【喪屍】《逃城》: 出發

「2020年五月。」阿二讀出月曆上嘅時間。

「你地琴日有冇咩擦傷整親？」大叔搵到一個急救箱，攞住膠布、繃帶問。 

「啱唔啱用？」而我就蒐集左𠝹刀、較剪、同廚房嘅刀具。 

大叔幫阿二自己都無察覺到嘅擦傷痴膠布，我望一望自己，應該就無傷口。 

「唔該。」阿二對大叔點點頭。 





「我地跟住點？」阿二望住窗外依然漆黑嘅天空，再補充一句。「我估我地要有心理準備，個天係唔會光。」

由醫院到商場，到呢間屋訓左個教，又食野又搵野，天色都無出現過任何變化。

「出去再搵下有冇其他人？」我攞住手上嘅刀問。

「好。」阿二望住剩低嘅一個杯面、一支水、兩包餅，都清楚留係度唔係長久之計。 

大叔對我地嘅決定亦無異議。休息一晚，我地又要開始征途。 





「但去邊度搵人？」總唔能夠漫無目的咁周圍走。 

阿二走到窗邊，發現間屋係對住個海。 

「我地房個窗可以望到其他樓。」我估阿二想了解下周圍地理環境再做決定，阿二聽完亦即刻走去睡房睇。 

窗外可以見到琴日個商場，商場後面隔左條大馬路，又係住宅區。望側啲，商場隔離有多個係商場，但明顯罨耷好多。遠少少有個迴旋處，再遠就唔係太睇到了。 

「如果你係其他人，無搵到鑰匙，你會去咩地方休息？」阿二問我地。 





「我都唔知，見行見步掛。」大叔答。 

「一啲無喪屍嘅建築物？」我答。 

「你記唔記得，上次係醫院，有啲喪屍著病人衫，有個著醫生袍。」阿二望住我好似諗到啲咩。

「商場嗰隻仲有銀包鑰匙，我地可以推斷，啲喪屍本身係人，然後變喪屍。所以，我地應該要搵一個，呢個地方出事嗰陣無人嘅地方，應該就無喪屍。」阿二分析。 

「琴日間商場係咪落曬閘？個天又咁黑，出事嗰陣應該係夜晚？不過就算商場無喪屍我地都入唔到去。」我提出意見。 

「搵下有冇學校之類？通常得道欄圍住，爬都爬到入去，入面又應該無喪屍。」阿二靈機一觸。 

「好啊。」我點頭。 

「我無問題。」大叔亦點頭。 





「咁一陣上天台睇下邊度有學校啦，呢度唔夠高睇得唔夠遠。」阿二落定論，我地下一站就係天台，之後就去學校。 

都唔知有幾多層，希望行上又行落之後我仲有力氣戰鬥啦。

每人搵個袋裝住可能有用嘅野，急救用品、食物、武器之類，整理好心情我地就準備出發了。