【二月廿九番外篇】《沒有穿越的平行時空》: 第二十章 愛情執念
第二十章 愛情執念
Yeesa按著自己的頭，狀甚痛苦。
Ryan︰「咩事呀Yeesa，頭痛呀？」
Yeesa︰「我個腦又有畫面。」
Ryan知道Yeesa又出現閃影，立即不再發出聲響，只是緊緊握著Yeesa雙手。
Yeesa再次看到新聞報導的畫面，自己在交通意外中死亡，沒有新畫面出現。不過，再次感受到這些不祥的訊息，Yeesa直接流出冷汗。
Yeesa︰「冇嘢喇！」
Ryan緊緊的攬著Yeesa。
Yeesa︰「Ryan，不如等到2020年2月29號先……」
Ryan︰「唔使多講，我會等你㗎！」
本來這麼一個美好的晚上，在Yeesa再次出現閃影的情況之下，失望地落幕。
※※※※※※※※※※
Yeesa覺得這件事情總要找方法解決，於是再次返回神聖幾何。之前她和家聰講過，要先處理好Fiona的事，才和他們商量自己將來的事。現在過了10月1日，是時候要再開始討論。
Atma看見Yeesa回來，又再次立即飛撲到Yeesa的懷抱。學會眾人再次見到Yeesa回來，都很高興。
Yeesa︰「對唔住呀，之前粒聲唔出走咗去，咁耐先番番嚟！」
跳掣：「冇問題，會長同我哋講晒詳情㗎喇，我哋明㗎！」
Yeesa和神聖幾何六子再次開會，商討Yeesa腦海出現閃影的問題。
家聰：「Yeesa喺2018年2月28日到3月1日中間嘅0時0分，出現嘅閃影，再次睇到另一個平行宇宙嘅Yeesa。嗰個Yeesa同樣地由2018年再次穿越去2020年2月29日嘅北海道，雖然Yeesa只係見到喺網吧，但新聞片段一樣見到札幌市氣溫，同埋交通意外報導，相信嗰度都係札幌。」
大家一直好專心聽會長分析。
家聰：「由於得到嘅資訊太少，所以我暫時估計唔到另一個平行宇宙嘅發展。究竟嗰個Yeesa每年穿越嘅目的地，係咪一個循環，定係去咗第三個平行宇宙，我唔知。但我相信，就算係一個循環，佢哋嗰邊都會衍生咗一個新嘅平行宇宙。」
巴西龜：「係。我哋嘅Yeesa唔識穿越，只識同其他宇宙連繫，憑住咁少資訊，都成功阻止到Fiona唔使病死，就知道嗰個平行宇宙嘅Yeesa，當佢穿越番2018年嘅時候，一定會將信息帶俾嗰個宇宙嘅Fiona，令到Fiona可以醫番好。」
家聰：「Exactly！不過呢樣唔重要，最重要係，呢樣嘢係有規律地出現，即係另一個平行宇宙嘅Yeesa，當佢喺2019年2月28日至3月1日嘅0時0分，佢會再次由香港穿越去2020年2月29日嘅北海道，到時我哋嘅Yeesa，一樣會喺同一時間，見到嗰個Yeesa喺穿越時嘅部分影像。」
Yeesa和大家都非常同意家聰的講法。
家聰：「Yeesa，你有冇勇氣，再次去睇出年閃影嘅影像？」
Yeesa︰「Fiona嘅康復俾到我好大信心，我可以改變呢個平行宇宙嘅嘢，但前晚我再次睇到上次閃影嘅影像，動搖咗我少少信心。」
Alien︰「你又見到？之前好似冇試過，只係跳掣幫你催眠時先會重溫到內容。」
耶穌：「同埋上次捉住會長隻手嘅時候，睇到嗰個Yeesa穿越時見到會長嘅畫面。」
Yeesa︰「係，其實我一直都冇同你哋講過，當我捉住Ryan隻手嘅時候，都會睇到閃影。」
關羽邊手搖酒杯邊搖頭：「原來唔只得會長一個，唔……」
跳掣：「咁你講清楚啲啦Yeesa！」
Yeesa︰「除咗生日出現嘅閃影之外，當我第一眼見到家聰同Ryan，就會見到佢哋嘅畫面，呢兩樣你哋都知。之後我試過分別捉住佢哋隻手，再配合埋一啲特定條件嘅情況底下，我就會睇到嗰個Yeesa喺穿越時見到佢哋時嘅情況。」
巴西龜：「咁係咩條件呀？」
Yeesa︰「唔講出嚟得唔得㗎？」
關羽︰「你唔講我都知啦！」關羽指著自己的手錶。
大家都恍然大悟，家聰的臉更少有地紅起來。
巴西龜：「我見會長依家面色紅潤，不如你依家試吓捉住Yeesa隻手，睇吓Yeesa有冇畫面！」
家聰：「唔好講埋啲無謂嘢！」
Yeesa︰「前晚Ryan拖過我隻手，我睇到嘅閃影，同生日時睇到嘅係一樣，我都係再次見到嗰個Yeesa喺網吧睇到交通意外新聞。咁就証明嗰個Yeesa喺2018年嗰次穿越冇喺札幌見到Ryan。同一道理，如果嗰個Yeesa冇喺穿越時見到家聰，咁我只係會再次重複見到新聞報導嘅畫面。我受夠喇！」
跳掣：「我哋唔會迫你㗎Yeesa，不過你可唔可以解釋一下Ryan點解會拖你隻手？係咪你同Ryan已經拍緊拖呀？」
