【二月廿九番外篇】《沒有穿越的平行時空》: 第二十四章 自由意志
第二十四章 自由意志
經過Yeesa和辰叔兩父女之間最真誠的溝通，二人的心結也隨即解開，而Yeesa對自己的出生，以及母親的事，也有相當了解。
Yeesa和家聰離開文具鋪，在街上並肩而行，
家聰：「喂，我諗住遲啲會去北海道。」
Yeesa︰「吓，做乜去北海道？」
家聰：「我想盡量將你會喺出年2月29日出事嘅機率降到去0%，我有必要去一次北海道。就算我哋呢個時空所知嘅資訊有限，我都想盡量去查多啲嘅嘢，我唔想你有事。」
Yeesa聽見家聰這種少有的柔情說話，顯得格外甜蜜。
Yeesa︰「我……好多謝你一直以嚟咁幫我！」家聰向Yeesa報以一個溫暖的笑容。
Yeesa︰「咁，我仲可以做啲咩，去幫助你可以思考得容易啲？」
家聰：「好好享受呢一年同家人、朋友嘅相處。我唔係話你會出事，但保持心境開朗，就算再有閃影，你都可以豁然渡過。」
Yeesa決定今年要好好珍惜和享受與家人朋友的相處。
※※※※※※※※※※
某一晚，壽司店關門，Ryan仍然刻意留在鋪頭，進行清潔、執拾的工作。Ryan的努力，全都被老闆看在眼中。
老闆對Ryan說，日本總公司每隔兩年都要求每間海外分店，派一個人去日本當實習生，直接由總公司的料理長教授，為期半年。老闆見Ryan做事認真，被年輕過他的師兄吩咐做事，每次都是任勞任怨，所以決定推薦他去日本實習。Ryan覺得這個是不可多得的機會，但要先與家人商量後才答應老闆。
Yeesa約嘉嘉來書店，將自己的passport交給她，並叮囑她千萬不要在明年2月29日前還給自己，以免自己會在北海道出事。當時巴西龜也在場，受會長所託，一定要親眼看見Yeesa將護照交給朋友才行。
Yeesa跟嘉嘉說，在接著的一年，她想多點陪伴家人和其他身邊的人，所以想轉兼職。嘉嘉煩惱要請人之際，在遠處偷聽的巴西龜自薦做兼職幫手看鋪，嘉嘉也答應了。
此時，Yeesa收到Jonathan電話，說Fiona自殺，現在於醫院留醫，幸好沒有生命危險。Yeesa和嘉嘉立即趕往醫院探望。
※※※※※※※※※※
看見Fiona坐在病床上發呆，Yeesa和嘉嘉顯得不是味兒。她們明知Fiona仍未從失去BB的事實中釋懷，但也未能好好開解Fiona，終致她想不開，自殺收場。
Yeesa覺得自己很沒用，剛剛還說要多些陪伴身邊人，不久就發生Fiona自殺的事件。而且，Fiona今次自殺，也是Yeesa間接造成。
Fiona︰「係我，係我殺死咗BB！」
嘉嘉：「大家都知你係逼不得已，點可以怪你！」
Fiona︰「唔係呀！係我，真係我殺死咗佢，如果當時我生咗佢出嚟，佢就會健健康康咁生活落去，我死又有乜所謂！」Fiona開始落淚。
Yeesa看見Fiona這樣自責，Yeesa的心也很痛。她想，如果當時她沒有出現閃影，就不會發生之後的一連串事件，Fiona就不會這麼痛苦。如果最終Fiona真的自殺死，情況會比本來更差，Jonathan也會更責備自己。
Yeesa和嘉嘉也不懂再說甚麼話去安慰Fiona，只有雙雙攬著Fiona，給予支持。
※※※※※※※※※※
Yeesa心情不好，她決定去神聖幾何找家聰。Yeesa向家聰說起Fiona的事。
Yeesa︰「其實我當初係咪做錯咗？如果我睇唔到閃影，冇同Fiona講，佢係唔係就唔會咁？」
家聰：「你覺得人有冇自由意志呀？」
Yeesa不懂回答。
家聰：「有人認為，命運係上帝嘅旨意，又或者係某種超然嘅主宰，所有嘢一早都被安排好㗎喇，所以，我哋其實係控制唔到㗎。」
Yeesa︰「照你咁講，做人咪冇乜意思囉！」
