【喪屍】《逃城》: 離開醫院

「哈⋯⋯頭先⋯⋯哈⋯⋯多謝⋯⋯你哈⋯⋯」
我想道謝，但原來自己都索曬氣。佢明明唔睇好去手術室搵刀呢個舉動，但我無聽佢講出左事，佢竟然不顧安危咁救我。而我嗰陣仲諗緊，如果搵到刀都唔分享比佢，相較之下，我真係一個小人。

「⋯⋯唔洗。我諗過覺得自己安全先救你。」

唔知佢憑咩覺得係頭先個場景，救我係一件安全嘅事。反正最後真係大家都無事，就無謂深究了。 

「係呢，你叫咩名？」

「你叫咩名？」佢反問。 





「我唔記得⋯⋯係呢間醫院訓醒就咩都唔記得。」

「咁點解你會覺得我會記得？」

「⋯⋯」 

原來佢同我一樣，都係失左憶。

「咁可以點稱呼你？」 





「呢度得我同你，你講野一定係同我講架啦，要咩稱呼？」佢疑惑咁望左我一眼。我正想再開口，但佢比我更早出聲。 

「一陣再講啦，離開左呢間古怪醫院先。」 

佢觀察完大堂，發現出面有為數不少嘅喪屍，於是提議經另一道通往停車場嘅門走。雖然唔知停車場咩環境，但大堂咁多喪屍⋯⋯其實都無得揀。 

停車場只有三兩隻喪屍，我地用一用啲車遮擋身影，靜靜雞咁行，比想像中容易就離開左呢個地方。 

係我地出到黎嘅地方，隔離有一間教會，而隔一條馬路就有一間商場，商場隔離係一個住宅區。