【二月廿九番外篇】《沒有穿越的平行時空》: 第二十五章 未知
第二十五章 未知
Yeesa離開病房後，已不見Ryan的縱影。她沿著往出口的路走，但一直見不到Ryan，可能已離開醫院。Yeesa打算返回病房，但就在回程之時，她看見Ryan正在汽水機面前苦惱著。
Yeesa︰「有咩幫到你呀？」
Ryan︰「咦，Yeesa！冇呀，我明明嘟咗八達通但冇嘢出。唉，算啦，唔飲喇，嗰十蚊豪俾佢！」
Yeesa︰「你趕唔趕時間呀？」
Ryan︰「其實我係要幫芷晴買啲嘢，佢就嚟考試，所以成日使我做嘢。唔算好趕。」
Yeesa︰「不如一齊食tea吖？」
Ryan︰「好呀。」
※※※※※※※※※※
他們在一間cafe裡坐下，二人並肩而坐。Yeesa正努力地選擇哪一種蛋糕。
Ryan︰「依家嘅你同初相識嘅你，改變好大，但有兩樣嘢係冇變！」
Yeesa︰「邊兩樣？」
Ryan︰「都係好可愛同有選擇困難症。」
Yeesa︰「你讚完人又要話人。」Yeesa扁咀。
Ryan︰「唔好淨係食你最鍾意食嘅口味，有時有啲第二最愛，都可以好好味。」
Yeesa聽得出Ryan有弦外之音。
Yeesa︰「好啦， 咁我要士多啤梨千層蛋糕啦。」
此時此刻，Ryan知道Yeesa心裡面並不是最喜歡自己，但也想Yeesa知道，自己對她也很重要。
Yeesa︰「你究竟講咗啲咩令Fiona心情好咗？」
Ryan︰「冇，我之前同你講過，我阿爸喺芷晴啱啱出世冇幾耐，就過咗身。當時係一宗交通意外，阿爸係為咗救我阿媽而死。阿媽一直都好自責同內疚，經常心神恍惚，但眼見芷晴咁細，我又未出身，佢知道唔可以再係咁，於是重新振作。」
Yeesa︰「原來你爸爸媽媽有段咁嘅故事，好感人。」
Ryan︰「可能有相似經歷，Fiona霎時覺得，佢都唔應該再諗埋一邊，唔可以辜負BB嘅犧牲，同埋唔可以令身邊人擔心。」
Yeesa︰「其實我媽咪都係一樣。」
Yeesa將自己在札幌出生的經過、母親怎樣向御守許願、最終生下她之後過身的經過，和Ryan一一說出。
Ryan︰「唔通，呢啲真係命運？」
Yeesa︰「如果係命運，我應該要更珍惜自己，更珍惜身邊嘅人，積極面對人生，令自己不枉此生。」
Ryan笑著說︰「心態成熟咗喎，冇以前咁幼稚。」Yeesa對著Ryan皺眉頭，怪責Ryan說她以前幼稚。
店員將蛋糕和飲品放在他們的枱上。
Yeesa︰「好食呀，啲士多啤梨cream好好食，你都試下。」
Ryan︰「都話係好嘢嚟㗎啦！」
二人也互相share自己的蛋糕給對方。其實Ryan已經很久沒有和Yeesa面對面說話，最近的一次見面是情人節晚上，但Yeesa因為作感冒，一直都睡著。Ryan很想將時間永遠停留在此時此刻。
Ryan︰「你……攞咗個御守？」
Yeesa從袋裡拿出這個御守，Ryan接過後細心地觀察它有何特別。
Ryan︰「呢個御守真係有神秘力量，令到另一個平行宇宙嘅你，識得穿越時空？」
Yeesa︰「應該係。」
Ryan︰「你依家keep住個御守，有冇覺得有啲咩特別感覺？」
Yeesa︰「咁又冇，又冇話出現多咗閃影。」
Ryan︰「你會唔會仲係好怕見到呢啲畫面？」
Yeesa︰「冇喇，仲有唔夠一年就到2020年2月29號，我已經睇通晒，唔會再逃避。」
Ryan︰「如果我再拖你隻手，你係咪會再有閃影？」
Yeesa︰「係，但唔一定次次有，要試吓先知。」
Yeesa主動握著Ryan雙手，但Yeesa看不到閃影。
Ryan︰「睇唔睇到？」
Yeesa︰「睇唔到，可能仲爭啲嘢！」
Ryan︰「爭啲乜？」
Yeesa不想跟Ryan說要有心跳加速的感覺，才會出現閃影。
Yeesa︰「我冇特別意思！」Yeesa說完，隨即主動將頭挨在Ryan身上。Ryan有了這種身體接觸，心情立即緊張起來，而Yeesa也開始看見了影像。
Yeesa看見的影像，跟上次他和家聰一起時看到的一模一樣，都是另一個平行宇宙的Yeesa，親身到案發現場，見到家聰呆坐路邊，以及遺留在馬路上、Ryan送給Yeesa的手帶。
