【二月廿九番外篇】《沒有穿越的平行時空》: 第十九章 心意
第十九章 心意
Yeesa看見蛋糕盒上貼著一個信封，上面寫著「To Yeesa」，字跡很明顯是Ryan。
她拆開信封，信上寫著「遲來的蛋糕，慶祝Fiona無事。Fiona無事，任何事情都可以改變。」
她再打開蛋糕盒，是她最喜愛的抹茶朱古力蛋糕。雖然賣相不是很好，但她知道這是Ryan用心為她所做的蛋糕，她覺得非常窩心。況且她試了一口，覺得非常好吃，令她一口氣吃了好幾啖。
辰叔從睡房出來，看見Yeesa吃著蛋糕。
辰叔：「係呀，係Ryan個傻佬今朝放低個蛋糕喺度。你又唔係生日，都唔知佢買蛋糕俾你做乜。」
Yeesa︰「上次我生日，佢整過俾我食，但我冇咗回事，冇食到，所以佢整過俾我食囉。」
辰叔：「係喎，你講起你生日，我記得當時真係見過雪櫃有個蛋糕，擺到發霉。」
Yeesa︰「就係嗰個囉。」
辰叔：「係呀，當時我倒個蛋糕落垃圾桶，無意中發現個蛋糕盒入面痴住咗啲嘢，我摵咗出嚟放埋咗，之後唔記得俾番你。」
Yeesa︰「吓，攪錯呀，咁都唔記得！咁你記唔記得放咗喺邊呀？」
辰叔：「我攞俾你囉，使唔使咁緊張呀！」
辰叔從廚櫃裡取出那件東西。
辰叔︰「唉，都係嗰句，我都唔知你同Ryan兩個攪乜。唉，我落去開鋪喇！」
辰叔依舊拿著酒，離開屋企。
Yeesa拆開包裝，發現是一塊類似砌圖的物件，上面寫著「認識你是我今生的榮幸」。她想到這裡，立即拆開新的蛋糕盒，發現也有同一樣包裝的物件，拆開後也是砌圖，上面寫著「原諒我當日的魯莽」。
Ryan對Yeesa的心意，Yeesa完全感受得到。其實事隔半年，早就淡化了Ryan醉酒打人的事，她並沒有因此而怪責過Ryan。相反，她自己逃避接受Ryan，才令她感到於心有愧。
Yeesa打電話給Ryan，但沒人接聽，於是她whatsapp Ryan講多謝。Ryan也是隔了一小時才回覆，他工作真的很繁忙，Yeesa也不煩著他。
※※※※※※※※※※
Yeesa直接上了Ryan屋企。她已很久沒有探過Ryan的媽媽，於是趁今日放假去找她。Ryan媽見到是Yeesa上來，顯得非常高興，立即誠邀Yeesa留低吃晚飯，Yeesa也答應。
Ryan媽在廚房忙著預備飯餸，Yeesa乘機走入Ryan房參觀。她看見Ryan放在床上的結他，房內也有很多工具，看來Ryan是喜歡音樂和做手作。Yeesa慨嘆自己認識了Ryan已有年半，但好像從未嘗試去了解過他，關心過他，思考都只是圍繞著自己。
Yeesa返回客廳，坐在梳化休息。沒多久Ryan媽忙完廚房的事，也坐在Yeesa旁邊休息。
Ryan媽：「咁耐冇見過你上嚟嘅，係咪冇再學日文喇？」
Yeesa︰「之前Ryan已經幫咗我好多，依家我都有學緊㗎，不過係自己睇書上網學，唔想打攪Ryan咁耐嘛！」
Ryan媽：「打咩攪吖，就算你唔搵Ryan學日文，都可以多啲上嚟搵吓我㗎嘛。Ryan呢一年做嘢又忙，芷晴讀書又係，出年就考公開試喇，應該都會經常去自修室。就當係陪吓我呢個老人家啦！」
Yeesa︰「伯母你邊算係老呀！」
Ryan媽哈哈大笑，心想Yeesa真的很懂氹老人家開心。
Yeesa︰「係呢伯母，我想問吓，Ryan飲唔飲酒㗎？」
Ryan媽：「酒？哈哈，唔好提酒喇，我諗起都驚。」
Yeesa︰「吓，咩事呀？」
