【二月廿九番外篇】《沒有穿越的平行時空》: 第三十五章 留戀
第三十五章 留戀
Ryan聽到這個Yeesa的心聲之後，顯得有點無奈。這個Yeesa似乎很留戀現時身處的時空，如果她真的不願返回原本的時空，那麼屬於這個時空的Yeesa，便永遠不能回來。
Ryan︰「Yeesa，你哋嗰個時空，我對你好唔好㗎？」
Yeesa︰「好好！你永遠對我都係咁溫柔，咁細心，默默咁為我付出。」
Ryan︰「咁，點解，你最終揀咗余家聰？」
Yeesa︰「吓！我都冇揀到佢，係佢唔知點解話佢係我男朋友。我哋到目前為止，都冇拍過拖。」
Ryan心裡很不滿這個余家聰，覺得他利用了2017年不知情的Yeesa，成功塑造了男朋友的角色，還連累這兩個時空的自己，都輸在起跑線。當然，Ryan沒有將這種不滿情緒投射在現時這個時空的家聰身上。
Ryan︰「咁，你答唔答到我，你喺你嘅時空，係咪鍾意余家聰多過我？」
Yeesa覺得Ryan這樣問很奇怪，很直接，但因這個Ryan不是她認識的Ryan，令她反而毫無顧忌地回答這條問題。
Yeesa︰「係！」
Ryan之所以這樣問，並不是執著面前這個Yeesa究竟喜歡誰。他要知道這個Yeesa的心意，對於能否令原本的Yeesa成功回來，起了極大的作用。如果這個Yeesa很喜歡家聰，而那個時空的家聰已經去世，她便會留戀現時處於的這個時空，較傾向拒絕返回原本的時空。
Yeesa︰「係喎，我阿爸點呀？佢依家喺邊？」
Ryan︰「辰叔佢喺呢間醫院，我帶你去睇佢。」
辰叔仍然處於昏迷狀態，但醫生說他很大機會會於這兩天醒來，叫他們在日本多留數天。家聰証實肩胛骨有輕微骨折，也需留院觀察及治療，所以他們暫時會留在札幌。Ryan得到料理長的同意，繼續住在宿舍，Yeesa也跟隨著他。
※※※※※※※※※※
這夜，他們二人實在發生了太多事，安頓好後已是凌晨三時。Yeesa經歷了時空轉移，心情高低起伏太大，根本無可能睡得著。她走出睡房，看見Ryan也睡不著。
Yeesa︰「Ryan，你都係瞓唔著？」
Ryan︰「係。今晚我哋三個人，根本唔會有一個瞓得著。」
Yeesa坐在Ryan旁邊。她偷望Ryan，見他眼有淚光，但強忍著沒有流淚。
Yeesa︰「Ryan，你係咪好掛住你嘅Yeesa？」
Ryan︰「係，我好掛住佢，我驚佢以後都唔會再番嚟，佢可能會被交換去咗你嗰個時空，或者流落喺另一個平行宇宙。而佢亦都有可能就喺你身邊，只不過佢冇辦法同我哋溝通，亦都冇辦法表達自己。」
Yeesa︰「咁我霸佔咗佢嘅肉身，會唔會好衰？」
Ryan︰「你係不由自主嘅，你都唔想。我哋只需要盡快搵到解決方法，希望你可以番返去你嘅時空，我哋嘅Yeesa又可以番返嚟。」
Yeesa想起那個家聰已犧牲的時空，流露出失望的表情。
Ryan︰「我知道你依家諗緊乜，你唔想番去嗰度，因為你最愛嘅家聰、一個肯為你而犧牲性命嘅家聰，已經唔喺度。你要時間去平復，但我相信你一定捱得過，因為喺嗰個時空，仲有我，即係你認識嗰個Ryan，佢會默默咁支持你。」
Yeesa︰「你都未見過佢，你對佢咁有信心？」
Ryan︰「嗰個話晒都係我喎，我對自己好有信心，就算喺唔同嘅平行宇宙，我都一樣會咁鍾意你，咁痛錫你。」
