無錯，其實呢個係一個追女仔的故事: 15. 哭了

今日小骨骨仲係好好胃口, 食咗17粒龜糧。
不過加咗張紙包住個缸口, 因為早兩日有細路掉咗塊擦膠落去。
佢話想餵烏龜。
結果餵龜變咗最快做完功課既細路既禮物。
樂兒諗橋又幾快。
當然, 人人有份餵。
最快做完可以餵5粒, 第2第3就餵3粒, 其他做完都可以餵1粒。
結果小骨骨食哂, 樂兒見食哂又加多幾粒。
體形好似都大咗少少。
因為星期日無人返, 星期六都臨收工餵多次。




咁食得, 就算俾佢冬眠都無問題掛。
不過都買咗暖管, 俾佢暖咗第一年先啦, 下年再諗。
 
收工, 照舊送樂兒返屋企。
樂兒好似心不在然, 心事重重。
毒男講龜仔D事, 但見樂兒諗緊嘢, 就唔講嘢, 靜靜地陪佢行。
去到邨口, 樂兒話有嘢想買, 約毒男星期日跑完步去睇。
當然ok。
不過買咩都無講。
係咪關星期五事？都係無講




 
星期日朝早。
跑步時間已經改咗6點。
難得樂兒揹住個背囊, 好似帶多咗D嘢。
「要唔要幫手揹？」毒男主動問樂兒。
樂兒搖搖頭, 係背囊拎咗件三文治俾毒男：「好輕咋。」
毒男一邊食樂兒帶俾佢份三文治, 一邊問：「星期五有咩搞？」
樂兒望住個山上面, 若有所思咁：「今日可以陪我上山頂嗎？」
山頂？好似未上過喎。
毒男諗住Googo吓, 不過樂兒已經跑咗去。




無所謂啦, 又唔使用力。
 
大約跑咗 (飄咗？) 5分鐘, 就去到獅子亭。
食完早餐就去呢度洗手。
經過幾條山路, 就去到登山口。
登山口竟然有警告牌：
「告示及警告
此段路艱險難行 只宜有經驗及裝備良好的人士前往。
天氣惡劣時切勿嘗試
請加倍小心」
會唔會出事架。
不過樂兒好似好有經驗, 話哂佢唔係行山, 而係跑山。
毒男就係涼住冷氣飄山, 仲有自製「雪袋」。無壓力。
GO！
 




經過樓梯、樓梯和樓梯, 上到獅子山頂。
「我地上獅子頭啦！」樂兒興致勃勃。
望住無際既高樓大廈海, 已經有人係度打緊卡。
前面仲有個山仔, 上面就係獅子頭。
 
獅子頭, 係好多塊大石堆成。
有幾個人, 似乎係一組, 好開心咁打緊卡。
似乎係在山頂紥營等天光。
睇日出既後生你女。
毒男感懷身世, 覺得自己係老餅, 仲要後生時咩都無玩過。
佢地似乎無打算走住, 由得佢地啦。
 
毒男同樂兒搵咗一塊大石上坐低。
「個景好靚。以前日日見住個獅子山, 都無諗過要上黎。」
毒男穿過樂兒既身影, 望住九龍美景。




「唔」樂兒淨係望住個景, 但係唔似開心。
仲要眼濕濕。
毒男望住樂兒, 知道佢要講, 就會話佢知, 所以靜靜地坐係度, 等。
朝早8點幾, 唔曬, 可以坐多個鐘。
不過好大風。整走D風先。
涼涼地。將塊石變暖D。
整定舊雲, 唔好曬傷。
一切搞掂, 慢慢坐。
無嘢做, 望吓樂兒都夠。
美人, 美景。
樂兒俟係毒男膊頭, 喊。