無錯，其實呢個係一個追女仔的故事: 10. 舅父襲來

星期日, 跑完步。
無錯, 而家每個星期日, 同樂兒去跑山已經成為習慣。
加埋聽日, 係個特別日子。
樂兒生日。
所以毒男今日約咗樂兒去行街。
原本諗住買生日禮物俾樂兒, 不過毒男搵哂記憶, 都唔知樂兒鍾意乜嘢。
反正真係唔知, 不如帶樂兒去, 等佢自己揀。
所以毒男同樂兒去咗慈中5樓。
行咗幾間舖, 樂兒好似都唔係好知想睇乜,
不過毒男就一路咁儲存哂樂兒睇過D乜, 留意過D乜, 睇唔啱D乜。




衫都好似搵唔啱, 裙又唔啱, 首飾又唔睇。
搵咩呢？
 
不如食嘢。
毒男同樂兒係茶餐廳坐低, 是但叫咗A餐同B餐。
「其實你想買咩呢？」毒男索性開口問。
「聽日我生日......」樂兒一邊篤檸檬一邊講：
「我想買份禮物俾阿媽。」
毒男終於明白呢個孝順女, 年年都有慶祝「母親受難日」,
所以會送生日禮物俾阿媽。




「咁你想搵咩類型既禮物呢？」毒男毫無頭緒。
「其實年年差唔多, 所以想搵D特別D俾佢, 不過慈中似乎無。」樂兒飲咗一啖凍檸茶, 好似太酸, 皺一皺眼眉。
「不如你諗下你鍾意咩？」毒男打蛇隨棍上問。
「如果係我, 會想買......倉鼠。不過阿媽好驚呢D小動物。」任務達成。
「咁你有無同你細佬夾過？」順便叉開少少話題就啱哂。
「我細佬唔興呢樣嘢。」樂兒講起就唔開心。
「咁......不如食嘢先。」咁啱嘢食到。
就係食咗第一啖, 毒男發現, 茶餐廳外有人望住佢......
係舅父。
 




結果變咗3個人食飯。
樂兒好似很好奇, 毒男會有親人突然出現。
舅父又好似好熟路咁, 同個侍應吹水, 竟然樂兒會吹埋一份, 仲好似個個都識樂兒媽媽。
毒男變咗做外人。
毒男聽住佢地3個傾下傾下, 仲決定埋買頂太陽帽俾樂兒媽媽。
發生咩事。
食完飯, 落4樓買帽, 樂兒仲要同舅父講：「花叔叔, 唔該哂。」
「得閒約你媽咪飲茶。88」舅父同樂兒講88？
「子仁仔, 而家就上你屋企傾下偈。」舅父拉住毒男, 落山返毒男屋企。
返到屋企, 連阿姨都斟定3杯茶定佢地返黎。
 
「叻仔喎, 學識魔法唔夠一個月, 就可以約到女仔去街。」舅父係咪讚緊毒男呢。
「佢連機都唔打, 轉哂死性。公會班人差唔多放棄咗佢。」阿姨補一刀。
「唔使望住我, 我逐樣話你知。」舅父已經預備好點解釋。
「1.舅父我細個都係住呢間屋, 所以係慈中返過幾年工。你舅父搬去柴灣都係呢2年, 以前住毓華街。




2.果間茶餐廳平靚正, 個個都去食, 個侍應成哥做咗幾十年, 仲認得我地呢D熟客。
3.你個女朋友個阿媽都成日去食, 成哥緊係知到佢鍾意乜。
4.你個女朋友又幾好女仔。」舅父未講完, 就係衫袋拎咗樂兒張相出黎俾阿姨睇。
有無咁誇張呀舅父？相都曬埋出黎？
舅父望下毒男, 又望下張相：「你整唔到相咩？想像下植物細胞結構同光線顏色變化, 你讀理科應該OK。」
「胡樂兒吓話, 幾乖女幾好喎。」阿姨好似幾欣賞。
「幾好架, 我好滿意。」點呀？呢兩個揀新抱吓話？點哂頭好鍾意咁。
 
「咁阿哥, 食埋飯先走啦？」阿姨原來煮埋飯。
「正話食咗喇, 同樂兒同子仁仔。」舅父開始著鞋。
跟住阿姨同舅父約埋下星期飲茶, 約埋舅母。
之後阿姨食住碗炒飯, 就坐過去毒男身邊。
「點呀？有咩想問呀？」阿姨, 小心噴飯。
「舅父到底黎做乜呢？」毒男仲係唔明舅父黎做乜。
「嗱, 你去沖個涼, 換件衫, 我去陪你買隻龜。」阿姨已經差唔多食哂碗飯。




「一路行, 一路話你知, 乖細佬。」