家聰：「我都唔知呀，所有人嘅命運互相交織，互相影響，所有嘢都有因果，所有嘅因果每一刻都改變緊。Fiona嘅事，我哋所有人都有責任，但根本就冇啱定錯，因為我哋永遠都唔會知道，乜嘢係啱，乜嘢係錯。」
Yeesa似乎明白了一些事情，心情也沒有剛才那麼沉重。
家聰將一本書遞給Yeesa。這本書是以前特訓時Yeesa曾經在其中一頁畫過家聰的頭像，Yeesa打開第一頁，見到是家聰畫她的頭像。
Yeesa即時笑出來，說：「你唔好話俾我知你係畫緊我呀？」
家聰：「你畫我，我咪畫番你囉！」
Yeesa︰「好肉酸呀！」
家聰：「盡咗力㗎喇！」
Yeesa的心情已好了很多。她決心要為Fiona打開心結。
※※※※※※※※※※
Ryan在家中彈著結他，用結他創作歌曲。芷晴見哥哥彈結他，便入房近距離欣賞。
Ryan︰「你一入嚟我啲靈感就冇晒，快啲出番去先啦！」
芷晴：「你作曲呀阿哥？」
Ryan︰「好明顯啦！」
芷晴：「我記得N年前你曾經講過話想作曲，但你一首都作唔到。依家做乜咁有興致去作曲？係咪作俾Yeesa姐姐㗎？」
Ryan︰「你唔好煩住我啦，攪到我作唔到！」
芷晴：「你咁緊張，好明顯係作俾Yeesa姐姐啦，又唔認！」
Ryan︰「我冇唔認。不過講真，我都好耐冇見過Yeesa喇，大大話話都有幾個月冇同佢當面講過嘢！」
芷晴：「吓，你又話愛情係要靠自己把握同爭取，你做乜咁唔著緊呀，咁樣係會俾Dr Yu搶走佢㗎！」
Ryan︰「我同佢好似唔能夠再行近一步，最近仲因為一啲事而出現分歧。」
此時，Ryan媽也入了Ryan的房間。
Ryan媽：「你上次咪話有嘢同我講嘅？」
Ryan︰「係呀。阿媽、芷晴，我想問你哋，如果我成三十歲人先講夢想，會唔會好戇居？」
Ryan媽：「你到我呢個年紀講夢想就戇居，你點同！」
芷晴：「究竟咩事呀？」
Ryan︰「冇，餐廳推薦我去日本實習，應該去半年左右。如果表現好，可以繼續喺嗰邊幫手，只要我願意嘅話。」
Ryan媽：「好喎，呢啲機會好難得。」
芷晴：「哥，我會好唔捨得你㗎，半年咁耐！」
Ryan︰「冇我嘅囉嗦半年，你應該會好開心喎。不過如果我係去日本，都唔會即刻走，會喺今年之內出發。」
Ryan媽：「阿媽無限量支持你。」
芷晴：「雖然唔捨得，但我都支持。」
Ryan得到家人的支持，決定到日本實習。他想將此消息講給Yeesa知，但不知為何，已經撥出的電話，但又收回，最終沒有打出。
※※※※※※※※※※
翌日，Yeesa到醫院探望Fiona。她沒想到Ryan也來了醫院，跟嘉嘉、Jonathan和Fiona在傾談中，而且見Fiona出現近期少有的笑容。
Yeesa︰「做乜你哋咁齊人呀！」
嘉嘉：「係呀，頭先我同Jonathan約埋一齊嚟探Fiona，咁啱喺街撞見Ryan。」
Jonathan︰「我同Ryan講咗Fiona嘅事，Ryan就話唔介意嘅話佢都想嚟探探Fiona，所以Ryan就嚟咗。」
Fiona︰「多謝你呀Ryan，聽完你嘅說話，我心情好番好多。」
Ryan做了一個「不用客氣」的動作。
Jonathan︰「我陣間公司有個會要開，Fiona我走先啦。多謝你哋嚟陪Fiona，感激，拜拜！」
Jonathan離開後，他們四人好像平時傾偈一樣，傾得很開心，完全沒有當Fiona剛剛自殺過一樣。這樣子又過了半小時。
Ryan︰「我有啲嘢做，我都走先喇，Fiona你就好好休息下啦，拜拜！」
Ryan離開，嘉嘉示意要Yeesa追出去。
Yeesa︰「做咩者，我想喺度陪多陣Fiona。」
Fiona︰「我暫時冇嘢，不過我覺得你同Ryan有啲嘢。」
Yeesa︰「乜嘢呀？」
嘉嘉：「好似怪怪哋咁囉，有啲『生保』嘅感覺囉！」
Yeesa︰「冇嘢呀！」
嘉嘉：「快啲啦！」
Yeesa無奈地被她們趕了出來。