【喪屍】《逃城》: 打鬥

肥仔見到我地嘅身影，即刻叫救命，不過我同阿二都無動於衷，咁多隻喪屍，想救都唔知點救。醫院嗰陣得三隻，我地都只係勉強逃走到。 

掉完曬檯凳之後，大叔執起玻璃碎加入戰場，呢個時候，阿二出乎意料咁出左去幫手。 

我地無發出過聲響，所以喪屍完全無注意過背後。阿二輕鬆行到去喪屍身後，高舉路上執嘅大叔頭先掉嘅凳，一野用凳背打落其中一隻喪屍嘅後腦，醫院一幕再次重現。阿二又踩上去喪屍嘅身體上面，用體重壓制住佢，令喪屍起唔翻身。

阿二都出左去，我唯有跟上。學阿二咁用凳打到一隻喪屍趴低，踩上去之後，將凳腳對準佢條頸，大大力中落去。無血花四濺，但係感覺到腳下嘅喪屍停止左掙扎，應該係死左。 

阿二見到我成功打死一隻喪屍，有樣學樣咁對付佢腳下嗰隻，可惜可能女仔唔夠力，中完隻喪屍仲郁緊。我正想上前幫手，但阿二見到一野中佢唔死之後，就發力係咁中，我未幫得切手佢已經成功左。





嗰隻唔好彩嘅喪屍，條頸簡直係血肉模糊。不過阿二一啲女仔嘅矯情都無，仍然係目無表情咁樣，臉上少少驚或者厭惡都見唔到，就走去攻擊下一隻喪屍。 

我同阿二各自解決一隻喪屍嘅時間，局面已經演變成大叔打緊兩隻，肥仔比三隻圍攻。阿二引走左一隻攻擊緊肥仔嘅喪屍，我就去攻擊大叔對付緊嘅喪屍。

同大叔一人一隻之後，唔洗分心避開其他喪屍嘅攻擊，大叔好快就解決左佢嗰隻，我亦用凳腳桶死左我嗰隻。再望翻肥仔嗰邊嘅戰場，阿二腳下嘅喪屍仲掙扎緊，我即刻去幫手。而肥仔似乎係之前嘅打鬥有受到傷，戰況有啲狼狽，訓係地下同兩隻喪屍廝鬥。 

「頂住呀！」大叔一邊叫，一邊衝過去幫手。

幫阿二解決佢嗰隻之後，我地即刻去殺埋肥仔隔離最後一隻喪屍。終於，十幾隻喪屍全部變曬唔識郁嘅屍體。 





「你無事呀嘛！」大叔緊張咁望住訓係地下索曬氣嘅肥仔。 

「無⋯⋯無事，只係太耐⋯⋯無做運動。」肥仔無力咁揮左下手表示自己無事。

「多謝你地幫手！如果唔係我地都唔知點算。」大叔微微向我地鞠左個躬。