Yeesa︰「你同我嗰個時空嘅Ryan有少少唔同。」
Ryan︰「有咩唔同？」
Yeesa︰「你講嘅嘢骨痺過佢好多。」
二人一起傻笑。在此沉重的時刻裡，他們算是找回一些開心的感覺。
Yeesa︰「不如你講多啲你同你嘅Yeesa嘅嘢俾我聽啦！」
Ryan和這個Yeesa談起了各自在自己的時空、二人相處當中的瑣碎事，他們發現當中有相似的地方，也有完全不同的地方。
Yeesa︰「喺我嗰個時空，我唔識家聰個外婆，而且，我哋嘅Ryan未試過向我發脾氣。睇嚟你哋嗰個Yeesa，同你一齊嘅經歷比較多啲。」
Ryan︰「Yeesa，應承我一樣嘢。」
Yeesa︰「乜嘢呀？」
Ryan︰「你番到去你原本嗰個時空之後，好好咁同嗰個Ryan一齊生活落去。余家聰佢已經犧牲咗，佢係為咗你同Ryan而死，你更加應該去珍惜身邊嘅人，唔好辜負余家聰為你哋所做嘅嘢。」
Yeesa︰「知道喇，我明白㗎！你唔使擔心，我唔會賴死唔走，我哋遲啲一齊同家聰諗下點樣先可以令我可以番去原本嘅時空。」
二人一直傾談到五時，Yeesa才敵不過睡魔，挨在Ryan的肩膊上睡著。
※※※※※※※※※※
隔天，Yeesa和Ryan一同前往醫院探望辰叔。辰叔已醒，但身體狀況仍未穩定，需要多作觀察，才可斷定何時才可返回香港。因為辰叔的狀態不好，他們二人也沒有對辰叔講出Yeesa現時的情況。然後，他們去探望家聰。
家聰的骨折情況只是輕微，不需動手術，固定好肩膊和手臂後，其實今日稍後時間便可出院。他們在病房裡討論這個Yeesa的事。
家聰：「我琴晚諗咗好耐，現時可以試嘅方法，就係借助御守嘅力量，再做多一次合十嘅動作。我唔知道係咪一定要等一年，即係2021年2月28日先可以再做一次時空轉移，但我哋依家喺北海道，我哋可以多啲嘗試，猶其喺神社嗰度，係最具靈氣，亦係Yeesa出世、佢媽咪過身嘅地方。」
Ryan︰「係，我同意。」
家聰：「Yeesa，不如你依家就試吓就合埋雙眼，合十祈禱，祈求御守可以將你帶番去你嘅時空啦！」
Yeesa沒有回應家聰，顯得有些難言之隱。
Ryan昨晚和Yeesa談了好久，明白Yeesa的心意。雖然Yeesa不再留戀這個時空，但她就這樣子返回原本的時空，去接受那個殘酷的事實，Yeesa仍顯得有所猶疑。
Ryan︰「不如咁啦余家聰，趁依家喺北海道，你就同呢個Yeesa相處多啲啦，好好咁過埋呢兩日先，之後我哋再一齊去神社。」
家聰明白Ryan意思。他覺得這事情也不急於一時，因為方法如果有效，任何時候也可以將這個Yeesa送回原本的時空。如果真的要多等一年，那麼更不需要著急。
在接下來的兩天，這個Yeesa和家聰一直單獨相處，走遍札幌多個角落。Yeesa慶幸自己還有機會和家聰相處，非常珍惜這短短的兩天。
※※※※※※※※※※
兩天過後，Yeesa已經有了心理準備，是時候要離開這個時空。他們三人一起前往多賀神社，即Yeesa的出生地，希望藉著神社對Yeesa的獨特靈性，以及御守的力量，能帶這個Yeesa返回她的時空，以及將原本的Yeesa帶回來。他們還特意選擇半夜12時、亦即Yeesa之前多次穿越的時間進行這次時空轉移。
23:56,57,58,59……