【二月廿九番外篇】《沒有穿越的平行時空》: 第三十章 香川先生 --- 2020年
第三十章 香川先生
Yeesa︰「Ryan，我仲有嘢想同你講。」
Ryan︰「夜喇，我呢度成一點鐘，我朝早要五點起身，遲啲再傾啦。」
Yeesa︰「咁好啦，遲啲再傾，拜拜！」
很明顯，Ryan想逃避Yeesa。Ryan既然選擇了退出，他便不會讓自己再次介入Yeesa和家聰之間的關係，至少在明年2月29日前，他希望彼此之間的關係維持不變。
翌日，Yeesa來到神聖幾何，一來想探探Atma，二來想向他們匯報Ryan會幫手在札幌留意香川的事。
基地之內，暫時未有任何一人。Yeesa有他們的鎖匙，她自己開門進來，先和Atma親近一番。
Atma突然甩開了Yeesa，跳向巴西龜的那部測謊機。Yeesa大為緊張，生怕Atma這一跳會踩壞機器。測謊機之前已經壞過一次，經巴西龜修理後，現在應該運作如常。
Yeesa嘗試開啟測謊機，幸好機器能被啟動。Yeesa隨意說了一句「今日天氣好好」，測謊機成功顯示真心話。Yeesa再講一句「Atma你一啲都唔可愛呀」，測謊機顯示講大話，証明測謊機的運作應該沒有問題。
Yeesa望著測謊機，想起去年聖誕，在神聖幾何這裡開聖誕party的時候，自己對測謊機講過的說話。當時她說過「我唔鍾意Ryan」，測謊機顯示講大話，這也是Yeesa第一次確認到，自己是真心喜歡Ryan。
Yeesa想再次確認自己現時的心意，她開始了與測謊機的交流。
「Ryan去咗札幌咁耐，我已經冇再掛住佢。」測謊機顯示講大話。
「我見到佢同前度影嘅合照，我冇唔開心。」測謊機顯示講大話。
「上次我同Ryan表白，係出於真心，唔係因為想佢應承我要早啲返嚟香港。」測謊機顯示真心話。
「我……依家仲係……好鍾意Ryan。」測謊機顯示真心話。
Yeesa攤在梳化上，慨嘆為何在Ryan選擇退出的時候，才知道自己真的很喜歡他。
此時，家聰已回來基地。他在遠處看見Yeesa對測謊機說話，所以靜靜地偷聽Yeesa。Yeesa最後問的兩句，家聰都聽得很清楚。
正當家聰想現身之際，Yeesa再次向測謊機說話。
「余家聰對我，都一樣咁重要。」測謊機顯示真心話。
Yeesa嘆了一口氣，心裡再次感到鬱悶。
家聰聽到Yeesa這句真心話，他感到欣慰。上次札幌之旅，他知道自己和Yeesa並不合拍，處事有分歧的地方。家聰無意改變自己，他覺得雙方不應盲目遷就對方，幸好自己的表現沒有令Yeesa反感。
家聰：「咁早就上咗嚟喇？」
Yeesa︰「吓，係呀！」Yeesa看見家聰回來，面露少許驚慌的樣子。後來她知道自己的說話沒被家聰聽見，才放下心頭大石。
※※※※※※※※※※
這段時間，Ryan一直有留意香川先生，想嘗試了解他。有一晚，香川晚了送啤酒來壽司店，Ryan熱心地問他甚麼原因遲來，他直認最近兒子的病情比較反覆，剛剛有些特發事，去了醫院一趟。Ryan問香川可不可以去探望他的兒子，香川非常感激Ryan關心他兒子，一口答應了Ryan。
某日Ryan陪同香川到醫院探望他的兒子慎吾，Ryan特意買了公仔和玩具給他，慎吾非常高興。慎吾很喜歡Ryan，Ryan答應慎吾會多些去探望他。
探病後，Ryan要回壽司店，請求香川載他，香川答應。Ryan一直留意香川先生駕車時的模樣，發覺他駕駛得非常穩定和小心，而香川先生會醉酒駕駛的機會也很低，因日本對酒後駕駛的罰則很重，監禁會直接毀掉自己和兒子的生活。
晚上，Ryan決定打電話給Yeesa。準備撥號之際，他又停止了撥號。除了不想再找Yeesa之外，他覺得將事情直接和家聰講，會更有幫助，於是他改為打給家聰。
家聰：「喂，Ryan？」
Ryan︰「余家聰，想問你少少嘢。」
家聰：「你問啦。」
