【二月廿九番外篇】《沒有穿越的平行時空》: 第二十三章 御守
第二十三章 御守
閃影畫面完結，Yeesa張開眼睛。
巴西龜：「點呀，今次見到啲咩？」
Yeesa︰「不如你哋都坐低，我慢慢講俾你哋聽。」
Yeesa緩緩道出剛才閃影的畫面，大家都非常用心聽著。
耶穌：「終於都解釋到點解另一個平行宇宙嘅Yeesa識得穿越，但我哋嘅Yeesa唔識喇！」
Alien︰「關鍵竟然係一個御守，仲要係Yeesa媽咪嘅遺物。」
家聰：「依家我哋知道，激發穿越嘅關鍵物品係Yeesa媽咪嘅遺物御守。Yeesa，你知唔知依家個御守喺邊？」
Yeesa︰「我知。我終於記得喇，喺2017年生日我第一次有閃影之前，我曾經打開裝住御守個盒，攞起過個御守，之後擺番入盒，之後我就冇咗件事喇。」
家聰：「就係呢個動作喇！我好肯定，另一個平行宇宙嘅Yeesa，當時佢係有攞走到個御守，一直跟身，從而激發穿越。我哋嘅Yeesa，只係曾經觸及過御守，就擁有看穿另一個平行宇宙嘅能力。個御守擁有嘅非自然力量，真係非常強大。」
Yeesa︰「咁我應唔應該攞個御守出嚟？如果我再次觸碰呢個御守，我會唔會識得穿越？我真係唔想！」
家聰：「今年已經係2019年，就算係嗰個平行宇宙，都已經係最後一次穿越。所以你依家得到個御守，都唔會有穿越嘅能力。不過，好肯定嘅係，你會多咗出現閃影嘅機會。你可能會因為得到更多嘅資訊而感到痛苦，但反而有機會因為咁而解決到問題，呢樣嘢要睇你喇Yeesa！」
大家聽到家聰這樣說，都不發一言，顯得有點無奈。
家聰：「關羽，你幫手check吓札幌有冇多賀神社？如果有，睇吓係一間祈求乜嘢嘅神社。」
關羽：「好！」
家聰：「到目前為止，第二個平行宇宙嘅我哋，仍然冇辦法利用最後一次穿越來阻止意外發生。不過唔使灰心，我哋呢個時空始終冇發生過穿越，如果Yeesa你喺出年2020年2月29號嗰日，唔出現喺札幌，咁出事嘅機會就會降低。所以，Yeesa，你將passport交俾你最信任嘅人，或者乾脆燒咗佢。」
Yeesa︰「哦。」
耶穌：「如果意外係命運嘅安排，咁喺香港都有機會有意外。」
跳掣：「其實每個人死於非命，都係冇人阻止到。」
家聰向他們做出「殊」的口型。
Yeesa︰「唉，要嚟嘅始終都要嚟，我今次唔可以再退縮。聽日我就去攞個御守，就算狂loop閃影，我都可以捱過，更何況我信你哋，你哋會幫我解決到問題。」
家聰非常慶幸Yeesa現在不再逃避，勇敢面對未來。
Yeesa︰「家聰，你可唔可以跟我出嚟呀。」
Yeesa和家聰步出露台。
家聰：「你……有乜諗法？」
Yeesa︰「既然我選擇咗唔再逃避，我想一次過知道另一個我有冇喺今次穿越時見到你。」
Yeesa和家聰對望著，二人都有點尷尬，因為要做到這個操作，需要雙方手拖手，以及彼此要有心跳的感覺。家聰決定不再做被動的一位，主動拖著Yeesa的手，Yeesa再次看見閃影。
今次，她看見另一個Yeesa，在一片雪地的馬路上走著。前方有警察設置的路障，很明顯是交通意外現場。她看見了家聰，獨自坐在路邊哭泣著，但見不到出意外的Yeesa，可能已被送院，或者已經死亡。她還看見雪地上有Ryan做給她的手帶，想必是那個平行宇宙的Yeesa在意外發生時遺留在現場。
畫面完結，Yeesa張開眼睛。
家聰：「點呀，睇到啲乜？」
跳掣：「係啦，睇到啲乜？」
家聰和Yeesa回頭一望，發現全部人都在他們身後偷看和偷聽，而且當時二人還未放開手。
巴西龜：「入嚟慢慢講啦，嘻嘻！」
Yeesa再次向大家講出新的閃影畫面。大家知道這些影像只是進一步確認Yeesa看到的新聞報導是真的，可能那個家聰在現場目睹了整個意外過程，親眼目睹那個Yeesa遇害，悲憤不已。
關羽：「查到喇，札幌真係有多賀神社，係一間祈求時間嘅神社。」
Alien︰「竟然有祈求時間嘅神社。」
巴西龜：「Yeesa喺呢間神社入面出世，而佢媽咪喺生佢嗰陣又緊握住呢個御守，所以呢個御守同Yeesa有一種不可分割嘅關係，能夠帶俾Yeesa一啲好特別嘅力量。」
家聰：「依家都夜喇，Yeesa你就好好休息一下，遲啲再傾。」
