高富帥轉校生睇中我？！: 美麗的錯誤

//(喺歐諾宏屋企)

「阿仔返嚟啦？」歐諾宏一踏入家門，歐媽媽着住一條名牌連身裙，優雅咁行出嚟幫佢攞書包:「同雪晴溫習溫得開唔開心呀？」
歐諾宏好幸福咁笑住講:「溫唔成，但帶左佢去食下午茶。」
「下次帶人地嚟屋企食呀嘛，媽媽幫你整大餐招呼佢！」
「媽，唔好咁心急啦！」
「衰仔我點會唔心急，你一年班走左之後一直對佢念念不忘，成日話要去搵人，媽比你煩左咁多年，真係想你直接娶人返屋企算！話時話你諗住幾時表白呀衰仔？」
「快啦，等時機。」







//


第二日朝早，我落左巴士沿住條小路行返學校，一路行一路期待緊今日放學同歐諾宏去溫習嗰陣，經過小路旁邊嘅一個公園，見到隔離有兩個人攬埋左一舊，一個同我差唔多高嘅女仔緊緊咁攬住嗰個背住我、高高瘦瘦嘅男仔。我心諗:點解個背影咁熟口熟面？



突然，個女仔伸左個頭出嚟，同我對上左眼，我shocked左，因為我見到陳詩婷。咁佢攬住嗰個係......？
我嘅心寒左吓，但係眼前嘅景象唔到我唔認，因為當個男仔擰轉頭嗰陣，我見到一個熟悉嘅面孔.....無錯，就係歐諾宏。







佢同陳詩婷一齊左？佢中意陳詩婷？咁點解佢要扮到好似中意我咁？唔通所有嘢都係錯覺？係我比佢玩緊？一百萬個問題浮喺我個腦到，搞到我咩都思考唔到，成個傻仔咁，棟左喺原地。



「雪......雪晴！唔係你諗嘅咁。」歐諾宏一路講，一路從陳詩婷嘅懷抱之中掙脫左出嚟。







「我會扮咩都睇唔到㗎啦，你地繼續。」我心酸咁擠左一句嘢出嚟，扮若無其事咁行走左。



其實我一早已經要預左，只係自己一時鬼迷心竅，中意左呢啲咁嘅人，一早認清事實咪好。咁大個女都係第一次有比人玩左嘅感覺，所以返到學校之後我難過到匿喺廁所喊左半個鐘。



最近文學讀緊《錯誤》，或者歐諾宏只係好似詩入面嘅鄭愁予咁樣，只係個「美麗的錯誤」。之所以美麗，係因為佢曾經比左一絲希望我，那怕只係嗰一啲啲。



我眼腫腫咁返到課室，張欣欣已經察覺到我唔妥，拉住我問:「雪晴......發生咩事？」
「無嘢，溫書啦。」雖然瞞住欣欣係我唔好，但係我而家咩都唔想講，淨係想靜靜地獨處。歐諾宏返到課室嗰陣，我連望佢一眼都冇，專心溫書。







就係咁，呢兩個禮拜入邊，歐諾宏每次想搵我講嘢嗰陣，我都對佢不理不睬，朝早最遲入課室，lunch落堂即刻拉住張欣欣落去食飯，放學即刻執書包走人，儘量拉遠自己同佢嘅距離。



/


話咁快，十幾日嘅考試就過左，自問自己考得都唔錯，學校排名淨係計中英數通四個必修科，只要我正常發揮，夠考第一。但係成績表出嚟嗰陣，我英文同數學第一嘅寶座竟然比歐諾宏搶左，得返中文同通識仲係第一，而拉埋平均分都少歐諾宏0.01分，屈居第二。學校登左個龍虎榜出嚟之後，啲同學再次比歐諾宏迷到氹氹轉，話佢樣又有，成績又有。你問我有冇心有不甘？正常我應該會嘅，但係我反而冇咩感覺。



考試完左，又變返正常上學日。中文堂嘅時候，長氣燕（我地個中文老師）同我地講:「為左提升我地班嘅學習效率，老師已經將你地分左做八組，每組四個同學，四個嘅中文成績參差，等你地可以互相請教、學習。以後中文堂都跟住呢個組合坐，知道未？」






同學聽到要調位，即刻怨聲載道，不過長氣燕不嬲唔民主，無視左佢地嘅怨言就公佈分組名單:「第一組:吳雪晴、顧曉峰、林展博、李敏兒，第二組:歐諾宏、楊麗雅、胡樂天、陳詩婷......」

呢個分組真係......無嘢好講。我睄到陳詩婷同楊麗雅開心到就嚟流口水，得到個咁好嘅機會埋歐諾宏身，簡直開心過執到金。

聽到分組名單，我地即堂調左位。我同顧曉峰坐，其實顧曉峰除左運動勁叻之外讀書都唔差，喺第三至第五名之間上上落落，簡直係男神嘅典範，衰在份人好勝，又風流左啲，好識溝女，不過到而家仲未有女朋友。

「喂吳雪晴，歐諾宏究竟係咪中意你？」
顧曉峰一坐埋嚟，就烘埋我身邊，望實我對眼問。