【二月廿九番外篇】《沒有穿越的平行時空》: 第二十九章 調查
第二十九章 調查
Yeesa︰「阿爸，我有冇眼花呀？你竟然飲茶？」
辰叔：「好出奇咩？你刷完牙出嚟一齊飲啦！」
Yeesa梳洗後，坐在辰叔旁邊，看著辰叔泡茶的模樣。
Yeesa︰「你飲抹茶㗎咩？」
辰叔：「以前同你死鬼阿媽喺北海道生活嗰陣，我成日都飲，你阿媽好鍾意飲㗎！」
Yeesa見父親主動提起母親，立即喝下父親剛剛泡好的抹茶。
辰叔：「你阿媽死咗之後，我都冇好好飲過茶，淨係掛住飲酒，唉！我今次真係想戒酒！」
Yeesa︰「我叫你戒酒叫咗十幾廿年，你都唔肯戒，做乜你無端端咁有決心要戒嘅？」
辰叔：「因為Ryan囉！」
辰叔指著旁邊的速遞包裝紙。
辰叔：「啲抹茶粉係Ryan特登喺北海道速遞俾我，人地未喺嗰邊安頓好，就即刻將抹茶粉寄過嚟，我點好意思唔飲呀！」
辰叔再次拿起茶杯，細味抹茶的甘香。Yeesa看見父親這個模樣，比起他醉醺醺拿起酒樽，帥何止千倍。
辰叔：「唔知點解，呢個後生仔講嘅嘢真係特別啱聽，佢話你最放唔低嗰個係我，叫我戒酒，仲怕我冇動力戒，寄埋茶俾我。」
Yeesa沒有回應，只是暗地裡非常感激這個比自己更懂父親的人。
辰叔：「女，你覺得對你最重要嘅人，係邊個？」
父親很少會主動講這些話題，霎時有些手忙腳亂。
Yeesa：「咪就係你囉！」
辰叔：「講呢啲！你知我問乜㗎！」
Yeesa︰「我唔識答呀阿爸！」
辰叔：「一早都知你會咁啦，成日都唔嗲唔吊。我好肯定，如果我問Ryan相同嘅問題，佢一定會答係你。」
Yeesa︰「阿爸，我……」
辰叔：「我冇咩特別意思。唔講喇，我去看鋪。」
Yeesa沒想到Ryan已開始影響她身邊的人，開始不自覺地融入了她的生活。可能以前Ryan還在香港的時候，Yeesa覺得所有事情都是理所當然，所以沒有好好珍惜過。
※※※※※※※※※※
Yeesa回到神聖幾何，和他們開會討論上次去札幌的調查結果。
家聰：「我哋第一樣確定到，就係Yeesa所有喺閃影當中見到嘅影像，所在嘅地方，全部都係真實存在，包括第一次見到新聞報導嘅PARCO、同我初次見面嘅上白石橋、休息嘅酒店、被Ryan所救嘅路面電車站，以及Yeesa出生地多賀神社。」
跳掣：「之後我哋去多賀神社了解，Yeesa見番喺閃影入面見過嘅巫女。巫女同Yeesa解釋番同另一個平行宇宙差唔多嘅內容俾Yeesa聽。但係，最神奇嘅事就喺多賀神社出現。」
Alien︰「究竟發生啲咩事？」
跌掣：「我哋同巫女傾完之後，本來諗住離開，點知Yeesa突然有一啲好強烈嘅感覺。」
Yeesa︰「係，一種好難形容嘅感覺，雖然唔係閃影嘅畫面，但之前喺香港從來都未試過。家聰建議我攞住御守，雙手合十，我嘅閃影畫面全部番晒嚟！」
家聰：「可能呢個係Yeesa嘅出生地，同時又有Yeesa媽咪嘅御守，所以激發到Yeesa再次閃起畫面，而且今次係完整嘅畫面，分別係由2017、2018同2019穿越去2020年嘅所有畫面。呢個資訊令我哋更加了解嗰個平行宇宙究竟發生啲乜。我將所有穿越嘅總結，寫晒落黑板上面。」
神聖幾何的黑板上，寫著以下的資料：
「2017年2月28日@香港→2020年2月29日@北海道
穿越點：路面電車站
事件流程：被Ryan所救→入院→Ryan離開→Yeesa逃離醫院、撞見香川→被家聰所救→得知自己穿越到2020年北海道→到酒店休息→940920→家聰離開→Yeesa聽到門鐘聲→Yeesa在札幌閒逛→晚上PARCO附近看見新聞報導→23:59見到另一個自己→返回2017年香港
2018年2月28日@香港→2020年2月29日@北海道
穿越點：澡堂