Ryan︰「另一個時空嘅交通意外，發生喺夜晚幾點鐘？」
家聰聽見Ryan問交通意外的事，好像立即鬆了一口氣。
家聰：「大約係夜晚10點鐘左右，新聞報導係大約10點半播出。」
Ryan︰「你查唔查到意外地點喺邊度？」
家聰：「北海道大學附屬大學醫院附近嘅十字路口。」
Ryan︰「北海道大學醫院？係香川先生個仔住緊嗰間醫院。」
家聰：「係。」
Ryan︰「香川先生佢每朝都去醫院探佢個仔，我今朝有同佢一齊去探病。基本上香川駕駛態度良好，而且經濟有壓力，佢唔會貿貿然危險駕駛。佢亦都唔會夜晚十點揸住架貨車，正常佢送完啤酒，夜晚九點前一定會將車揸番去啤酒廠。」
家聰：「你認為香川因為佢個仔嘅事，所以夜晚十點鐘會揸住貨車喺醫院附近出現？」
Ryan︰「係，之前佢曾經試過一次送啤酒遲到，都係因為佢臨時有事要去醫院睇佢個仔，佢個仔最近嘅情況，可能比較反覆。不過，就算2月29號嗰晚佢個仔突然有事，佢要趕去醫院，我覺得佢都唔需要危險駕駛，因為佢平時送貨嘅地方、啤酒廠同醫院嘅距離，都係一個鐘內可以到達嘅範圍。我懷疑佢有第二啲原因，促成另一個平行宇宙嘅未來出現呢個意外。」
家聰：「我會再諗諗。Ryan，唔該晒！」
Ryan︰「我聽你講唔該，有啲唔慣。我都唔想Yeesa有事，亦都唔想自己有事。再聯絡啦，拜拜！」
※※※※※※※※※※
踏入2020年，生活仍然不變。Yeesa已做了很多以前一直很想去做的事，也多花了時間陪伴身邊的人，她已預備好迎接2月29日的來臨。
今天是2月14日情人節，沒有情人陪伴的Yeesa，本想找嘉嘉食飯，但嘉嘉竟說有約，無奈的Yeesa唯有早些回家休息。其實Yeesa覺得今天沒人陪也不要緊，只要明天2月15日、即Ryan實習期完結回港的一天，看見Ryan在香港，她已經心滿意足。
她在回家的路途上，撞見家聰的外婆。
家聰外婆：「麗紗，今日情人節喎，做乜唔係陪家聰出街㗎？」
Yeesa︰「婆婆，我……我哋夜啲會出街㗎！」
家聰外婆：「哈哈，唔使再瞞住我喇，你哋根本冇拍拖！」
Yeesa︰「婆婆，你講咩呀！」
家聰外婆：「唉，你哋點逃得過我對法眼，婆婆我都有後生過，點會睇唔出你哋係假扮吖。麗紗，你係因為知道我想家聰早啲成家立室，想我開心先咁做。」
Yeesa︰「婆婆我……」
家聰外婆：「你哋唔使再扮喇，但你唔好因為咁而唔過嚟探我喎！」
Yeesa︰「點會呢婆婆。」
家聰外婆：「咁你記得同浩仔講唔需要幫你哋隱瞞喇！」
Yeesa︰「邊個浩仔呀？」
家聰外婆：「你個朋友，智浩呀！」
Yeesa︰「Ryan？你之後見過佢？」
家聰外婆：「係，佢送過我返屋企，佢話你同家聰真係拍拖。」
※※※※※※※※※※
Yeesa一直思考Ryan見過家聰外婆的事。之前Ryan怪責她假扮家聰男朋友，轉頭他又在家聰外婆面前幫她和家聰隱瞞，覺得整件事都不合邏輯。正當她苦惱之際，她又在街上碰到熟人，今次是Ryan的母親。Yeesa心想為何接連碰到家聰和Ryan的親人，想休息一回也不行。
Ryan媽：「Yeesa！情人節冇去街咩？」
Yeesa︰「都冇情人，所以冇街去囉！」
Ryan媽：「不如今晚上嚟我屋企食飯啦，芷晴都係冇拖拍，留喺屋企。」
其實Yeesa只想獨自靜靜的過，但她每次都不懂拒絕Ryan的媽媽，最終也答應Ryan媽的邀請。而Ryan媽也感到高興，因上次她看見Ryan和Yeesa有爭執，以為二人的關係已告一段落，但今日知道Yeesa沒有跟別人拍拖，他覺得Ryan仍有機會。
二人返家後，Ryan媽入廚房預備食材，但不見芷晴縱影。Yeesa坐在客廳的梳化上，休息一回。此時，她聽見Ryan房間傳來結他聲，心想：「莫非Ryan早咗一日返嚟香港？」
Yeesa立即衝入Ryan的房間。