Yeesa︰「吓，冇呀！」
家聰：「跳掣，唔好問埋啲無謂嘢！我哋應該諗吓點樣幫Yeesa減低出現無謂閃影嘅次數，同埋為出年嘅生日閃影做準備。」
關羽：「好簡單，Yeesa如果想拖會長同Ryan隻手嘅時候，可以試吓戴手套。」
巴西龜：「頂，好爛呀你！」
Yeesa︰「唔係喎，呢個幾好笑喎，不過唔拖會直接啲解決問題囉！」
大家都因為Yeesa這句坦率的說話而大笑。
家聰：「除咗呢樣嘢之外，我都有擔心過，仲會唔會有啲咩其他嘢係會刺激到Yeesa，再次出現閃影。我認為越接近2020年，可能會多咗機會出現閃影，不過呢個只係我嘅推測。Yeesa，你將來再出現閃影，記得話俾我哋聽！」
Yeesa︰「係！」
※※※※※※※※※※
散會後，家聰留在露台食煙，Yeesa想陪Atma多一會，也留下來，而神聖幾何其餘五人立即以不同藉口借故離開。現在，基地只留下家聰和Yeesa二人。
坐在梳化上抱著Atma的Yeesa，望著在露台抽煙的家聰，霎時感受到他的落寞感。家聰雖然不愛說話，但總會散發出吸引Yeesa的氣息。
家聰回頭望向Yeesa，Yeesa立即轉移望其他事物。家聰將煙放在煙灰缸，返回室內地方。
Yeesa︰「喂，我想問你一個問題好耐㗎喇！」
家聰：「你問啦。」
Yeesa︰「其實940920係咩意思？」
家聰聽到Yeesa這樣問，立即眉頭一皺，似是不想回答Yeesa這條問題。
Yeesa︰「你唔想答可以唔答㗎！」
家聰：「1994年9月20日，係我媽咪嘅死忌。」
Yeesa完全估不到這組數字，原來是家聰母親的死忌。
Yeesa︰「Sorry呀，總之我唔問啦！」
家聰：「都過咗咁多年，冇事。」
Yeesa︰「當時你婆婆一定好傷心。咁你爸爸呢？」
家聰：「我阿爸就係害死我阿媽嘅人！」
Yeesa︰「吓！」
家聰緩緩講出父母以前發生的事。家聰母親生下家聰之後，沒多久，父親就結識了第二個女人，還抛棄了他們兩母子。家聰母親其後得了抑鬱症，最終自殺。家聰非常憎恨父親，亦因為他的至親有這樣的經歷，令家聰對愛情失去信心。
家聰在書架取出一本書，遞給Yeesa看。
家聰：「有冇睇過呢本書？」
Yeesa︰「胭脂扣？書就冇，戲就睇過好多次。」
家聰：「仲記唔記得講啲乜嘢？」
Yeesa︰「哥哥嘅屋企人好反對佢同梅姐嘅關係，但佢哋兩個又好愛大家，所以相約一齊殉情自殺。結果哥哥冇死到，苟且偷生，而梅姐就冤魂不散幾十年，就係為咗等佢最愛嘅人。」
家聰：「你點睇呀？」
Yeeaa︰「能夠遇到一個自己咁愛嘅人，我覺得好浪漫吖！」
家聰：「浪漫完喇，咁之後呢？『胭脂扣』嘅結局係，愛情嘅執念。早啲發現，就可以避免呢種徒然。」
Yeesa︰「點會係徒然呀？佢哋兩個曾經咁愛大家！」
家聰：「你都識講曾經啦，咁最終呢？既然都咁痛苦，點解要俾自己落入呢種輪迴呢？愛情就好似希臘神話嘅西西弗斯咁，佢要不斷將大石搬上山，但我哋唔係西西弗斯，佢要受到呢個懲罰，而我哋就有選擇嘅自由。」
Yeesa︰「我唔識得你所講嘅哲學，我淨係知道，兩個人相遇，係因為有緣份。我嘅世界好簡單，人生各種相識別離，有陣時除咗命中注定之外，就好難再有其他解釋。」
Yeesa望著家聰，深深感受到家聰對愛情的悲觀，不容易改變。Yeesa也只是想講出自己對愛情的睇法。
Yeesa︰「由我出世開始，我阿爸晚晚都飲好多酒。我知㗎，其實佢一路都放唔低媽咪。我亦都知道，佢冇可能再好似以前咁開心。但我肯定，如果俾佢再揀多次，佢一定一定，會選擇再次經歷呢一段愛情。」
家聰：「但個問題係，我阿媽為咗一個唔愛佢嘅男人自殺，如果佢可以睇穿愛情嘅虛無，佢一定唔會咁樣揀㗎！」
Yeesa︰「愛情對你嚟講係虛無嘅，但對你阿媽嚟講，愛情可能比任何嘢更加重要，更加有價值，而我同你亦都冇資格去評論佢咁做究竟值得，定唔值得。如果你只係在乎個結果，就咁斷定佢咁做係岩定係唔岩，對佢都唔公平吖！」
家聰好像明白了當中的深層意義。
Yeesa︰「敢去愛一個人就係明知會受傷，會唔開心，會痛苦，都唔想俾自己有遺憾。真正愛一個人就係要竭盡所能，為佢付出自己嘅未來。」
家聰︰「識咗你咁耐，我第一次覺得你講嘅嘢，有少少道理。」
Yeesa覺得自己的說話，終於能夠改變了家聰一些固有對愛情的慨念。而Yeesa只有對著家聰，才可坦誠講出這些真心說話。