家聰主動終止了討論，讓眾人回家休息，他自己則留在基地，繼續思考著當中的細節。
※※※※※※※※※※
Ryan打電話給Yeesa，和Yeesa講生日快樂。Yeesa將今晚所發生的事由頭到尾再講一次給Ryan知。
Ryan︰「你打算去攞番個御守出嚟？」
Yeesa︰「係。」
Ryan︰「我唔同意。」
Yeesa︰「點解？我主動解決件事唔好咩？」
Ryan︰「我嘅觀點從來都冇變，嗰個平行宇宙，係你識得穿越時空嘅宇宙，我哋呢個宇宙，你係唔識得穿越。雖然兩個宇宙好相似，但我相信總有啲嘢會唔一樣。你越刻意去主動接觸，反而會更容易向住呢個結局去走。」
霎時間，Yeesa覺得Ryan的說話不無道理。而Ryan那樣執著此觀點，一半真的是他的分析，一半是有私心。他想改變命運，打破那個宇宙Yeesa會和家聰是一對的事實。
Yeesa︰「Ryan，我想你支持我呢個決定，我已經俾呢件事纏擾咗我兩年，我想喺剩低呢一年解決呢個問題。」
Ryan︰「我做唔到，我講唔出我會支持你呢個決定嘅說話。Yeesa，呢件事嘅主角係你，我會尊重你任何嘅決定，但我認同唔到，sorry！夜喇，早啲瞓，拜拜。」
Yeesa得不到Ryan的支持，心裡似乎缺乏了少許安全感，信心也動搖了一點。一直以來，Ryan都是默默地去支持她，今次令她有點意外。Yeesa隨即除下Ryan送給她的手帶，她不是怪責Ryan不支持她，而是手帶出現在那個平行宇宙北海道的交通意外現場。她覺得不再戴這條手帶，就算她將來機緣巧合之下在明年生日身處北海道，她也不會那麼容易被捲入意外之中。
幸好，家聰whatsapp Yeesa，說明天可以陪她去取御守，對Yeesa來說是一點支持，信心又提升不少。
※※※※※※※※※※
翌日，Yeesa和家聰來到辰叔的文具鋪。辰叔看見Yeesa帶著另一位陌生男生前來，立即搖頭不已。
辰叔：「做乜好日唔落嚟鋪頭，一落嚟就帶個新男朋友嚟見阿爸呀？」辰叔其實一直默認了Ryan是女兒的男朋友。
Yeesa︰「唔係呀，我遲啲再解釋。今次我嚟係想入倉攞啲嘢。」
Yeesa從貨倉取出裝有母親遺物的盒子。
辰叔：「做乜無端端攞番呢個盒出嚟？呢個係你死鬼阿媽嘅遺物嚟！」
Yeesa打開盒子，將御守取出。
Yeesa︰「爸，我想知呢個御守，有冇啲咩特別意義？」
辰叔拿起御守，想起了很多事情，但仍然不肯對Yeesa透露半句。
Yeesa︰「媽咪係喺1992年2月29號，喺札幌嘅多賀神社入面生我出嚟。」
辰叔一臉驚訝，道：「點解……點解你會知？我冇同任何人講過呢件事！」
Yeesa︰「媽咪喺生我嘅時候，一直都揸住呢個御守，為我許願。佢寧願犧牲自己，都要生我出嚟，係咪？」
Yeesa開始眼有淚光。家聰想讓Yeesa有機會跟辰叔好好傾談，故意行遠一點。
辰叔：「你去過嗰度？」
Yeesa︰「冇，但我有能力知道。」
Yeesa向辰叔講出她一直以來出現閃影的情況。
辰叔：「你竟然有咁嘅經歷，莫非真係美子嘅信念留咗喺呢個御守裡面！」
Yeesa︰「阿爸，點解你一直唔同我講媽咪嘅事？你係咪覺得我一出世就害死阿媽？」
辰叔：「我冇咁諗過，相反，害死你阿媽嗰個，係我！」
辰叔開始向Yeesa講出她的母親生前和自己的故事。辰叔後生時是玩電單車，經常到日本比賽，從而結識了Yeesa的母親。她全名叫南野美子，是一名很善良的女子。婚後辰叔尊重妻子，留在北海道定居，並懷有Yeesa。
就在1992年2月28日晚，辰叔和妻子因小事吵架，令妻子很生氣，很暴躁。辰叔自責自己當時竟然忍不住氣，跟腹大便便的妻子嘈交，導致她不小心摔倒，開始作動起來。
由於當時下著大雪，出城市的主要道路都被大雪封堵，他們又住在郊區，所以去不到醫院。當時辰叔情急之下，帶妻子到附近的多賀神社，找神社巫女幫忙接生。當時Yeesa母親手握這個御守，祈求上天救救這個女嬰，寧願犧牲自己都要讓女兒出世。
辰叔：「係阿爸對你唔住，對你阿媽唔住。我一直都唔敢講個真相俾你聽，一直用飲酒嚟麻醉自己，嚟忘記你阿媽。但我一直都做唔到！」
Yeesa擁抱著辰叔哭泣。
擁抱過後，Yeesa問辰叔可否將御守帶走，辰叔同意。