無錯，其實呢個係一個追女仔的故事: 1. 無拖拍

無錯，毒男的日常係好充實的。

「你家姐又爆咗件+7裝喎」公會友A
「鬼咩, 佢公司出Bonus, 係豪D。」毒男
「咁正？」公會友A
「佢仲掉件套+5裝俾我, 算係咁啦」毒男
......

其實毒男係無家姐, 不過就個大佢兩年既阿姨一齊住, 阿姨成日同人介紹毒男係佢細佬。
 




「好心你返下工啦, 無錢買裝好難搞, 你家姐低你10級都高戰過你」公會友B
「有架, 每日都有返幾個鐘」毒男
「就係補習？夠唔夠食架？」公會友C
「假假地都碩士畢業, 都有300蚊個鐘架」毒男
「咁貴？咁咪成千蚊一日？」公會友D
「…….仲高人工過我……」公會友B
「又唔係日日有工開」毒男
……
「唔傾住, 家姐放工」毒男
一開門, 就見到家姐, 唔係, 係阿姨, 拎咗個生日蛋糕返黎。




「細路, 生日快樂, 25歲大個仔喇！」
 
毒男望住個蛋糕盒, 心諗:
「係喎, 我生日喎」
「雪姐, 多謝你呀」當然要多謝阿姨, 仲記得個姨甥仔生日。
「唔好偷食吓, 我沖完澡一齊食啦」
阿姨一邊講, 一邊除低外套。
無錯, 雪姐雖然係我阿姨, 但只係大我兩歲, 以3D人物黎計都叫有D靚。
只係, 佢成日當我係BB咁, 除淨件打底衫就四圍走……
 




今晚既晚餐就係蛋糕, 因為唔想煮。
「細路, 你有咩生日願望呀？」阿姨成日扮家姐。
好心就著返件衫啦, 雖則幾養眼。
「唔講都得, 因為我有生日禮物俾你。」
而？今年竟然有禮物？
「咁可唔可以點咗蠟燭先呢？雪姐」
「OK」但阿姨唔去拎火機, 反而伸隻右手無名指出黎, 指住枝蠟燭。
「做…乜？」
阿姨隻無名指前面忽然出現空間扭曲, 無錯, 係扭曲, 仲要出煙。
唔夠半秒, 2枝蠟燭都著哂。
「???而???」毒男完全唔明做乜。
搞乜鬼？空手點火？
 
阿姨就左手遞咗個迷你火機俾我「有無見過咁細個火機？」
唓, 原來只係用火機點火。




「生日快樂！大個仔喇, 子仁」阿姨伸手搣我左邊面。
奇怪, 阿姨隻手咁熱既？
「許個願, 吹蠟燭啦」
吹, 毒男吹……吹唔熄。
「俾啖氣吹啦, 吹熄枝蠟燭, 食蛋糕呀」點解阿姨好似忍住笑咁既？
吹, 大力吹, 用力吹, 都係吹唔熄枝蠟燭喎！
「咁渣架, 哈哈哈」
一定有蠱惑。
不過阿姨笑到搖下搖下, 又幾好睇。
「唔玩你喇, 睇住」阿姨遞起隻右手, 伸直5隻手指, 手指頭各變咗1個火機咁大既小火焰出黎。
「恭喜你25歲都無拖拍, 今晚開始可以學魔法」