無錯，其實呢個係一個追女仔的故事: 12. 小骨骨

「的」補習社燈熄哂。
「Happy birthday to ......」毒男拎住點著1枝蠟燭既士多啤梨蛋糕, 入補習社, 點知見到樂兒拎住一缸龜。
俾樂兒揭穿咗添。
樂兒拎住缸龜, 行過去門口。
「送俾, 邊個架？」樂兒望住個缸, 問毒男。
毒男一方面好想送俾樂兒, 但又有個感覺, 咁樣俾樂兒揭穿之下, 會被樂兒拒絕。
毒男唔敢認。
「無...呀, 我...諗住擺係補習社, 有D人氣咁啫。」毒男仍然諗緊下一句點作。
「係呀？好得意呀！」毒男好似見到舅父張相個畫面出現係面前。
毒男細心睇樂兒, 係燭火映照, 樂兒紅粉緋緋, 眼鏡中倒映出蛋糕同埋─毒男。




「咁不如切蛋糕丫？」樂兒記起個蛋糕。
「係喎, Happy birthday to you, Happy birthday to you, Happy birthday to 樂兒, Happy birthday to you！生日快樂, 樂兒。」毒男慢慢地唱, 慢慢地捧起個蛋糕, 放在樂兒面前：「許個願啦！」
「Thank you！」樂兒合埋雙眼許願。
 
過咗幾秒, 樂兒打開眼, 吹熄蠟蠋。
之後, 樂兒就話：「咁, 生日禮物呢？」
大鑊：毒男份禮物, 已經變咗補習社寵物。點好呢？
「呀...俾個機會你, 幫隻龜改名...啦...」
「又好。我幾驚你改好名。我諗咗喇！」樂兒好似收貨喎。
「咁你改咗咩名？」




「你開燈自己睇。」原來樂兒已經襯毒男拎蛋糕既時間, 連名都寫埋。
小骨骨...咩名黎架？
有無用腦架？咁求其。
完全唔乎合人物性格, 作者有無求其D？
算啦, 本來都係諗住送俾佢, 由結果黎睇, 無分別。
一切ok。
 
「咁你許咗咩願呀？」毒男順口問句。
「Hi~mi~tsu~」樂兒扮日本妹好可愛。
「切蛋糕啦, 食埋先返屋企。」樂兒轉身放低個龜缸。




毒男放低個蛋糕, 俾樂兒切。
平平無奇地食蛋糕, 不過樂兒只係食一小塊, 因為要留肚返屋企食飯。
毒男食咗半個都飽。
仲有1/4個。
「小骨骨, 你都要食飽呀！」樂兒倒咗D龜糧入個缸度：「而？小骨骨唔食既？」
唔通天氣涼咗, 隻龜咁快冬眠？
好似睇過網址話, 暖水浸龜會食多D。
「龜仔留意唔到就會唔食。加少少水, D龜糧浮起, 佢就會見到過黎食。」毒男拎咗杯水, 慢慢倒入水缸。
杯水加熱到30度咗右, 應該差唔多。
隻龜浸暖水, 好似真係生猛咗, 開始爬黎爬去, 仲好以聞到龜糧味, 望住D龜糧飄吓飄吓。
樂兒睇住小骨骨行過去, 一啖一粒食龜糧, 好專心咁睇咗差唔多十分鐘。
「小骨骨係咪飽？剩返幾粒唔食。」樂兒好擔心咁問。
毒男圍埋去個缸度答：「係架, 龜食飽就會停, 唔會好似金魚咁飽死
(作者：其實金魚係唔會飽死, 食飽一樣會停)。
剩返果幾粒要吹出黎掉咗佢, 如果融咗會整污糟D水。」




毒男拎個手泵吸返幾粒龜糧, 順便吸埋D便便。
順便再暖下D水。
「咁小骨骨放邊度好」樂兒好開心咁望住隻龜。
「不如呢度啦, 我執定個位。」毒男已經係近門口個櫃預好位。
龜就唔怕放門口, 就算撞跌落地都唔會咁易死。
「不過過多一兩年要換缸, 到時就唔夠位放。鎖門走喇。」始終係送俾樂兒既禮物。
估唔到樂兒很好學咁問好多養龜既知識, 毒男當然義無反顧咁將呢兩日Googo到既知識開心些牙。
講吓講吓就送咗樂兒返屋企。
係第一次放工送樂兒返屋企。
 
件蛋糕？當然係留俾阿姨。