無錯，其實呢個係一個追女仔的故事: 14. 行近一步

返到屋企。
啱啱由Mary奇怪既陰影返黎, 又俾阿姨奇怪既行動嚇親。
阿姨拎住Mary張相。
「一腳踏兩船呀, 細佬？」阿姨, 你見到咩呀？
阿姨由沙發起身, 俟過黎大門前除緊鞋既毒男, 輕輕地露出事業線：「又會有個咁索既女仔既？」
張相係Mary係毒男後面, 擋風時間既動作。
張相點黎？
應該係慈雲山北巴士站望過黎。
「哈, 雪姐, 原來你搭巴士搭過龍？」毒男決定岔開個話題。
「靚女, 係咪唔夠訓？如果俾我係巴士見到個靚女咁訓法...」




毒男索性玩盡佢, 伸手摸住阿姨塊面：「我會心痛架,, baby。」
阿姨塊面真係幾滑, 乜唔係老太婆黎咩？
阿姨推開毒男隻手, 張相就跌咗落地：「阿姨你都溝？」跟住轉身坐返落沙發。
毒男執鞋時順手執埋Mary張相入鞋櫃。
 
「雪雪, 你今晚去咗邊玩呀？」毒男坐埋去沙發。
「開OT囉。你補習社唔係係鳳德咩, 走上慈雲山做乜？」阿姨索性摸住毒男個頭。
「無, 教吓個同事功課啫。」
「同咩事呀, 你同事咪即係樂兒囉, 唔通你老闆仲請得起第三個咩。」
「我地補習社個個月有錢賺架。」




「咁正話個女仔又咩人黎？」俾阿姨兜返入正題。
「樂兒同學黎咋嘛, 佢又上樂兒度溫書, 樂兒叫我帶佢搭巴士。」毒男唔興講大話, 反正唔識講棧踢爆。
「咁你又知唔知佢行去巴士站之後做咗乜？」阿姨懶神秘咁。
「咪搭巴士囉。」毒男發現阿姨實有嘢爆：「唔係, 做咗咩呀？」
「醒目仔。似乎你合格。」阿姨輕輕拍咗毒男個頭兩下。
「個女仔打電話, 係電話話你合格, 叫對面果個放心, 仲話你係好男仔,」阿姨又拉開個衫領：「有好嘢都唔睇, 咁忍得好難搵。」
阿姨, 唔好引我好喎。
「搵得個靚女黎試你花唔花心, 即係有心同你發展。你努力啦, 乖細佬。」阿姨起身去沖涼。
 
話時話, 阿姨仲要去跟Mary, 點解返得黎咁快？




唔通阿姨識飛？
佢好似真係識喎。
 
點都好啦, 樂兒聽日同後日都有mid-term, 所以佢聽日off, 我一個要頂哂班補習細路。
仲要陪阿姨打機。
點解阿姨咁靚都無男朋友？咁得閒理我咁多嘢。
 
星期三, 樂兒話要慶祝。
慶祝完哂mid-term, 同交哂第一批功課。
所以去咗食「泰多人」。
小姐, 原來你好辣。
小辣唔該。
 
毒男成餐飯都好似斷咗片咁, 食完仲好似虛脫。
最慘係唔可以做出黎。




明明聽人講辣過龍個嘴會腫, 又唔覺喎。
不過一晚「嗆」近百次, 樂兒都知毒男唔好辣。
還好甜品係芒果糯米飯, 唔辣。
黃大仙D商場開得夜咗, 差唔多9點都無間收工。
不過樂兒無咩想買, 只係行吓。
所以行吓行吓, 行咗去摩士公園, 見到有人打網球。
唔知幾時開始, 樂兒撟住咗毒男隻右手臂彎黎行, 雖然都仲係隔開少少咁。
不過間中都會掂到。
毒男唔知係表示當佢係姊妹, 定係可以做男朋友。
唔知, 所以唔敢問, 唔敢提。
變得好安靜, 齋行公園。
 
係泳池前面, 樂兒停低咗腳步。
「下星期五晚, 想搵你幫手, 你有無時間？」樂兒問。
毒男擰過去望吓樂兒, 發現樂兒用好期待既眼神望緊毒男。




原來, 兩塊面好近。
好想鍚落去。
「星期五？OK呀, 做咩呀？」毒男當然唔會鍚啦。
「咁我mark咗個時間先, detail就下星期同你講啦。9點喇, 返去喇, 好唔好？」
結果樂兒送到新光門口, 就叫毒男唔好送：「聽日見。」