事件流程：Yeesa逃離澡堂→被困香川貨車內→早上逃離貨車→到便利店求證時間→到酒店確認見到去年的自己→網吧休息→FB得知Fiona死→打電話Jonathan求證→電視看見新聞報導、看見貨車獅子狗公仔→返回2018年香港
2019年2月28日@香港→2020年2月29日@北海道
穿越點：戶外雪地
事件流程：網吧留宿→啤酒廠見到去年自己從香川貨車逃走→倒粉入貨車油缸→多賀神社和巫女談話→晚上看見香川仍駕駛貨車→餐廳內看見新聞報導→意外現場見到自己手帶和家聰→返回2019年香港」
眾人慢慢咀嚼黑板上所寫的所有內容。
巴西龜：「邊個係香川？」
家聰：「香川係一個好重要嘅人物，應該係造成交通意外嘅罪魁禍首。平行宇宙嘅Yeesa，佢三次穿越都見到香川。今次我哋成功調查到佢。」
家聰拿出香川的相片，繼續報告調查到的資料。
家聰：「佢全名叫香川二郎，北狐狸啤酒廠嘅散工司機，返朝九晚九，居無定所，會喺唔同嘅網吧留宿，每朝早會去醫院探患病嘅兒子。嗰個Yeesa喺第一次穿越時，由醫院逃走嗰陣，撞過佢一次；第二次穿越時直頭被困香川嘅貨車裡面；第三次穿越時Yeesa倒粉入香川貨車嘅油缸，好明顯係想阻止香川開車，但最後都係阻止唔到意外發生。」
巴西龜：「如果冥冥中真係有主宰，咁我哋除咗要唔俾Yeesa再去札幌，同埋要確保Ryan喺2月29號前返嚟香港之外，仲要留意呢個香川喎。」
家聰：「係。如果Yeesa命中注定要去札幌，Ryan又冇返嚟香港，我哋就要留意呢個香川嘅一舉一動。我哋搵到香川個仔住嘅醫院，同埋佢返工嘅時間同地點，我哋再去搵佢嘅難度唔高。不過，我哋發現咗一樣好重要嘅嘢。」
耶穌：「係咩？」
Yeesa︰「我哋懷疑意外死亡嗰個人唔係我，係Ryan！」
大家都覺得驚訝，因為一直的調查都是Yeesa出意外。Yeesa說出她覺得Ryan會出意外的原因。
耶穌：「如果Ryan自己嘅手帶keep咗喺香港，Yeesa嘅手帶又鎖喺香港，唔帶去札幌嘅話，咁出意外嘅機率又會降低。」
跳掣：「我哋依家只係可以做到將出意外嘅機率減到最低，不論係Yeesa又好Ryan又好，我哋都唔想佢哋有事。」
家聰：「其實，仲有一個unknown，我暫時解釋唔到。」
巴西龜：「係咪呢個呀？」巴西龜指著黑板上、第一次穿越時最後的「23:59見到另一個自己」。
家聰：「係，因為2018同2019嘅Yeesa，喺23:59嘅時候，一個喺網吧，一個喺意外現場。而2020年嘅Yeesa，不論係死亡定係重傷，都肯定唔會喺電視塔附近正正常常地出現。所以2017年嘅Yeesa，佢喺電視塔附近見到嘅嗰個Yeesa，我都諗唔到係邊個。」
關羽：「莫非我哋嘅Yeesa，有咗御守之後，遲啲會識得穿越去嗰個平行宇宙？」
家聰：「我有咁諗過，但唔啱logic，亦都冇咗一向嘅規律。呢樣嘢要再研究。」
※※※※※※※※※※
時光飛逝，轉眼間已到了十二月。一切都好像沒有變化，他們三人的關係都沒有改變。Ryan仍然在札幌努力地工作，料理長也非常看重他，知道他整玉子燒還未到家，多次在他面前示範及指導，希望他有所改進。
每次Ryan想起Yeesa，他都會去一處叫「紅磚廳舍」的地方。Ryan每次來到這地方，所有的煩惱也能一掃而空。今晚，Ryan也來到這裡，拍下相片並post上IG，caption是「洗滌心靈，忘卻一切煩惱」，Yeesa看到相片也有給like。
至於Yeesa，她仍有一半時間在書店幫手，另一半則陪伴著辰叔。文具鋪沒有新租客，業主讓辰叔繼續短租鋪位，暫時也能維持營業。
又到一年一度的聖誕節，Yeesa今年決定和嘉嘉Fiona慶祝，三姊妹在嘉嘉家裡開小型party。大家都喝了酒，有少許醉意。
嘉嘉：「Yeesa，你講，你究竟鍾意邊個多啲？」
Yeesa︰「又講呢個話題？我冇諗好耐喇！」
