【喪屍】《逃城》: 學校前

天色依然漆黑，四周亦寂靜無聲，彷如一座死城。行係黑暗籠罩嘅路上，不禁有啲心寒嘅感覺。好彩身邊仲有兩個人，我望向阿二同大叔，話比我知係呢個鬼地方，我仲有同伴。 

大堂嘅管理員屍體仍然原封不動咁訓係度，而商場出面嗰堆喪屍屍體同樣。

經過商場嘅時候，大叔都係忍唔住望多左兩眼，畢竟肥仔條屍都係入面。 

「節哀。」阿二突然開口安慰大叔。 

「唉⋯⋯」大叔只係嘆氣，就繼續向前行，無再回頭。 





商場四面分別係住宅區、醫院、同兩條大馬路。順住馬路行左五分鐘，就到左迴旋處，一路上都無咩喪屍。不過係馬路隔住草叢望過去，行去中學嘅行人路上就有三隻呆立嘅喪屍。 

我本身打算好似之前咁，靜靜雞避過就算。

「除非我地保證爬入學校嗰陣一啲聲都無，如果唔係，保守起見都係解決佢哋先好。」阿二一言驚醒夢中人，差啲唔記得我地要入校門，就要爬過鐵閘，啲喪屍距離唔算遠，舉動大少少都好易會引到佢哋。 

不過同商場一戰相比，對方得三隻，我地武器又升級左，應該唔難處理。 

「我出手先，你地睇情況！」大叔講完就自己行左先。 





大叔先潛行到最近嘅喪屍背後，反手一刀捅穿佢嘅喉嚨。再慢慢放低放低佢條屍。全程竟然無引到其他兩隻嘅注意。 

見呢招可行，大叔就繞去另一隻喪屍背後，用同樣方法殺死佢。而淨低嗰隻就比我有樣學樣咁解決左，三隻喪屍無聲無息咁訓係地下。