無錯，其實呢個係一個追女仔的故事: 11. 生日禮物

過咗黃大仙消防局, 就上到街市。
阿姨就問毒男：「你知唔知點解買龜？」
毒男當然唔知, 佢仲諗緊去邊度買倉鼠俾樂兒。
「俾你睇喇」阿姨遞咗舅父張相俾毒男。
張相上面係樂兒, 左手上面有隻半隻手掌唔到既龜仔, 右手摸住隻龜, 側住頭笑得好開心。
「你舅父話倉鼠得兩三年命, 到時喊死佢呀。」阿姨幾時聽到呢句？毒男又聽唔到？
「唔使諗點解我會知, 你舅父識心念傳送, 你有排學呀, 我都唔識。」阿姨, 你識讀心下話？
 
以前聽人講話買龜要買大隻, 因為怕細隻免疫力唔好, 好快死。
但阿姨專揀細細隻黎睇。




揀完一大輪, 又唔買走咗去。
而家又向竹園進發。
「話時話, 阿姨, 你行咁快唔倦咩？」毒男追住阿姨問。
「你都得架, 風魔法加速加埋用火魔法調轉降溫, 要用力既咩？」原來阿姨唔係行緊, 係飛緊, 仲要自製冷氣。
毒男跟阿姨既方法, 試下自製冷氣。
阿姨睇住毒男有時凍到打冷震, 又有時熱到叫出黎, 仲辣親自己, 一邊笑一邊幫佢治療。
終於調節到個溫度, 係身邊都感覺到涼風送爽。
 
「講返你D龜, 阿公教落買龜要買四圍爬, 正話果幾隻唔夠生猛, 我地去第二間。仲要買龜箱手動泵同龜糧。」阿姨好似好熟手喎。
阿姨就好開心咁揀呢樣揀果樣。




毒男係側邊睇住阿姨揀嘢, 就順便Googo吓養龜小知識：
1.巴西龜易養, 注意清潔就好少病, 係肉食龜, 鍾意食蟲, 但個別都會食菜葉
2.珍珠龜都易養, 喜歡食菜加蝦干
3.草龜原來唔係食草, 而係食蟲同蝦干
結果阿姨揀咗隻珍珠龜, 純綷係因為唔想買麥皮蟲。
佢話：「你估你個樂兒會唔會拎住條蟲蟲, 對住隻龜話食啦食啦？」ok, 我同意。
然後阿姨仲話要買保溫棒, 龜仔冬眠好易死, 一直熱住25-30度都唔會冬眠。
毒男好相信外公一定養過龜。
準備好哂, 聽日拎返補習社。
差D唔記得訂蛋糕。




 
星期一, 2點。
龜仔已經到咗補習社。蛋糕就借咗隔離餐廳個雪櫃黎放。
樂兒就同平時一樣, 2點9到補習社。
要俾驚喜, 就要扮無嘢。但毒男唔想樂兒以為唔記得佢生日, 而且仲有樣嘢要確定。
「樂兒, 生日快樂！」毒男主動開聲。
「而？你知我今日生日？」樂兒好似唔記得咗俾佢自己約毒男尋日去買禮物俾阿媽, 即係話俾人知佢自己生日。
「我當然記得啦。你今晚有無約人慶祝？」毒男問過先發覺自己好似講廢話。
「無呀, 咪返屋企食飯囉。做乜呀？」
「仲以為你會同屋企人出街慶祝。」
「無啦, 尋晚慶祝咗。」
「咁朋友呢？」
「正話佢地請咗我食Lunch。咁你呢？」
「我？」
「你係咪想請我食飯呢？」




「都好呀, 我同阿姨講聲先。」竟然變咗係樂兒約毒男食飯。
不過毒男原意都係想令樂兒以為毒男咩都無預備, 到時先叫Surprise。
「不過你唔使拍拖咩？」樂兒問緊咩？
「我？我都無女朋友, 拍咩拖？做乜咁問。」毒男反問。
「無呀, 尋日晏晝見你同個女仔行街, 仲以為係你女朋友。」竟然係阿姨。
「緊係唔係啦。」
「個女仔幾靚丫,」樂兒借D而俟埋毒男身邊：「考慮下啦, 你又無人要。」
「傻啦, 果個我阿姨黎架。」毒男當然要拒絕。
「...係咩？」氣氛又變得好尷尬：「哦, 夠鐘行啦！」
 
結果到7點收工, 都無同樂兒講過嘢。
不過阻唔到毒男送禮物既決心：「樂兒, 想食咩呀？」
「？？？」樂兒一臉問號。
唔係化？唔係約食飯咩？「食飯嘛, 我同阿姨講咗唔返屋企食。」
「你講真架？我阿媽煮咗飯。」樂兒無意中Fict咗毒男, 好唔好意思。




「咁......你等一等。」毒男好似中咗一箭, 不過唔理, 繼續計劃。
樂兒坐低執埋嘢, 點知發現咗書架底有個水缸。
仲有隻龜。