Ryan媽：「睇嚟呢啲事Ryan都應該冇講過俾你聽。唉，唔講喇，又唔係啲咩好嘢，費事影響佢喺你心目中嘅形象。」
Yeesa︰「伯母你講俾我聽啦，我唔會話俾Ryan知你講過俾我聽。」
Ryan媽：「其實Ryan酒量真係好差，可以用極差嚟形容，飲兩啖啤酒都會頭暈嗰種。就喺大約唔知幾多年前，佢同佢上一任個女朋友分手，當時佢真係好似晴天霹靂，喊咗好幾晚。之後有一朝我起身，見到廳嘅嘢亂晒，以為有賊入屋，點知原來係Ryan飲醉酒，掃跌晒啲嘢。」
Yeesa︰「乜咁激呀！」
Ryan媽：「當時嚇死我同芷晴呀，之後Ryan同我哋道歉，話以後都唔會再飲酒。而經過嗰晚之後，Ryan就冇再自暴自棄喇，重新振作。所以酒呢樣嘢，Ryan係唔可以掂㗎！」
Yeesa點頭贊同。
Ryan媽：「做乜冇端端咁問？你見到Ryan飲醉？」
Yeesa︰「唔係呀，八卦問吓者！」
Ryan媽：「如果佢再飲酒，我諗都係關感情事，仲要係極度傷心嗰種。」
Yeesa︰「係。咦，廚房有冇嘢要幫手呀？」
Yeesa立即將話題轉移，同時芷晴也回家。芷晴見到Yeesa上來，也非常高興，立即捉住Yeesa講視覺藝術的話題。
※※※※※※※※※※
她們吃完晚飯，再吃生果，Ryan也未回家。Ryan現在在壽司店工作，工作時間長，有時真的會很晚才回家。Yeesa也是時候離開。
在回家的路途上，Yeesa很想碰見Ryan，可惜事與願遺。她決定在便利店買下魚蛋，然後坐在自助洗衣店門口的椅子上，邊食邊等，等Ryan會下班回來經過此地。
等了將近半小時，還未見Ryan的蹤影。Yeesa心想，可能上天覺得未是時候，決定回家再算。就在打開大閘之際，她看見Ryan。
Yeesa︰「Ryan！」
Ryan︰「Yeesa？頭先芷晴whatsapp我話你上咗我屋企食飯，九個字之前你已經走咗，我仲以為會撞唔到你添！」
Yeesa︰「你係咪好唔想撞到我吖！」
Ryan︰「你知我唔會咁諗㗎！」
他們二人在附近公園的長椅上坐著，一起吃著Ryan買的零食。
Yeesa︰「點解你會隨身帶住我鍾意食嘅零食嘅？」
Ryan︰「冇呀，我唔小心買多咗，又唔小心放咗落袋喳嘛！」
Yeesa︰「嘻嘻，好假呀你！」
Ryan打開他的袋，將所有零食倒出來。Yeesa見到所有都是她喜歡的零食。
Ryan︰「每次行過便利店，都忍唔住買一樣，買買吓就買咗咁多。我都唔知會唔會有送到俾你嘅一日。」
Yeesa︰「傻佬嚟㗎你真係！」
Yeesa有少許想哭的感覺，但忍住了。
Yeesa︰「好多謝你呀，我好鍾意你整俾我嘅蛋糕，好鍾意你刻咗字嘅砌圖，好鍾意你預備俾我嘅零食。我從來都冇嬲過你衝動去打人，我只係嬲我自己。」
Ryan︰「你嬲自己啲咩？」
Yeesa︰「我嬲我自己有拖延症，成日唔嗲唔吊，個人pea吓pea吓，啲嘢揼得幾耐得幾耐。因為我好驚做決定，我好驚自己揀錯，我好驚面對揀錯咗之後嘅責任，所以我寧願唔揀，因為咁樣係最安全。」
Ryan︰「所以，你覺得未ready？」
Yeesa︰「我唔知呀。」
此時，Ryan握著Yeesa的手，今次Yeesa沒有縮開。
Ryan︰「其實有陣時啲嘢，唔一定要等完全ready先開始㗎，只要相信自己嘅感覺咁就夠㗎喇。」
Yeesa︰「可能真係要兩個人一齊行，一齊摸索，先會知道將來發生咩事。但係，我好怕我哋冇將來，2020年我可能會死……」
突然，Yeesa按著自己的頭，狀甚痛苦。