Fiona︰「你呃人，你會忘記到Ryan咩？你會忘記到余家聰咩？」
Yeesa︰「我依家過唔過到出年生日都未知，又未知Ryan會唔會有事，我唔會再諗呢樣嘢喇！」
嘉嘉：「咁過咗2月29號之後呢？你覺得你到時會揀到咩？到時你又有藉口，又再拖延，我太了解你。」
Yeesa沒有理會嘉嘉，一邊繼續喝酒，一邊獨自看手機。他看到Ryan在facebook被tag，標注他的人是一位女生，看來樣子很漂亮。相片是該女生和Ryan的自拍照，很明顯是在Ryan工作的壽司店拍攝的，Ryan在bar枱後整壽司的位置，相片caption是「咁都會喺札幌撞到你，真係有緣😘」。
Yeesa看到這個post，有些不開心的感覺。Fiona留意到Yeesa的樣子有些不妥，立即搶去Yeesa的手機。
Fiona︰「同我哋傾偈都掛住玩手機，睇咩睇到入晒神？」
Fiona和嘉嘉見到Ryan被tag的那張相片。
嘉嘉：「呵呵，原來係有人呷醋，見到Ryan同第二個女仔自拍。」
Yeesa︰「我邊有呷醋，我都話冇理呢啲嘢好耐！」
Fiona︰「睇吓留言講咩先。噢，睇嚟呢個女仔應該係Ryan嘅前度，你睇吓呢個人嘅留言寫『再續前緣咁話喎』。」
嘉嘉：「個女仔打字就打字啦，仲要整個心心emoji，擺到明仲係冧Ryan啦。嗱，都話你唔嗲唔吊㗎啦，攪到Ryan翻啅前度，唔理你喇！」
Fiona︰「咁Ryan都係俾人tag，睇張相都係被動嗰個，係個女仔高調咗啲，好明顯想再續前緣，可能Ryan心裡面都仲有Yeesa呢！」
嘉嘉：「Yeesa，你快啲打俾Ryan，話你真係好鍾意佢啦，如果唔係就會俾呢個『進擊的前度』搶走Ryan㗎喇！」
Yeesa︰「痴線，唔同你哋講喇！」
Yeesa似乎真的被嘉嘉她們說中了心事，她真的有點兒呷醋，但她不知道自己可以做甚麼。她終於明白Ryan當時知道她會跟家聰去札幌時，為何會有無奈的感覺，因為見到自己喜歡的人和其他異性朋友太接近時，真的會有呷醋的感覺。
Yeesa當晚鼓起勇氣，用whatsapp打電話給Ryan。其實自從Ryan向Yeesa表示自己買了回程機票之後，二人已沒有再聯絡。Ryan比較冷淡，因為他真心想退出，不想Yeesa夾在他和家聰之間，所以一直都沒有再主動聯絡Yeesa。
Ryan︰「Yeesa。」
Yeesa︰「Merry Christmas！」
Ryan︰「Merry Christmas！做乜無端端打俾我呀？」
Yeesa︰「打俾你要理由㗎咩？」
Ryan︰「我真係會2月29日之前返嚟香港㗎，你放心啦！」
Yeesa︰「知道喇，我都唔係講呢樣嘢。」
Ryan︰「你最近點呀？我見你IG都冇乜po相。」
Yeesa︰「冇特別嘢咪唔po囉，點似得你喺札幌咁開心，周圍去。」
Ryan︰「OK啦，我有幾年冇去過旅行喇，難得嚟到札幌梗係要周圍行吓啦！係喎，你都未講番上次你嚟札幌查到啲乜。」
Yeesa將上次跟家聰和跳掣在札幌查到的事，跟Ryan一一說起。
Ryan︰「北狐狸啤酒廠嘅香川？我識佢㗎喎！」
Yeesa︰「吓，真係？」
Ryan︰「係呀，我哋壽司店有入呢隻啤酒，大部分時間都係香川先生送貨。原來佢就係喺另一個平行宇宙撞死你或者我嘅人！」
Yeesa︰「佢係一個點樣嘅人？」
Ryan︰「冇乜特別，有禮貌，有笑容，同埋我哋知道佢有個有長期病患嘅仔，所以香川先生經常要出入醫院。」
Yeesa︰「同我哋查到嘅一樣。」
Ryan︰「我會喺嚟緊呢兩個月，留意佢多啲。」
Yeesa︰「好。Ryan，好多謝你，全靠你，我阿爸先成功戒到酒。」
Ryan︰「咁咪幾好囉，一切都會向好嗰方面去走。我始終相信我自己嘅信念，唔同平行宇宙嘅結局可以完全唔一樣。
Yeesa︰「Ryan，我仲有嘢想同你講。」