【喪屍】《逃城》: 分歧

「你地得兩個人？不如以後一齊行動？人多始終安全啲。」肥仔係地下閉目休息，仍然係大叔出聲提出邀請。 

而阿二望住渾身係血嘅肥仔，不發一言。

「有問題？」我細細聲問阿二。 

「佢好似比喪屍咬左。」阿二凝視肥仔嘅左手手臂，順住佢嘅目光望過去，的確有一個齒痕狀嘅傷口。 

「比啲野咬左會點？」大叔聽到阿二講嘅說話，都發現到肥仔嘅傷口。 





「我都唔知，但電影入面通常比喪屍咬完都會感染。」阿二搖搖頭答，同時無放低過手上作為武器嘅木凳。 

「但宜家我都無變喪屍！」肥仔本身合埋眼休息緊，聽到即刻啤住阿二。 

「係囉，電影嘅野都無根據，唔通因為懷疑就要殺左個同伴？」大叔即刻附和，似乎好抗拒任何會傷害到肥仔嘅建議。 

「可能無事呢？一齊行住先啦！最多⋯⋯如果佢真係變喪屍先郁手都未遲。」大叔望住我，希望我會企係佢嗰邊。不過阿二救過我，而且我都唔太想放個計時炸彈係身邊，當然係支持阿二。 

「一係唔理佢，一係就我地分開走。」 





「放佢係度同由佢死有咩分別？」大叔皺曬眉，睇黎係揀左分開行。 

「呃！」突然，肥仔怪叫一聲，我地三個睇住佢嘗試坐起身，瞳孔慢慢消失，對眼好似喪屍咁得翻眼白。 

阿二見狀即刻將手上嘅凳揮向肥仔個頭，我執起地上嘅餐刀上前補刀，不出幾秒肥仔喪屍就了無生氣。 

「好啦，唔洗拗！」阿二冷靜如初。 

大叔似乎接受唔到突如其來嘅狀況，面色青白咁睇住幾秒前嘅同伴比佢嘅新同伴殺死。但佢亦都無怪責我地，只係默不作聲握緊拳頭。