【喪屍】《逃城》: 商場

路上有幾隻喪屍分散呆立，我地搵左一個比較遠離喪屍嘅角落，開始討論跟住點好。 

「我地係咪應該去搵下有冇其他人？」 

「你頭先係咪問點稱呼我？我諗到啦，以後你叫阿一，我叫阿二。咁遲啲再見到人就係阿三阿四阿五！幾方便。」阿二一臉認真咁講。 

「⋯⋯你鍾意啦。」 

「搵其他人都緊要嘅，但我地去邊度搵？」 





「我都唔知，你估醫院入面仲有冇人？」 

「有冇人我都唔想再入呢間醫院。一係去商場睇下？你頭先唔係想搵刀咩，商場可能可以搵到就手嘅武器。」阿二示意馬路對面嘅商場。我聽完都覺得幾有道理，就同意左。 

有驚無險咁行到去對面，一開始見到嘅係商場嘅側面。轉彎見到正門之後，間商場竟然係落左閘！阿二比左個眼神我，睇黎入商場搵物資嘅想法要落空。 

「或者可以撞爛舖頭啲玻璃窗爬入去？」我提議。

「你想引曬啲喪屍過黎？」阿二鄙視咁望左我一眼，再指向商場附近六隻喪屍。 





t無奈咁望著啲喪屍，爆玻璃咁大聲，佢哋一定會第一時間發現我地。但突然，嗰邊傳黎玻璃碎裂嘅聲音同打鬥聲，啲喪屍同時望向商場嘅另一邊衝過去。終於發現其他活人！不過淨係我地見到，都有六隻喪屍衝緊過去，嗰邊情況應該頗為危險⋯⋯ 

「去睇下？」阿二問完，無等我答已經行緊，我唯有跟住去。 

同大概十二三隻喪屍打鬥緊嘅係兩個人，一個肥仔，一個阿叔。佢哋打爛左嘅舖頭係一間餐廳，個肥仔手上得兩把餐刀，但只要插到落喪屍條頸，隻喪屍就好似死左咁攤係地。而個大叔就不斷向喪屍群掉啲檯檯凳凳，喪屍唔識閃避，令到每次行到去佢哋附近嘅喪屍都得一兩隻，比肥仔有足夠時間應付。不過呢啲家私掉完就無，最終佢哋都會面臨七八隻喪屍一齊湧上嘅局面。