【二月廿九番外篇】《沒有穿越的平行時空》: 第二十一章 測謊
第二十一章 測謊
在接下來的兩個多月，Yeesa跟Ryan的關係，沒有任何寸進。看似已經萌芽的關係，因Yeesa再次看見閃影，而停滯不前。反而Yeesa和家聰之間的心靈深處，自從坦承分享了各自對愛情的看法後，似乎成功被接通了。
辰叔的文具鋪被加租一萬，根本不能再繼續維持下去，唯有做完剩餘的三個月租約之後，就光榮結業。
嘉嘉終於和Timothy分手。兩人對工作和價值觀都有很大的差距，互相覺得對方越來越陌生，終於分手收場。至於Fiona，雖然大步檻過，但因為為了保住自己而犧牲了BB的生命，每次她見到人家的BB，便對自己非常自責，所以這幾個月來，Fiona生活得並不開心。
直至到聖誕夜，一個普天同慶的日子，各人也有不同的慶祝方式。Yeesa決定參加神聖幾何的聖誕派對，反而身為會長的家聰，因鄙視熱鬧的節日氣氛，而選擇留在家中渡過。
至於Ryan，當然要留在壽司店工作。他眼見一對對情侶，甜蜜地在店內享受著聖誕餐，心裡有點不是味兒。他不知自己還可以再做甚麼，去進一步拉近他與Yeesa之間的距離，唯有盲目地將所有心機專注在工作上。壽司店老闆看見Ryan工作認真，任勞任怨，心裡非常佩服Ryan，佩服他以這樣的年紀，還有這股衝勁去做事。
神聖幾何的聖誕派對，除了會長之外，其餘五人也在場，芷晴和Yeesa也有參與。吃過聖誕大餐後，是時候玩party game。
巴西龜提議玩「Truth or dare」，大家都笑巴西龜無新意，巴西龜立即取出他的最新發明「測謊機」，對講出真心話的人進行測謊，測出說謊就要喝酒。大家都很踴躍地測試一下測謊機的準確性。
關羽：「我覺得我好靚仔。」測謊機顯示真心話。
眾人也一致認為巴西龜的新發明不準。
巴西龜：「佢話『佢覺得』吖嘛，梗係啱㗎！」
耶穌：「好，我試下。我好靚仔！」測謊機顯示講大話。
關羽對耶穌說：「唉，唔好灰心，我覺得你得㗎！」測謊機顯示講大話。
大家的情緒非常高漲，大聲喝采。
他們開始玩測謊truth or dare。他們用轉酒樽的形式決定哪個人要玩，第一個被抽中的是巴西龜，他選擇了「Truth」。
Alien︰「你有冇諗過離開會長？」
關羽：「你呢條問題會唔會太gay？」
巴西龜：「有㗎，之前會長踩我個新發明，仲係要體無完膚嗰隻，攪到我心灰意冷。當時我有諗過走㗎，但佢趁我唔喺度嘅時候，私底下幫我upgrade咗部機。其實會長把口係衰，monotone冇感情，其實佢都係關心我，所以決定以後唔再離開佢。」測謊機顯示真心話。
耶穌：「嘩，你講嘢實在太肉麻，頂唔順喇，下個啦！」
下一個被抽中的是芷晴。當芷晴想講揀「Truth」還是「Dare」的時候，巴西龜突然插咀，說幫她揀「Truth」，立即打蛇隨棍上，問芷晴是否喜歡會長。芷晴霎時滿臉通紅，大叫痴線。在場所有人當然不會放過此機會，迫芷晴講出真心話。
芷晴：「冇呀，我冇鍾意Dr Yu呀！」測謊機顯示講大話。
其實神聖幾何的人一早看穿芷晴是喜歡家聰，不過Yeesa不知，只知芷晴只是崇拜他。芷晴大罵測謊機是壞，完全不準確。
第三個被抽中的是Yeesa。今次輪到芷晴硬來，替Yeesa揀「Truth」。
芷晴：「你鍾唔鍾意阿哥？」
Yeesa被芷晴突如其來的一問，顯得不知所措。
Yeesa︰「芷晴呀，有啲嘢唔係咁方便喺度……」
芷晴：「係就係，唔係就唔係！」
Yeesa︰「即係有啲嘢唔係咁容易就解釋得到！」
跳掣：「原來Yeesa鍾意咗第二個！」
耶穌：「果然唔係所有嘅平行時空都係一模一樣！」
巴西龜：「會長都係要孤零零一個。」
芷晴：「你哋講緊咩呀，點解我唔明嘅！」
Alien︰「其實係咁，之前Yeesa見到喺另一個嘅平行宇宙入面，會長係佢嘅男朋友。」
芷晴：「吓？」
Yeesa︰「你唔明㗎喇，我遲啲再解釋俾你聽啦芷晴。」
芷晴未知Yeesa有閃影的事，所以顯得一臉茫然。
巴西龜：「喂，Yeesa，你未答問題呀，究竟你鍾唔鍾意Ryan？」
神聖幾何眾人和芷晴都一同迫供，迫Yeesa回答問題，Yeesa顯得相當無奈。
Yeesa︰「唉，我唔鍾意Ryan呀！」測謊機顯示講大話。
芷晴非常同意測試結果，而其他人則感到失望。
跳掣：「巴西龜部機真係壞㗎，都唔準嘅。」
芷晴：「唔係吖，我覺得好準喎！」
巴西龜：「啱啱先話完我部機係壞，依家又話準，你都幾雙重標準㗎喎！」
