【二月廿九番外篇】《沒有穿越的平行時空》: 第二十八章 了解
第二十八章 了解
Yeesa和Ryan相約在他們住所附近的公園見面。
Ryan︰「點呀，查唔查到啲咩呀？」
Yeesa︰「查到，仲俾我見到好多嘢，呢啲遲少少再同你講。前幾日我見到芷晴喺IG po咗你彈結他張相，我想問，你係咪有一條同你送俾我嗰條一模一樣嘅手帶？」
Ryan聽到Yeesa這樣說，才記得自己當時正戴著手帶彈結他。
Ryan︰「係，當時我係整多咗一條俾自己。」
Yeesa︰「原來我一路諗嘅嘢係錯咗。」
Ryan︰「你可唔可以講得清楚啲呀？」
Yeesa︰「另一個平行宇宙，死喺札幌交通意外嘅人，可能係你，唔係我！」
Ryan︰「吓！」
Yeesa︰「我一直以為，新聞報導影住嘅係我，又寫住有外國人死，所以好自然就想像到自己喺意外入面死亡，但從來冇人求證過係唔係。我哋喺度諗，如果另一個平行宇宙嘅Yeesa，喺2019年去2020年嘅嗰次穿越當中，見到意外現場有手帶，咁佢一定會除低佢，就算到咗真正嘅2020年，嗰個Yeesa真係咁橋喺札幌，佢都唔會戴條手帶。」
Ryan︰「你意思係，留喺意外現場嗰條手帶，係我嗰條，唔係你嗰條。」
Yeesa︰「係。」
Ryan︰「我後日出發，照道理應該會喺出年2月中就滿半年……」
Yeesa插咀說︰「你係咪肯定2月29號之前會返嚟香港？」
Ryan︰「我唔肯定，公司講過，如果我喺嗰邊表現好，可能會延長實習嘅時間……」
Yeesa再次插咀︰「雖然我咁樣講好自私，但係你可唔可以唔好延長實習嘅時間呀，二月中就返香港！」
Ryan︰「我好難答到你呢個問題，半年後發生啲咩事，我都唔確定。」
Yeesa︰「馬智浩，我唔想你有事，你可唔可以好肯定話俾我聽，你唔好延遲返香港呀？」
面對Yeesa的要求，Ryan真的不知如何是好。其實現在簡單回答Yeesa「不會延遲」，便可釋除Yeesa現時的擔憂，但自己真的難保半年後所發生的事，到時反口說延遲，只會令Yeesa更加擔心。而事實上，Ryan非常珍惜今次實習的機會，如果真的有機會，他也想多些時間留在日本。
Yeesa看見Ryan遲疑不決，心裡越來越擔憂。Yeesa不想Ryan有事，想確保Ryan在2月29號當日不在札幌，但見Ryan很想留在札幌工作，Yeesa自己也越來越緊張。
Ryan︰「其實我想講，我套用番我之前嘅諗法，另一個平行宇宙所發生嘅事，未必會喺我哋呢度發生……」
Yeesa︰「Ryan！」Yeesa緊緊地擁抱著Ryan。
Yeesa︰「我鐘意你！」
這句是Ryan一直想從Yeesa口中聽得到的說話，但在此時此刻才聽到，對Ryan來說，真的百感交集。
Yeesa︰「馬智浩，我唔想你有事，你應承我，2月29號之前一定要返到嚟香港，好冇？」
Ryan放開了Yeesa的手，對著她說：「張麗紗，我應承你，出年2月29號之前，我一定返嚟香港，唔會留喺札幌，手帶我都唔會帶過去。不過……」
Yeesa︰「不過咩呀？」
Ryan︰「你唔需要講一啲唔係你心裡面嘅說話。如果呢句說話，係喺我之前同你表白嘅時候聽到，我會好好好開心。但事到如今，我唔想你因為擔心一個朋友嘅事，而迫自己講呢啲說話，咁樣實在太委屈你喇。『鍾意』係唔可以亂講㗎！」
Yeesa︰「我……」
Ryan︰「我諗得好清楚㗎喇，家聰先係一個真心為你好嘅人，你就唔好再諗咁多，一心一意同佢喺埋一齊啦！」
Yeesa完全估不到Ryan會有如此回應，她一時想不到要講甚麼。
Ryan︰「夜喇，返屋企喇。你都唔好諗咁多喇，總之出年嘅2月29號，我同你呢兩個最有機會出意外嘅人，都留喺香港，咁就唔會有意外啦！」
Yeesa點頭表示同意。
※※※※※※※※※※
Ryan終於到達札幌，在日本總店裡實習。由於他懂日文，適應完全沒有問題。料理長為Ryan定下第一個目標，就是要做好玉子燒。
Ryan覺得所有事情都很巧合。在另一個平行宇宙，Yeesa在第一次穿越時，吃過未來Ryan為她做的玉子燒，令本身不懂整玉子燒的Ryan，努力學習去整。如今到札幌實習，第一樣要學的就是玉子燒，可以這樣說，世上很多事情，真的冥冥中有主宰。
