳教你呀，你同佢唔係friend嚟架咩，同埋順帶一問，你哋點樣一日就可以friend到。」其實你都生存咗咁多年啦，點會唔識返屋企呀。
「我同佢其實係小學同學嚟嘅，不嬲識嘅。然後佢今日無啦啦有急事，所以咪走先囉，搞到我都冇時間問佢。」
「咁我而家教你，你自己返得唔得呀？」我攞出我嘅手提電話，開咗個mtr map出嚟，然後繼續講「首先呢就由呢度行去第一城站，搭到去鑽石山，再轉。。。。。」下面省略晒啦太長了。
她無言了。
「喂你明唔明嫁比啲反應好喎。」
「你不如送我番去呀。」
「唔好玩啦，你都做咗咁耐人啦，點會連返屋企都唔識先得架，笑死人咩。我仲未收工呀小姐，又排你等。」就算我得都唔可以做做下野就加埋大佬。
正當我依然係度猜度之際。。。
「你送佢啦，呢幾日你都辛苦啦，做小兩個鐘都冇所謂啦，放心喎唔會cut你糧嘅，定啲嚟。」
店長係史上最仁慈嘅生物，雖然我都唔係幾想送，但店長都咁樣講啦唔通我重推咩。
「係喇係喇我送就係啦，你等我一陣。」咪當佢係一份job囉。
我快速去到更衣室，換番套校服就出咗嚟。
「店長，今日我架單車就靠你幫我睇住啦，小心啲呀！」我對著店長單咗一下眼。
「得啦，我驚你整親個位小姐多啲囉。」
尼個係佢開玩笑嘅方式，即係代表佢會做到應承我嘅嘢。
我最擔心嘅仲係我架戰車，而唔係我嘅車費，不過交俾店長嘅話我就放心了。
唉，究竟我而家喺度做緊啲乜嘢，點解會同個咁嘅人扯上咗關係。
我嘅生活已經比佢搞亂晒。