高富帥轉校生睇中我？！: 逐漸清晰

溫書...？？？



我用疑惑嘅眼神望住佢講:「點解？」



「我新嚟㗎嘛，唔知呢間學校考試點玩法，要靠你幫手比啲貼士我。你唔會因為驚我爬你頭而唔敢教我㗎可？」歐諾宏用誠懇嘅眼神望住我講。我猶疑緊嘅時候，佢又加多句:「一係咁，你每次同我溫習，下午茶我請！」雖然我溫書嗰陣唔中意同人溫，但係唔幫佢又顯到好小氣咁，唯有勉為其難咁應承佢，又約左聽日放學即刻開始去自修室溫習。







第二日放學，當我執緊書包，準備同歐諾宏去自修室嗰陣，陳詩婷同楊麗雅行過嚟歐諾宏個位同佢講:「諾宏，不如我地一齊去自修室溫書吖！」「我有出面補習名師嘅答題筆記，我地可以一齊研究！」



歐諾宏有禮貌而不失微笑咁同佢地講:「多謝你地，但係唔洗啦，我已經同雪晴約左去自修室。」
嗰兩條八婆用好shocked嘅眼神互相望左眼，陳詩婷即刻講:「咁join埋我地啦！多個人多個腦，互相交流讀書心得都好！」
「但係...」
「5分鐘後門口集合啦咁！」楊麗雅未等歐諾宏講完已經急急腳走左去執書包。







佢兩個果然公主病，自己中意點就點，完全冇理過其他人嘅感受。要我同佢地溫書，我心入面係一萬個唔想，而歐諾宏都有啲無奈咁望住我嘆氣。我心諗，佢嘆咩氣姐，望到兩個校花圍住自己轉，開心都嚟唔切啦。




搭巴士去自修室嗰陣，嗰兩條八婆全程喺度聊歐諾宏講嘢，死唔斷氣，我好似唔係同佢地同行嘅人咁，靜靜哋企喺隔離唔出聲。







去到自修室，我地已經見到坐滿晒人，成場得返三個位。陳詩婷靈機一動，煞有介事咁同我講:「雪晴，你返屋企溫書會唔會集中啲？還掂你讀書咁叻，喺邊度溫都一樣姐，係咪？」



對我嚟講返屋企其實係最好，一嚟唔洗睇嗰兩個八婆面色，二嚟冇人騷擾我。所以我講:「嗯，我返屋企溫都一樣姐。你地三個坐啦，我返去啦，拜拜。」正當我擰轉身諗住走人，歐諾宏即刻捉住我隻手講:「等埋我。」擰頭頭對住陳詩婷講:「你地兩個留喺度溫啦，我同雪晴走。」於是就拉住我隻手行走左。



「喂，你做咩唔留喺嗰度溫？自修室有冷氣，溫習效果好好多。」我一路比佢拉住行一路問佢。



佢望住前面，頭都不回咁講:「我淨係想同你溫咋喎。」







同...同我？！點解？唔通佢真係中意我？有咩可能？！諗到呢度，我嘅心「噗噗，噗噗」咁跳，已經緊張到唔知點應佢。



歐諾宏擰轉頭望住我，笑住講:「做咩呀，又心動呀？」
「痴線！心你個動！」估唔到我講大話都有一手。
「唉，我地今日嘅溫書大計泡左湯添！咁我地去食個下午茶叉吓電先啦！」歐諾宏轉左個話題。
我從來都唔食下午茶，阿爸早走，屋企得阿媽打工搵錢養我同阿妹，每日都要慳住洗，邊有多餘錢食下午茶。所以我同佢講:「你食啦，我唔食。」
「囉嗦，行啦，我請。」歐諾宏冇理我，直接拉左我去附近嘅小食街。







我地停左喺一檔串燒店前面，歐諾宏問我食咩，我話隨便。歐諾宏望左眼餐牌，就同個姨姨講:「靚女，唔該要兩串豬肉，兩串雞肉，兩串牛肉，兩串牛柏葉，兩串...」
我即刻打左佢隻手一下:「喂你傻㗎咩！嗌咁多邊到食得晒！」
歐諾宏一路攞銀包一路同我講:「無所謂啦，食剩都可以拎走㗎嘛，懵丙。」佢喺銀包攞錢出嚟嗰陣，我睄到入面有幾張一千蚊同幾張五百蚊錢，我心諗，洗唔洗帶咁多錢呀...



我地喺附近嘅樓梯坐低食，男人個口真係特別大，我食到一半雞肉串燒嗰陣，佢已經食完一串豬肉同一串牛肉串燒。
「食得咁慢㗎你！」歐諾宏不滿咁望住我。「仲食到成嘴都係汁，真係論盡！」佢喺褲袋攞左包紙巾，喺入面拎左張出嚟，開始幫我抹嘴。
「我...我自己嚟得啦...」我細細聲咁講，但講完佢都抹完。



就係咁，今日我地放學咩都冇溫，就係去左食嘢，我攞住食淨嘅串燒，又諗起頭先比歐諾宏賴低左嘅陳詩婷同楊麗雅，開開心心咁返左屋企。返到屋企，阿妹見到啲串燒即刻興奮到攬住我講:「哇家姐！點解你會有串燒㗎！」







我摸住佢個頭，甜滋滋咁同佢講:「秘密！」



或者，我真係中意左佢啦。