夕陽下的飛鵝山道 (完）: 7.誰都有過逝去的年華

一星期後，她又主動約了我，其實我知道，她是為了想我主動帶她去飛鵝山。不過今日有點霧，於是我先帶她去旺角買吃的。

「點呀？而家就帶我黎掃街，掃完去邊度先？」她左手一串燒賣，右手一串魚蛋。

「食完先啦你！」我喝著珍珠奶茶，邊偷望這個吃相可愛又奇怪的她。「啊...」她的甜醬漏了出嘴邊，掉到褲子上。我立刻用手為她拭走下巴快掉下的醬，又拿出紙巾取笑著她：「平時同我講咁多大道理，喺隻game度英明神武既會長大人，食粒燒賣都食到咁。」她臉紅地接過紙巾，剛好與我眼神對上了。「咩呀？」她立即別過臉，我心動的呆了呆，又回過神來：「你睇下你啊...」

我為她拿著魚蛋，忽然看到不遠處是我前女友，與一個比我高大的男生十指緊扣著，邊喝著珍珠奶茶。我猜，這個男生看下去比我更有情趣更幽默，應該更能滿足她吧。一起了五年，她也沒有笑得這麼開心過，大概是現在這個比我好。

「喂！」「喂！林梓傑！！」忽然被一隻手檔在我眼前喚回來。「點呀？」我繼續取笑她，「你見到熟人？」她回頭看了一回，剛好看到拐彎前的他們。「以前校花喎，你前女友？」她真的心水清。「你又知？你冇咩係唔知咁喎...」「同一屆，唔係好多人姐～」她把食物一口口匆匆吃完再擦褲子，又問：「你地幾時散左架？」「散左一年幾。」「你未放低？」我笑了：「放低左好耐啦！放唔低既係，理解唔到愛情關系呢樣野。」





「同你去洗手間先啦八卦為食豬！」我笑她，她皺起眉頭捏我手臂。

我把她載到北角寶馬山看維港兩岸的日落。

「人生 聚散似平常 誰能預料......」

「林梓傑，你架車d歌全部正野喎～別了秋天咁舊你都仲有播。」她和我一起靠在車門，望向風景，車內播放著音樂。風在我們臉上輕輕拍打，金黃色照在我的車上閃閃生輝，別有味道。

「你都中意聽舊歌？」





「嗯。平時最鍾意睇以前香港d電影丶聽下舊歌，同埋中意睇香港文學。」

「我都係。」

「仲有一樣野我好想學好耐...」

「咩呀？」

「影相～」她用雙手形成一個長方框框著當下的美景：「我想去曬呢個世界最靚既地方，影曬d日落！」她單起眼，左度右度。





「其實我學左好多年攝影...」她驚訝地望向我，我淡淡地說：「屋企人話影相佬搵唔到食。佢地想我做專業人士。」她很認真地聆聽著我，看著我：「但我想你教我。」她和我對望著，她說：「我想你幫我影好多好靚既日落。」「我應承你。」