【二月廿九番外篇】《沒有穿越的平行時空》: 第二十六章 爭拗
第二十六章 爭拗
Ryan在下一個休息日，到琴行買結他弦，幫自己的結他換弦。回家時在街上再次看見Yeesa和婆婆一起，他決定上前和他們打招呼。
Ryan︰「Yeesa，咁啱嘅。咦，呢位係……」
Yeesa看見突然出現的Ryan，顯得有點不知所措。
家聰外婆：「我係佢男朋友嘅外婆呀！後生仔，你係咪麗紗嘅朋友呀？」
Ryan︰「係呀，我都係住附近㗎。唔阻你哋喇，我番屋企先，拜拜！」
Yeesa心知不妙，剛才Ryan表現得越鎮定，Yeesa顯得越憂心。她送完家聰外婆回家後，立即打電話給Ryan，不過Ryan沒有接聽。Yeesa索性直接上Ryan家找他。
Ryan開門讓Yeesa進來，之後一直在忙著換結他弦，沒有理會過Yeesa。
Yeesa︰「你講吓嘢啦！」
Ryan︰「你見唔到我整緊個結他咩？咁你有咩講吖？」
Yeesa︰「件事唔係你咁諗！」
Ryan︰「個婆婆係咪余家聰個外婆？」
Yeesa︰「係，但我咁做只係想家聰個外婆開心，佢有病，未必捱到好耐。」
Ryan︰「所以你覺得，喺婆婆面前扮係余家聰女朋友，你就覺得係一件好崇高嘅事，做得好啱，我喺度怪責你係我小氣，係咪？」
Yeesa︰「我都冇咁諗！」
Ryan︰「張麗紗，其實我根本冇資格去怪責你任何嘢，你可以繼續去做余家聰個女朋友，喺另一個平行宇宙係咁，喺我哋呢個平行宇宙亦都會係咁，咁係好正常，我完全明白！」
Yeesa︰「你唔好咁啦……」
Ryan︰「如果你覺得你咁做冇問題，咁你前幾日又做乜講大話。」
Yeesa︰「你講乜呀？」
Ryan︰「余家聰個外婆前幾日係咪入咗醫院？你係咪陪佢入院？」
Yeesa︰「你點知㗎？」
Ryan︰「我當時喺醫院見到你同余家聰，所以我試吓whatsapp你，你竟然話你喺屋企！」
Yeesa︰「你點會無端端喺醫院？你跟蹤我？」
Ryan︰「係。」
Yeesa︰「馬智浩，你知唔知自己做緊咩呀！」
此時，Ryan媽買完餸回家，看見Yeesa來了，很高興地問Yeesa留不留下吃晚飯。
Yeesa︰「伯母，唔喇，我今晚有嘢做，我走先喇，拜拜！」
Yeesa離開後，Ryan媽看見Ryan的神情，知道Ryan和Yeesa剛剛吵架，也不敢再多問半句。
※※※※※※※※※※
Ryan不知道自己為何要向Yeesa發脾氣，可能真的是自己小氣，容不下Yeesa為討一個生病的老人家開心而講的善意大話。但說出去的話猶如潑出去的水，Ryan知道今次的殘局很難再去收拾。
Yeesa心情納悶，想找Fiona或者嘉嘉傾訴，但她們二人正有事忙，沒空閒陪Yeesa。Yeesa決定去神聖幾何找家聰他們。
當時基地只有家聰一人，獨自躺在梳化上。Yeesa也跟著他，坐在他的旁邊。
家聰：「點呀，煩緊乜？」
Yeesa︰「唔知點同你講。」
家聰：「你唔似會煩閃影嘅嘢。」
Yeesa︰「唔……我問你吖，愛情係咪真係一件好煩嘅事？」
家聰沒料到Yeesa劈頭第一句就講愛情，他不懂怎樣回應。
Yeesa︰「做咩唔出聲呀？你唔係好鍾意討論哲學㗎咩？愛情，都係屬於哲學嘅一種吖！」
家聰：「可唔可以具體少少呀？」
Yeesa︰「唔……一個善意嘅大話，無論出發點有幾好，但會令鍾意自己嘅人受傷，咁呢個大話，係啱定係錯？」
家聰：「冇人能夠判斷啱定唔啱。一個好嘅大話，可能會救到好多人，令好多人開心，但就傷害一小撮人，根據功利主義，呢個大話可能係啱。但你傷害咗嘅人，原來對你係好重要，咁，呢個大話，對你嚟講，就可能係錯。」
Yeesa︰「咁，如果講大話嗰個人，最終傷害到鍾意佢嘅人，但佢又覺得自己冇錯，咁係咪代表，佢唔係咁鍾意嗰個人？」
