無錯，其實呢個係一個追女仔的故事: 2. 姨姨 (家姐??) 的話

「恭喜你25歲都無拖拍, 今晚開始可以學魔法」
望住阿姨, 我呆咗。
阿姨只係著住件打底衫, 遞起右手企係度, 成日麥X勞叔叔咁既姿勢。
唔知點解, 仲好以有Effect咁, 齊肩的頭髮仲係度輕輕咁飄飄下, 佢右手上的火焰又係飄飄下。
做乜膠？
 
「呼, 吹完蠟燭, 而家食蛋糕先啦」毒男拎起把刀就切落個蛋糕度。
士多啤梨蛋糕, 阿姨鍾意食士多啤梨, 我淨係食蛋糕同cream。
「喂, 俾D反應好喎？有得學魔法都無反應。」靚女阿姨開始抱怨。
「得喇得喇, 熄咗火機同風扇, 食嘢啦好無？今晚我生日, 我大哂嘛！」毒男開始分蛋糕。


話時話, 明明風筒仲係房, 阿姨D頭髮又乾得幾快喎, 仲飄得起。
阿姨摘咗粒士多啤梨, 一邊咬一邊講：「都好」
順手又塞咗1粒士多啤梨入毒男個口度。
「好凍！乜有冰士多啤梨咩？」
「好唔好食先？」
「約翰問你今晚8點半打唔打機, 你自己online覆佢打唔打公會戰啦」
「食埋先啦, 無咗個控場魔法師, 佢地都好難守到城」
「咁食埋沖完澡打啦, 你online先」
 
沖完澡, 仲抹緊個頭, 行出廳, 有個魔法師係客廳。


無錯, 黑色魔法師帽, 深紫色長絨袍。
差在係拎住膠掃把。
「嘩, 雪姐, cosplay癮起呀你？仲唔login？等陣勇哥打黎催呀！」
阿姨用個掃把頭輕輕一指向毒男, 就有一股風吹過黎。
「我覆咗約翰今晚唔打機 因為要教你學魔法。」
阿姨把掃把打橫一指, 我就飄咗去沙發度, 然後失去意識。
然後就係一個好長既夢。
夢入面, 我見到死鬼老豆老母, 見到一大堆數學公式, 又見到森林火山大海......
打開眼, 已經天光, 仲要係晏晝2點幾。
「死！今日要返工！」毒男即刻撲入房換衫返工。


 
返工, 係毒男最大娛樂，因為有女同事。
因為有樂兒。
 
樂兒係大學year2學生, 土木工程系, 廿二歲。
白白淨, 細細粒, 身材瘦削, 遠睇就似四眼小學生, 所以特別受小學生歡迎, D女仔特別鍾意佢。
不過毒男見過佢除眼鏡一次, 先知道眼鏡原來可以把仙女變凡人。
而七百度近視令到樂兒離不開眼鏡, 所以難怪佢仲係A0。
而今日係星期三, 係毒男同樂兒教同一組, 同埋一齊去學校接學生的日子, 3點鐘出發。
仲有3分鐘。
毒男係條街度跑緊返工, 好奇怪晏晝2點幾條街點解仲咁多人, 明明又曬又熱。
如果有風吹走D人就好, 好跑好多。
突然, 一陣大風吹過, 大風到路人都停低, 仲有人連遮都吹走埋。
做乜鬼？
唔理喇, 返工先, 仲要留時間抹乾淨D汗先返工。


成身大汗見樂兒就唔好啦, 如果天氣凍返D就好喇。
唔係喎, 好似天氣真係涼咗少少喎, 寒流襲港？定係冷氣唔使錢？
總之趕得切返工就OK。
樂兒：「子仁, 覺唔覺今日天氣好舒服？」
毒男：「好似涼返D, 幾好」
樂兒：「咁行喇」
微笑時既樂兒係最靚既。
 
異常順利既一日, 咁就完咗。
返到屋企, 見到阿姨咁早收咗工, 坐係沙發度打機。
「雪姐, 咁早呀？」毒男一邊關門, 邊除鞋時問。
「等你嘛, 咪同老細講唔OT囉」雪姐放低Mouse行過黎。
又係得件打底衫, 搖下搖下咁行。
唉。我大個仔架喇。
「今日點呀, 有無咩特別呀？」雪姐搭住我膊頭問。


「會有咩特別呢？咪又係咁返工放工？」我推開雪姐隻手, 行入洗手間洗手。
阿姨又跟住走入黎：「無理由, 啱啱學識用魔法, 應該會不自覺咁釋放魔力, 放D火呀, 風呀之類嘢出黎喎。」
毒男停低手, 望住阿姨問：「咩料？」
阿姨反問：「無咩？」
毒男答：「咩火呀風呀？講真架？」
阿姨伸隻食指出黎, 又有火出現：「呢D嘛, 你無咩？」
毒男捉住阿姨隻手, 見到真係有火, 用自己隻手指試試, 真係熱喎,
就好驚咁問阿姨：「真係有火架？」
阿姨好認真咁問：「你有無先？」
呢個時間, 屋內颳起一陣風......
水龍頭自動推返落黎, 關咗水。