Yeesa自從由札幌返回香港，並得知出意外的可能是Ryan之後，擔心的情緒比之前更強烈，寧願出事的是自己。她只想確保Ryan一定要在2月29日前返回香港，多次經whatsapp提醒Ryan。Ryan知道Yeesa很緊張這事情，為了釋除Yeesa的疑慮，他特意買了一張不能更改、在2月15日起飛的回程機票，並將電子機票的影像send給Yeesa，才令Yeesa安心。
解決了Ryan可能會出意外的事情之後，Yeesa還有其他心事，於是決定在三人的閨蜜聚會之中，向Fiona和嘉嘉傾訴一下。
Yeesa︰「你哋嘅手信呀！」
嘉嘉︰「多謝，但我哋主要唔係要手信呀！」
Fiona︰「係，你同余家聰一齊去旅行，感覺點者？係咪好開心者？」
Yeesa︰「小姐，我哋去札幌唔係玩㗎，真係去調查我閃影嘅事㗎！同埋有跳掣一齊，唔係得我同家聰㗎！」
嘉嘉：「我就唔信你同余家聰冇獨處嘅機會。」
Yeesa︰「咁，又真係有嘅，好明顯係跳掣特登去鋪排。」
Fiona︰「睇你個樣，好似唔係好enjoy喳喎！」
Yeesa︰「初時我好期待㗎，第二晚嗰陣，突然落咗一場雨，我同佢擔住同一把遮，我翹住佢隻手，兩個人一齊喺札幌街頭雨中漫步，好浪漫㗎！」
嘉嘉：「跟住呢？」嘉嘉和Fiona很有興趣聽Yeesa和家聰的事。
Yeesa︰「之後……可能有時佢好想為我解決問題，但佢講嘅嘢太深，有時我跟唔到，佢語氣會重咗。可能我真係太蠢掛！」
嘉嘉：「哦，原來係不解溫柔，咁呢方面確係Ryan好啲嘅！」
Yeesa︰「仲有好多細微位，我唔知點講，有啲忽冷忽熱嘅感覺囉。原本我以為自己會好受落，但隨住相處時間越來越長，我期待同佢一齊嘅感覺，冇之前咁強烈。」
Fiona︰「因了解而分開。」
Yeesa︰「都冇一齊，分咩開呀？不過有次係我衰，家聰陪我去買手信，佢同我講緊嘢嘅時候，我掛住睇手信，我仲要衝口而出，同佢講咗句『呢個壽司鎖匙扣，Ryan一定鍾意』。」
嘉嘉：「哈哈，係我就即刻黑面走人啦！」
Yeesa︰「嗰一下我覺得我傷透咗家聰嘅心，唉！仲有，我好似傷透埋Ryan個心。」
嘉嘉：「做乜咁講，Ryan同你講咗啲咩？」
Yeesa︰「我覺得我個心好亂呀，唔知點講。」
嘉嘉：「Ryan係咪同你講佢選擇放棄你？」
Yeesa︰「你點知㗎？」
Fiona︰「睇嚟你知道啲我哋唔知嘅嘢喎！」
嘉嘉：「你去咗北海道之後，Ryan搵過我。佢直接問我知唔知你鍾意邊個多啲，我咪答佢你合埋眼嗰陣諗起嘅係家聰囉！」
Fiona︰「又唔多似係Ryan嘅作風喎，佢唔等都等咗兩年啦，冇理由一知道你鍾意家聰多啲，佢就即刻選擇放棄。」
嘉嘉：「我都咁認為，其他男人可能已經一早放棄咗，但Ryan似係一個長情嘅人。但係當時Ryan俾我嘅感覺係佢一早已有放棄嘅打算，佢問我只係想增強佢呢個信念。」
她們三人傾談到這裡，似是沒有結論，大家準備轉換到另一個話題之際，Yeesa突然再次提及Ryan。
Yeesa︰「其實，我喺Ryan臨去札幌之前，同佢表白咗。」
Fiona、嘉嘉︰「吓！」
Yeesa︰「我哋查到Ryan可能係出年2月29號喺札幌出意外嘅人，但Ryan佢有可能喺嗰日未返得切嚟香港。我唔想Ryan有事，情急之下，我同佢講我鍾意佢，希望佢肯聽我講。」
嘉嘉：「你唔係嘅話，就唔好亂講喎呢啲嘢！」
Yeesa︰「我承認係我衝口而出，但我覺得我係講得好自然，冇一時衝動，亦都冇後悔講過呢句說話。」
嘉嘉：「你同Ryan嘅timing真係錯晒，整定㗎！算啦你，都係嗰句，你都係等到出年2月29號之後先再算啦！」
※※※※※※※※※※
Yeesa回家後，在手機的IG觀看Ryan最近post的相。Ryan已到札幌一個多星期，看來他很喜歡在當地實習的生活，post相的數量很多。雖然這段時間，他們二人沒有正式聯絡過，但Yeesa看見Ryan開心的樣子，她也同樣感受到這種開心的感覺。
Yeesa拿出紙和鉛筆，開始畫出Ryan的掃瞄畫像。她閉起雙眼，全是Ryan的畫面，很快她便完成，並將Ryan的畫像貼在房間書枱位置。Yeesa知道，她對Ryan的愛意，比以前越來越深。
早上醒來，Yeesa離開睡房，看見父親在客廳，被父親的舉動嚇壞。