無錯，其實呢個係一個追女仔的故事: 5. 俾姨姨鬧

無錯, 三十度係戴唔到耳罩。
不過中秋都過埋, 秋風起都唔出奇啦！
毒男決定繼續個surprise。
 
「胡Miss, 出面好凍呀！」明傑一邊搓手臂, 一邊同樂兒講。
「唔係化？三十度都凍, 你發病呀？」美妮一句就得埋黎。
「你出去睇下啦, 成個黃大仙都打冷震。」國強又誇張咗D。
「是但啦, 都返屋企。」美珊仍然好冷靜咁執書包。
樂兒一打開門, 發現真係涼咗好多：「嘩！真係凍喎！」
美妮即刻跑去門口：「正呀 涼浸浸, 仲可以戴個耳罩。」




毒男好滿意咁偷笑。
「胡Miss, 你都記住戴個耳罩走呀。88」
 
終於到收工時間, 6點半。
氣溫仍然係24.5度。
毒男係度鎖門時, 發現樂兒真係有D凍, 打冷震。
毒男心諗「唔通玩大咗？等陣樂兒可能會冷親。」
還好佢仲記得風褸的結構。
「樂兒, 你係咪無帶外套？」毒男隻手仍然插係背嚢入面。
「係呀, 無睇天氣報告, 又估唔到咁早冷鋒到。」樂兒真係好凍。




鬼咩, 背心+短裙+平底布鞋, 連襪都無著。
「唔怕, 我有睇天氣報告。」毒男係背囊入面拎咗一件深藍色風褸出黎。
「唔該哂你呀！」樂兒接過件風褸, 攬在心口, 輕輕微笑「你好細心！」
Yes！加分。
「而？件風褸咁怪既？」樂兒著咗一半時, 發現風褸原來無拉鍊。
......
 
返到屋企, 阿姨又坐係沙發度, 不過今次無打機, 仲要著哂成套衫咁坐係度。
平時明明得件吊帶打底衫。
「雪姐, 咁早呀？」毒男一邊除鞋一邊問。




「你今日就開心啦？」而？阿姨預備鬧人？毒男完全唔知做錯乜。
「你自己睇下？」阿姨遞部手機過黎。係天氣報告。
「你睇下係咩天氣？」好正常喎, 打鼓嶺28度, 屯門29度, 京士柏30度, 黃大仙......24度。
「係人都知有蠱怪啦！你有無用吓個腦呀？」阿姨直頭Linda上身, 起勢篤毒男個暈正。
「唔係喎, 雪姐, 觀塘, 西貢, 赤柱, 筲箕灣, 連啟德都係24度喎, 仲要落雨。」我指住部手機講。
「咁你知我呢半日去咗邊啦, 衰仔！」Linda, 唔係, 阿姨越黎越火。
呢個時候, 阿姨電話響。
阿姨好勞氣咁同電話另一邊講, 慢慢越講就越平靜, 之後仲遞個電話俾毒男「聽啦！」
一聽, 係舅父。
「外甥仔, 係舅父呀, 你闖禍呀係咪？」舅父把聲好溫柔。
「對唔住呀舅父。」毒男深知認錯從來唔會錯。
「放心啦, 我住柴灣。你阿姨係咁架喇, 誰無年輕？」舅父好似好有故事咁喎。
「多謝你呀, 舅父！」毒男深知越浮誇越有效。
「得啦, 等陣app張相黎睇下就ok, 等舅父幫你睇下係咪好女仔。88」舅父, 你係咪醒過龍？定係有千里眼？
舅父收咗線, 毒男又要面對阿姨。




「你兩個都係咁, 有風駛盡艃, 要人執手尾。」阿姨終於笑得出。
「多謝雪姐！」毒男忍唔住撲去攬住阿姨。
「得嗱, 好好地對人啦！」
「其實十畫都未有一撇。」
「咁俾張相黎睇下啦！」
「好, 攬多陣, 一陣睇。」
「咁鐘意攬咩？平時又唔見你攬？做乜今日扮乖仔呀？」
毒男心諗, 其實阿姨都幾好攬喎, 平時做乜唔攬下呢？
心口幾舒服。平時咪仲好？
點解阿姨又無男朋友呢？
搵機會問下舅父。