【喪屍】《逃城》: 休息

喪屍以前住嘅屋苑，大叔竟然有印象經過過。連搵路都唔洗，我地直接出發，可以係間屋休息整頓一下。個屋苑正正就係商場隔離嘅住宅區。 

路上經過見到嘅喪屍，只要唔發出聲響，都唔會有任何舉動。順利咁去到屋苑樓下，用銀包搵到嘅住戶證拍卡入到去，先遇到第一隻要打嘅喪屍，係肚滿腸肥嘅管理員喪屍。

變成喪屍通常都會變得比較瘦削，管理員仲睇得出肚滿腸肥，可見生前體態一定好豐滿。 

我地三個人手一對餐刀，大叔二話不說先上前撞低管理員喪屍，可能踩踏面唔夠平整，今次阿二無踩上去，而係直接瞄準喪屍頸猛捅。 

只係對付一隻肥喪屍，所以我就負責睇水。





迅速解決管理員之後，我地就行樓梯上去，好彩隻喪屍唔係住太高，不過11樓其實都好攰。 

終於到門口，阿二提議敲門檢查下間屋入面有無喪屍。

「開門點都會有聲，敲門先，我地可以有心理準備嘛！」

而敲門之後，我地有鑰匙嘅11A室無任何反應，不過隔離嘅B室兩秒之後就出現左拍門聲。同醫院嗰陣一樣，持續嘅機械式拍門聲，根據經驗，唔知佢會拍到幾時。 

「入去先啦，反正係隔離屋，佢出唔到黎，我地又入唔到去。」阿二一邊講，一邊用鑰匙打開11A嘅大門。 





天色依舊漆黑，一無所知咁係一個危險處處嘅地方訓醒，又經歷過逃走打鬥，終於到達一個相較安全嘅地方，大家都覺得攰了。無暇研究呢間屋，我地三個都選擇先休息一下。 

我地本來想讓睡房比阿二訓，畢竟係唯一一個女仔，但阿二睇完床同沙發嘅大細，冷靜如初咁決定自己訓沙發，雙人床比我同大叔訓。