Yeesa︰「都係同家聰之前見到嘅影像一樣，但我明明見唔到你喺現場。」
Ryan︰「莫非嗰個時空嘅我都喺交通意外入面？」
Yeesa︰「唔知呀，但我真係見唔到你。照之前嘅慣例，如果嗰個Yeesa喺穿越時冇見過你，我係應該睇番生日閃影時嘅影像，即係喺神社時嘅畫面，但今次唔係。」
Ryan︰「唔好諗咁多喇，都係我唔好，又再一次令你煩惱。」
Yeesa︰「唔關事，我都想知多啲。」
Ryan︰「仲有一樣嘢想講俾你知，我遲啲會去札幌嘅總公司實習。」
Yeesa︰「吓！札幌？幾時去呀？」
Ryan︰「未知確實日期，但要去半年。」
Yeesa︰「Ryan，我絕對支持你去札幌實習，因為呢個係你一直以嚟嘅夢想。但時間上實在太巧合，可能你喺出年嘅2月29號都仲喺札幌，同另一個平行宇宙嘅情況好相似。」
Ryan︰「唔使擔心，依家先係三月，好大機會出年二月前已經番嚟香港。就算咁巧合，我喺出年嘅2月29日都仲喺札幌，只要到時你喺香港，意外就唔會發生。」
Yeesa︰「希望係啦。」
※※※※※※※※※※
很多事情都是未知之數，他們暫時解釋不到Yeesa和Ryan的閃影畫面，和Ryan去札幌實習的事會否有關連。Yeesa、家聰和Ryan三人仍然處於這種含糊不清的關係，看來真的要過了2020年的2月29日，才可解開他們的糾結。
不過，事情到六月時產生了變化，全因家聰的外婆心臟病發而起。
當時家聰在神聖幾何，收到外婆的信息，知道外婆出事，但當時外婆在家，兩者距離實在太遠。他先打電話報警，然後拜托Yeesa去照顧住外婆。幸好當日Yeesa和辰叔一同在文具鋪看鋪，她可立即到家聰外婆的家。
剛巧當日Ryan放假，在街上看見Yeesa，陪著一位婆婆上了救護車。Ryan記得之前曾經數次在街上碰見Yeesa拖著這位婆婆行街，証明二人感情非淺，但他又從未聽Yeesa講過她有長輩住在這裡附近。出於好奇，Ryan上了的士，暗中跟著救護車，一同抵達醫院。
Yeesa在急症室等候期間，Ryan都在遠處望著Yeesa，心裡不斷責備自己為何要這樣跟蹤Yeesa。Ryan想知道這位與Yeesa和家聰有關的長者是誰，其實可以大方走去問Yeesa，但Ryan沒有這樣做，直至他等到家聰出現。
Ryan看見Yeesa和家聰談話，似是交代老人家的情況。Yeesa一副很擔心的樣子，最後更與家聰相擁。Ryan看見二人親密的舉動，心裡感到不是味兒。
醫生完成急救後，出來跟他們二人講解。看他們二人的神情，婆婆應該似是渡過了危險期，他們放下了心頭大石。
Ryan其實也不知自己在做甚麼，自己又不是Yeesa的何人，這些只是Yeesa的私事，按道理不應理會太多。想到這裡，Ryan便離開醫院。
回家後，Ryan拿起結他，繼續創作他的歌曲。芷晴說得對，他是作給Yeesa的，他想在臨出發札幌前送給她。
Ryan一邊作曲，一邊想著剛才的事，心裡感到十分忐忑不安，結他的弦更突然斷掉。他決定經whatsapp問清楚。
Ryan︰「yeesa」
Yeesa︰「咩事呀」
Ryan︰「做緊乜呀」
Yeesa︰「屋企囉」
Ryan︰「我都係 彈緊結他」
Ryan send了一張他剛才彈結他的自拍照給Yeesa。
Ryan︰「不如你又selfie一張send俾我」
Yeesa︰「唔喇 我沖涼先 陣間再講」
Ryan覺得Yeesa根本在說謊，她很大機會還在醫院，和家聰在一起。
Ryan叫芷晴幫手打電話去Yeesa屋企，如果是Yeesa聽電話，就跟Yeesa說打錯；如果是辰叔聽，就跟辰叔說找Yeesa，看看辰叔怎樣講。芷晴覺得哥哥要求很奇怪，但也照做。
辰叔：「喂！」
芷晴：「喂！唔該我想搵Yeesa呀！」
辰叔：「佢未返屋企喎，你打佢手機啦！」
芷晴跟哥哥說Yeesa未回家。她覺得哥哥和Yeesa一定發生了事，但見哥哥樣子很煩惱，便沒有再追問。
事實上，Yeesa仍在醫院，跟家聰在一起，陪伴著家聰的外婆。Yeesa沒有對Ryan說真話，是因為她正陪伴著家聰，不想Ryan亂想。