【喪屍】《逃城》: 下一步

佢之前咁堅持，我仲做好左鬧交嘅準備，點知佢嘆左口氣就決定跟我地走。 

「你地原本打算去邊？」大叔問。

「本身係黎幫阿一搵刀，佢宜家搵到啦。」阿二指住我仲拎住嘅餐刀，再望住我補多句：「大把過手術刀，算有啲用，你洗唔洗執多兩把？」

我默默咁係地下搵多幾把餐刀防身。 

「咁你地即係無下個目的地？」





「係呀，你地原本又打算去邊？同埋點解要打爛玻璃？」 

「我地本身都無咩目標，只係周圍走搵下有冇其他人⋯⋯個細路見到餐廳有刀，咪打爛玻璃想入去攞，點知會引到咁多喪屍⋯⋯」語畢，大叔又望向肥仔嘅屍體，眼神流露出後悔。

係地下執緊刀嘅我，突然發現有隻喪屍身上有個腰包，好奇之下打開黎睇入面有咩。

銀包、鑰匙、紙巾、電話。撳左兩下部電話，係無電嘅。 

「咩黎？」阿二踎低睇我搞緊乜，順手摷下個腰包，大叔都走埋過黎睇。 





阿二摷左張銀行月結單出黎，都唔知點解隻喪屍生前會帶月結單出街。

「戶口得三千蚊？呢隻野生前都幾窮。」而大叔睇完作出係隻窮喪屍嘅評論。 

「呢度有地址。」阿二指住月結單左上角。我同大叔都不明所以。 

「我地仲有鑰匙。」阿二拎起腰包入面嗰串鑰匙補充。