那一天我成為了練習男友: 【IV】讓步
「下一站大圍，next station Tai Wai」
我同阿月正在前往金鐘嘅方向。
有啲尷尬，好耐無試過同女仔咁樣單獨相處咁耐，上一次都已經係年半前嘅事。
「係呢，你係未真係識去咖？」她用疑惑的眼神望住我。
「唔識都要識架啦，唯有係靠我哋偉大嘅Google架啦，佢唔識行錯咗嘅話你就可以準備訓街講真。」
嚇下你先傻仔哈哈哈。
「下認真咩，唔好玩我啦，我仲要返去練琴架喎。」
不愧為一名實實在在嘅大千金，修養水平果然係高啲，同我哩啲人根本係唔同世界嘅人。
「講吓笑啫，正常嚟講係應該唔會返唔到去嘅。」
「咁都好啲，如果吾係我都吾知點算。」她嘆了一口氣。
我哋話咁快已經到咗顯徑，差唔多到鑽石山。
「其實我真係想知，你揀我為你嘅練習男友嘅真正原因究竟係乜嘢？」我一直都未覺清楚件事嘅來龍去脈，其實令我好唔放心，就當比一個有錢佬玩冇乜分別。
「我咪講左囉，想挫下你銳氣丫嘛。」
「你唔好攞你呢啲咁嘅原因嚟撚鳩我啦，一定唔係咁簡單，你唔比個合理嘅原因我我就點都唔會應承你。反之亦然，你肯透露嘅話我都會考慮下做你嘅練習男友。」
沉默了一會兒。。。
「真係得咁多，你信又好唔信又好，我無嘢再補充。」
她的眼神十分堅定，不似在說謊。
「咁點解咁多人唔揀係要指定我？」我真的不明白，阿月的心思。
「因為我有查過所有你間學校嘅人，知道你大概係一個點樣嘅人。」
我不經意打咗個冷震，小恐怖喎ching😂
「我唔係變態嘅你放心，你話想知我先坦白姐，當然我仲考慮左好多野先會做呢個決定啦，我都有我嘅私隱，希望你明白亦尊重一下我。」
我點頭，的確一個老闆請人，從來唔會透露佢心入面嘅諗法，我做開打工仔自自然然明白呢一個道理，無人識老闆嘅心戰入面諗乜，除咗佢自己。
可能佢都有佢自己嘅難處，而與唔係玩玩下，至少呢一刻，我嘅感覺係咁。
「咁我作為一個你心目中嘅候選人，唔知你會唔會話俾我聽其實做你嘅練習男友，準確啲嚟講係要做啲乜嘢？」
「好似你平時拍拖咁咋嘛，吾係好難姐？你吾似冇拍過拖喎。」
「我成日同以前啲女朋友打茄輪架，你又接唔接受到呀？」當然係講笑。
佢o晒嘴望住我，然後迴避我嘅眼神。
「我講下笑姐唔唔使咁驚嘅，可以冷靜少少。。。」
這女孩太純情了吧...
如果佢唔係搵咗我嘅話，換轉第二個，佢應該都幾大鑊，失蝕底畀其他人。
佢望返過嚟，尷尬笑。
「叮噹，叮噹。」
「我哋要落車啦，要轉車，有排你坐。」
我究竟點解會陪佢癲，要坐到淺水灣咁遠。咁樣諗一諗我都好似好耐冇坐過咁長途既車，對上一次都係好耐好耐之前嘅事啦，我老豆仲係到嘅時候。。。
諗起佢做乜呀，我而家變成咁真係多得佢唔小，唔好比我今世再見到佢。
話說第一次搭呢條新版馬鐵，都算方便嘅。
好彩有張綠色卡傍身，如果唔係呢一來一回，我真係會破產。（壞榜樣大家千祈唔好學）
佢一路行一路望，好似十世無尼過搭火車咁。
「阿允小姐。。。」
「叫我阿月！」佢好似好唔鍾意其他名咁。
「係嘅阿月，我想問你有無搭過MTR架？」
你哋可能會覺得問呢個問題係好荒謬，但如果問緊嘅係一個有錢人，咁就難講了。
「我一直以來都係搭的士或者靠私家車走遍天下，向來對呢啲交通工具不聞不問，我都係宜家先知我哋坐緊嘅係叫做MTR。」
我無言以對，果然有錢人嘅思想係與別不同啲嘅。
接著落嚟我哋都冇出過任何一句聲，始終我哋只係識咗一日，完全唔了解大家。
搭搭下，都已經去到油麻地。
「你平時係點過生活，日日都好似今日咁，係萬食屋到打工？」佢首先再度打開話題。
「係呀，人工高福利好，做耐咗大家又有感情，其實好開心，好充實。」
諗返起由我第一日入到去，佢哋就已經對我好好，就好似我第二個家咁，呢個亦都係我仲考慮緊做唔做阿月練習男友嘅原因之一。
「所以你唔捨得走，即使我出價十萬。」
我欲言又止，只是默默地點一點頭。
明明呢個係大好機會可以一次過還清啲害人不淺嘅債務，偏偏人類就係咁固執，會為感情而猶疑...
我唔想離開，但我又想快啲還錢，可以比我媽休息下。
諗返起呢一路以來嘅生活，真係不堪入目。
明明我哋已經好努力，死慳爛慳，就係為咗快啲清咗筆債，結果班大耳窿仲要打傷我阿媽，令到佢一時之間做唔到嘢不特止，仲要再借啲意話我哋拖數，要收貴啲利息，成班都唔係人來嘅...禽獸不如。
然後再係果段時間上嚟淋紅油，攪到一鍋粥，令到我哋非常困擾，連業主都差啲想收返呢度。
好彩佢最後都通容，如果唔係我哋就連唯一嘅歸宿都無埋嘅話，訓街都似，係呢度先咁平租咋。
咁樣嚇我阿媽，簡直不可理喻。
所以由果刻開始，我決定咗要同我阿媽一齊承擔呢筆債，為咗減輕佢嘅負擔。
即使佢一開始係反對嘅，但我依然堅持，並以保持返成績作為保證，佢先肯放手畀我去做兼職。
多咗啲收入，佢哋收齊數到冇嘢好講，所以暫時都無再嚟騷擾我哋。
而一做就遇到一班咁好嘅人，我真係感到好幸運，係不幸之中嘅大幸。
所以我真係吾知點樣開口講我要辭職呢件事...假設我接受咗阿月嘅邀請...
尤其是店長對我咁好...
「我知道啦，亦明白你嘅心意，一係咁，一個月，你可以返去兩日，加碼一萬，最大讓步，有冇得傾？」