【喪屍】《逃城》: 真正出發

出發之前，阿二去衣櫃搵左幾件外套比我地一人一件。 

「無咁易比喪屍咬到。」阿二話嘅。 

唔知大叔有冇諗到肥仔，佢無出聲，接過外套就著上身。 

出門口嗰時，B室嘅拍門聲仲持續緊，唔知會拍到幾時先停。 

20分鐘後，我地又翻翻11A。 





係天台，我地確認左迴旋處後有間中學，而且的確操場上一隻喪屍都無。 

但只有大叔可以行左廿幾層樓梯仍然面不改容，我同阿二已經喘曬氣。再行翻三十幾層落樓，我同阿二應該都無氣，如果遇到喪屍都幾難搞，所以最後都係翻11A再休息一陣。

行上又行落之後，阿二嘅面色明顯有啲蒼白，係大叔嘅逼迫下我地分左剩低嘅餅同水食。 

準確黎講，係大叔強烈建議阿二再食啲野，阿二唔肯淨係自己食，所以最後變成三個一齊食。反正大家都唔夠飽，一陣唔夠喪屍打，死左就無命食。 

食完之後，阿二搵廢紙畫左一張簡易地圖，規劃好去中學嘅路線。休息夠之後，我地真正咁出發了。