無錯，其實呢個係一個追女仔的故事: 4. Surprise

打開「胡樂兒百科全書」第一頁。
原來係版權頁。資料又幾足喎！
作者：張子仁 插圖：張子仁 ......
乜鬼都係張子仁，連印刷都係張子仁......
 
咁第二頁呢？空白......
第三頁呢？目錄......
第四頁又空白。
第五頁終於有字。
3個字：胡樂兒




有無咁呃頁數呀？你係富樫吓話？
跟住第六-十五頁都係相。
又影得幾靚喎, 第六-十頁係眼鏡娘, 有怕羞, 又有開懷笑；有在路邊俾飛吹亂頭髮, 又有坐在桌邊微笑。
第十一-十四頁都係上堂相, 頭兩張係同學生一齊, 連美珊、國強幾個學生都有份上鏡, 之後兩張就係溫緊英文。
第十五頁當然係幻想相。妄想的泳衣相。比堅尼。
瘦瘦地, 都幾好丫！
 
結果都係得個桔, 無料到。全部都係毒男既記憶, 仲要顯示到毒男對樂兒有幾認識。
係無認識。
還原基本步, 膽大心細面皮厚, 毒男決定都係做下朋友先啦。




睇完本百科全書都已經2點四, 早D返補習社好過。
 
補習社老細係個大老細, 係各區都有佢既補習社分店, 本時好少會落黎巡視。
所以毒男同樂兒基本上已經係店長, 2人都有大門鎖匙, 反正導師都只係得佢兩個。
不過因為星期五要分2個唔同時間去接學生, 所以2點幾樂兒已經上緊堂, 有2個學生已經黎咗。
毒男去到補習社門口, 終於諗到第一個surprise。
「張sir」美妮美珊兩姊妹幾有禮貌。
「乖, 呢個送俾你地。」毒男係個環保袋度拎咗兩個毛毛耳罩出黎。
「好得意呀！多謝張sir。」兩姊妹似乎好鐘意。
「唔使客氣, 多謝我姨姨啦！佢拎咗幾個返屋企, 叫我送俾你地。」當然係臨時吹。




「多謝姨姨。」
「記住見到佢要叫姐姐, 佢未結婚。」毒男都想阿姨快D結婚。
「胡Miss, 你都有份。」毒男又拎一個紅色毛毛耳罩出黎, 遞俾樂兒。
「我都有份？」樂兒完全估唔到。
「我仲有幾個呀, 你鐘意咩色？」毒男又拎綠色同藍色出黎。
「原來張sir知道我鐘意紫色。」美妮原來鐘意紫色。
「我都係, 有黃色。」毒男又撞中。
「咁, 有無深藍色呀？」原來樂兒鐘意深藍色。
毒男即刻伸手入袋, 一邊諗「深藍色」, 一邊答樂兒「當然有啦」
點知時間唔夠, 變左外面深藍色, 裏面係粉紅色。
「嘩, 原來有雙色架！」美妮好似好鐘意喎, 不過毒男就遞咗俾樂兒。
樂兒接住果陣聽到美妮果句, 就話：「你鐘意？俾你啦。」
美妮老實不客氣就拎咗樂兒果個。
「咁樂兒你鐘意咩色？」毒男學識咗打蛇隨棍上。
「有深藍色加紫色就好了。你唔介意俾我揀嗎？」大鑊, 搞到樂兒好似唔好意思咁添。




「好似有, 你等等......」毒男一邊扮搵, 一邊揸住個紫色塞返入袋, 變做雙色。
「有嗱有嗱, 你睇？」毒男順手放個耳罩去樂兒耳邊襯一襯「幾靚。」
美珊又好識做咁話：「胡Miss好靚呀！」
見到3個女孩拎住耳罩好鐘意咁, 毒男覺得作戰勝利, 效果幾好。
點知轉頭樂兒就變個無癮樣出黎「重陽都未到, 有排都戴唔到。」
毒男先醒起, 外面仲係三十度。
點知美妮識幫口「補習社冷氣凍, 我地一齊戴住上堂丫！」真乖！
結果屋企本「胡樂兒百科全書」變多咗一頁：樂兒戴耳罩。
 
「張sir, 你仲唔去接國強佢地？」美珊係清醒得最快果個。
「係喎, bye, 轉頭見。」毒男又遲到。