家聰：「價值係雙方面嘅，如果個大話嘅既定得益者，對講大話嗰個人都好重要，咁，件事就唔同講法。」
Yeesa︰「唉，所以愛情，真係好煩。」
家聰：「同意，我覺得維繫愛情真係好嘥時間。」
突然，基地內有物件發出聲響。他們朝著發出聲響的方向望去，發現是巴西龜的測謊機有聲響。根據剛才測謊機的顯示，家聰那句說話是大話。
Yeesa︰「巴西龜啲嘢同佢個人一樣，都係咁鍾意偷聽人講嘢嘅！」測謊機顯示真心話。
家聰：「其實，對於你之前出現嘅閃影，你仲有冇煩惱？」
Yeesa︰「冇喇，多得你哋幫我，我覺得自己都ready去面對2020年嘅生日。」測謊機顯示真心話。
家聰：「你仲記唔記得940920呀？」
Yeesa︰「唔……對我嚟講，940920係屬於我哋兩個之間，喺唔同嘅平行宇宙都係互通嘅密碼！」測謊機顯示真心話。
家聰：「咁，Ryan係咪你實現愛情嘅對象呀？」
Yeesa︰「吓，我……唔係……」測謊機冒煙，胡亂發出聲響和閃燈，似乎突然間壞掉了。
Yeesa︰「咁流嘅！」
家聰：「睇嚟，部機handle唔到不確定性。」
家聰在此之前，未能確定得到Yeesa的心意，也不知她究竟愛Ryan有多深。他想藉測謊機去試探，但不成功，但觀乎Yeesa剛剛關於「講大話」的課題，他估計得到Yeesa和Ryan有爭拗的地方。
家聰：「我打算下星期去札幌。」
Yeesa︰「係咪去調查我閃影嘅事？」
家聰：「係！但係，如果你帶住御守，同我一齊去札幌，可能我哋會查到更多嘅嘢。」
Yeesa萬萬估計不到，家聰會邀請自己同遊札幌。這是一個很尷尬的課題，雖然這是調查，但一男一女去旅行，旁人只會想到那回事，她也沒想到家聰會有此要求。
家聰：「你唔使擔心，如果你會一齊去，我會叫埋跳掣一齊，有多個女仔同行，會令你放心一啲，或者你可以叫你嘅朋友同行都得。但你係事件嘅主角，如果你帶住御守去札幌，可能會喚起你一啲畫面，有助調查。」
Yeesa仍在考慮當中。
家聰：「你唔使依家落決定，我下星期五先出發，你之後同我講番都得。就算你唔去，我都會照樣出發。」
Yeesa︰「唔使考慮喇，我都一齊去札幌啦！」
這樣，Yeesa答應了家聰一同前往札幌調查。
※※※※※※※※※※
晚上，Yeesa相約嘉嘉和Fiona一同晚飯，並向她們講出自己和Ryan吵架以及答應家聰一同前往札幌的事。嘉嘉和Fiona一同搖頭。
嘉嘉：「你咁做，只係直接判咗Ryan死刑。」
Yeesa︰「咁我可以點做，我好想去了解多啲閃影嘅事，同埋另一個平行宇宙發生緊啲乜。我又唔係單獨同家聰去札幌，你哋有興趣都可以陪我㗎！」
Fiona︰「成件事你有冇從Ryan個角度去睇？」
Yeesa︰「有又點，冇又點，都唔關我去唔去札幌事。」
嘉嘉：「你喺家聰外婆面前扮係家聰女朋友，俾Ryan知道，你同佢嘈交，之後你轉頭就跟家聰去札幌，咁你覺得Ryan會點諗？不過咁都好，既然你之前都認定咗家聰係你心目中嗰位，你咁樣做都未嘗唔係一件好事，總好過拖拖拉拉。」
Yeesa沒有回答嘉嘉的說話。
Fiona︰「你有咁嘅反應，即係你到目前為止，都仲未係好肯定你心目中嗰個究竟係邊個！」
Yeesa仍然是低下頭，沒有說話。
嘉嘉：「其實一直以嚟，我都覺得Ryan對你好好。我唔知佢去跟蹤你係咩心態，但我唔覺得有惡意，可能只係純綷出於太著緊你。不過都係嗰句，無論點我哋都會支持你。」
Yeesa︰「我唔知點同Ryan講我同家聰去札幌嘅事。」
Fiona：「照直同佢講，唔使理佢有咩反應，但你預咗佢唔會再好似以前咁對你咁好。」
嘉嘉：「我都想同你一齊去札幌，但下星期我最少有兩單直播，件product未收到，我唔可以離開香港。」
Fiona︰「我都係呀，我下星期都有嘢做，你自己要小心。」
Yeesa嘆了一口氣，慨嘆自己處理不好感情事。