無錯，其實呢個係一個追女仔的故事: 13. 唔識做功課

又到mid-term季節, 不過同毒男無關, 佢畢咗業好耐。
係樂兒要mid-term。
所以又要收工留低溫書。
不過今晚無得留低, 因為商場電力檢查, 7點到10點。
所以今日提早放哂班學生。
而溫書地點改咗去樂兒屋企。
同埋今晚多咗一個人。
樂兒既同學, 女同學。
乜咁多女仔讀Engine？
 




係慈中接埋個同學, 就一齊上樂兒屋企。
女同學叫Mary。
面圓圓, 短頭髮, 高高地。
應該有168。
仲要幾好身材。
白色T-shirt, 紅色薄外套, 藍色legging, 白波鞋。
一般禾稈冚珍珠既衣著。
做乜搵個女同學黎？
毒男一向唔相信自己既直覺, 所以唔諗咁多。
 




溫咗一陣書, 毒男發現唔係本科, 好難搞。
唔識做功課。
伯母出現：「唔好溫住喇, 食飯先啦！」好提議, 個腦實哂。
伯母煮飯, 有茶餐廳級數。
會唔會其實伯母就係茶餐廳做廚？
仲要有湯飲, 牛鰍煲螺頭, 正。
返工點解會有時間煲老火湯？
好多問題。今日有好多問題都係無答案。
第一角投影？第三角投影？等角投影？斜視圖？尺寸標註？
唔識畫。




其實係咪D好淺既題目？毒男無聽過, 無學過, 無頭緒。
係無學過同無頭緒之間, 終於做咗半份功課。
9點半, 係時候離開樂兒屋企。
始終人地屋企無男人, 唔方便留咁耐。
結果毒男要負責送Mary搭車。
 
慈雲山既夜晚, 係幾大風。
Mary捉住毒男隻手。
唔係拖手, 唔係撟手。
Mary匿埋係毒男後面, 仲捉實毒男隻右手黎擋風。
無錯, 無浪漫, 只係擋風。
「不如前面轉入樓梯, 無咁大風？」毒男對呢個姿勢唔知點好。
好騎喱。
求其匿入慈樂邨, 睇下佢想點。
佢又好似真係想避風咁。




「唔好意思呀。」Mary一邊整返齊件衫。
原來真係好大。
不過唔關毒男事, 佢只要樂兒就夠, 所以擰開塊面一邊落樓梯一邊睇巴士。
但係Mary自己係度為毒男加分：「你真係好人。」
好人...毒男諗起不愉快經歷：「所以收埋唔少好人卡。」
點知Mary踩多腳：「唔通, 你無女朋友？」
又中：「無咪無囉。」
Mary繼續：「咁有無鍾意既女仔？」
問咁多做乜鬼：「好似無咁大風喇, 不如行喇。」
Mary跳去毒男面前, 捉住佢隻手, 拉住佢：「嗱, 呀子仁哥, 你真係幾好, 所以唔好話我唔提你, 你聽日就剪下髮啦。」
「吓？」咩發展。
「希望下個月會見到你。」Mary轉身：「我見到巴士站喇, 88 。」
毒男望住Mary逐漸遠去，心入面既疑惑始終解唔開。