無錯，其實呢個係一個追女仔的故事: 16. 第一次嘗試

樂兒喊完。
「走喇。」樂兒企起身。
毒男仲以為會好似電視劇咁, 樂兒喊完會講, 佢身世有幾慘, 3歲死老豆, 7歲死老母。
不過伯母仍在生。
亦唔見佢屋企有咩世伯既神位。
仲以為不過係教徒無神位。
但乜都無講, 佢就起身。
好似根本無喊過, 只剩低毒男膊頭既眼淚,
同樂兒微紅既雙眼。
樂兒起身, 轉過去毒男度, 講咗句：




「我帶咗嘢食黎, 食埋先走啦。」
 
10點, 食早餐黎講, 遲咗少少,
午餐又太早。
因為 佢地行得太快。樂兒原本預計10點先至到獅子頭, 影下相睇下風景11點食Lunch。
不過, 一切ok。
一邊食, 樂兒又變返平時咁既樂兒。
其實唔係。
以前既樂兒唔係成日笑。
係成日都唔笑, 好cool。




唔知係咪見樂兒時間長咗, 呢個月, 樂兒笑既時間, 係上年成年咁多。
對住笑既樂兒同喊既樂兒, 毒男好想俾樂兒明白自己既感受.......
 
樂兒帶咗盒切水果, 煎雞翼, 同埋焗薯。
唔熱唔凍點食......
毒男拎咗盒切水果, 自己食咗粒西瓜, 再遞俾樂兒。
「估唔到幾個鐘都仲凍凍地, 幾爽脆」樂兒原來鍾意食凍西瓜。
毒男拎住隻雞翼黎食, 仲有少少煙 (大佬, 有無洗手？),
搣咗一半俾樂兒：「食雞翼啦, 仲有少少暖。」
最難諗係焗薯點食, 不過樂兒自己舀咗兩啖, 就成盒遞俾毒男。




毒男食咗幾啖, 仲諗緊加到幾熱, 樂兒又拎返去食。
 
食完嘢, 樂兒都係發現, 時間太早。
「明明上次上黎, 要成3個鐘先上到黎, 點解今次咁快？」
「你上次幾時黎過？」毒男問。
「上個月都黎過。其實係陪你先無上黎, 以前我黎慣黎熟。」樂兒已經包好哂D餐具係背囊：
「同你一齊行, 特別快喎。」
「哈...天氣涼咗秋高氣爽, 咪行得快D囉！」毒男, 你慢慢兜。
「同你一齊行, 開心D掛。」樂兒仍然係望風景。
「平時自己一個行？危險喎。」
「有你嘛！你要陪我到幾時丫？」樂兒望過去毒男度。
第三次。毒男發現樂兒已經係第三次, 算係回應或試探緊毒男既心意。
係咪要表示吓呢？
定係想知道之後拒絕呢？
 




「其實我父母都過咗身。」毒男講往事：
「差唔多十年。我好羨慕你有個家。
果陣係醫院, 見到2條遺體, 我到而家都唔知叫咩感覺。
我開始唔接觸人, 開始拒絕同朋友一齊, 開始收埋自己。
慢慢, 我就得返一個人。」
其實仲有個阿姨一齊住, 不過無需要講出黎。
毒男用呢個人物背景, 黎封哂樂兒拒絕既後路。
毒男望住樂兒, 樂兒伸出手掃吓毒男手臂。
毒男心血來潮, 捉住樂兒隻手, 低下頭, 諗：「呢個劇情係咪應該有少少眼淚？」
魔法製造唔到水。
不過空氣應該有水粒子。
樂兒感覺到毒男既眼淚, 內心一痛：「你, 仲有我嘛, 有我呢個朋友嘛。」
有Feel。毒男決心一試, 呢個場合應該, 衰咗都仲有朋友做。
毒男攬住樂兒。