芷晴向巴西龜做出一個不屑的樣子。
Yeesa︰「唔好再講呢個話題喇，至多我飲喇。」
之後大家收拾心情，興高采烈地繼續玩，渡過了一個愉快的聖誕夜。
※※※※※※※※※※
Ryan放工回家，特意買了芷晴最喜歡吃的夕張蜜瓜做聖誕禮物。
芷晴：「阿哥，究竟咩係閃影？點解Yeesa姐姐會有閃影？點解佢會見到另一個世界，Dr Yu係會同佢拍拖？」
Ryan︰「你點知㗎？」
芷晴：「今晚我去咗神聖幾何嘅聖誕party，Yeesa姐姐都有去，係佢哋同我講㗎！」
Ryan︰「哦，咁我講俾你聽啦！」
Ryan將所有Yeesa曾經出現過閃影的事說給芷晴知。
芷晴：「Yeesa姐姐原來有啲咁嘅經歷！」
Ryan︰「你信唔信呀？成件事咁科幻！」
芷晴：「信，你知我信呢啲嘢㗎，係你唔信者！」
Ryan︰「Yeesa件事唔輪到我唔信，不過我想講，我覺得另一個平行宇宙嘅嘢，係唔一定會喺我哋呢度出現。我相信Yeesa 2020年係唔會死。」
芷晴：「有時命運嘅嘢，唔到你唔信。唉，點解我哋兩兄妹會咁命苦？各自鍾意嘅人偏偏係一對！」
Ryan︰「粵語殘片咩！」
Ryan一聽到「命運」二字，又想起了自己與Yeesa之間的關係。莫非命運真的操控著他們？他們注定不會在一起？Yeesa命中注定是和家聰一對？
芷晴：「講個好消息你知吖！」
Ryan︰「講嚟聽吓有幾好。」
芷晴：「對你嚟講係非常好。巴西龜有部新發明，係測謊機，我覺得幾準。我哋玩Truth or dare嘅時候，我迫Yeesa姐姐講鍾唔鍾意你，最後佢講咗出嚟。」
Ryan︰「佢點講呀？」
芷晴：「佢喺我哋面前梗係講唔鍾意你啦，測謊機話佢講大話。」
Ryan知道Yeesa心裡是喜歡自己，立即感到釋懷。
Ryan︰「我相信如果Yeesa話『佢唔鍾意余家聰』，部機都係話佢講大話。」
芷晴：「點解你講呢啲感情事嘅時候，可以咁鎮定、咁冷靜嘅？」
Ryan︰「我始終相信命運唔係必然，係可以改變㗎，就好似愛情咁樣從來都要靠自己把握同爭取。」
芷晴：「哥，我唔上哲學班喇，Dr Yu只會鍾意Yeesa姐姐一個。」
Ryan︰「仲以為你真係要搵啲咩人生意義，原來係課金"目及"仔。不過我係絕對支持你唔上哲學班嘅！」
※※※※※※※※※※
其實Yeesa在此之前，也很擔心自己只是感激Ryan為她所做的事，實質對Ryan沒有愛意，但測謊機反映出她內心所想。而Ryan知道Yeesa心裡其實有喜歡他，也是一個很重要的指標，去確立他所做的事情並不是徒勞無功。
當然，Ryan也太了解Yeesa的性格。Yeesa沒有確認他們的關係，除了她未完全解決閃影的問題之外，她心裡一定留有家聰的位置。Ryan想改變命運，並不容易，他不想強求，也不想與Yeesa走得太近，令Yeesa再次有閃影而受苦，還是繼續這段若即若離的關係。
在一次閨蜜聚會當中，Yeesa和Fiona的心情明顯低落，比失戀不久的嘉嘉更差。
嘉嘉：「你哋做咩呀，我同拍咗拖八年嘅男人分手，都冇你哋依家個樣咁慘！」
Yeesa︰「唉！」
嘉嘉：「仲係煩緊嗰兩個男人？」Yeesa點頭。
Fiona︰「咁好簡單者。唔好理其他外在因素，唔好理其他人點諗，唔好理邊個對你好啲，你依家合埋雙眼，第一個諗到嘅係邊個？」
Yeesa︰「咁老土，又求其！」
Fiona︰「一啲都唔求其，愛情嘅嘢唔好諗得太理性，愛情係要講感覺，係感覺呀！」
Yeesa嘗試閉起雙眼，看看究竟第一個會想起誰。嘉嘉和Fiona都很緊張Yeesa的答案，但Yeesa很久也未張開眼。他們很擔心Yeesa突然又有閃影，也不敢貿然騷擾她。
Yeesa張開眼，並將答案講給嘉嘉和Fiona聽。
嘉嘉：「嗱，你依家有答案啦，唔好再煩喇。到你喇Fiona！你係咪仲係好掛住BB！」
自從10月1日之後，Yeesa一直都煩住感情事，忽略了Fiona。幸好嘉嘉一直都有留意住Fiona，Jonathan也有向她提及過。
Yeesa︰「Sorry呀Fiona，其實罪魁禍首係我。如果我冇閃影呢啲經歷，一定唔會阻礙你嘅決定。」
Fiona︰「傻啦，如果唔係你，我一早已經死咗啦，仲可以同你哋傾到偈咩！」
嘉嘉：「你記得有咩事諗唔通，就同我哋講，唔好收收埋埋。」
Fiona︰「知道啦！」
其實Fiona心裡面，仍然想著自己放棄BB的事，最無辜就是BB，她為了生存而放棄了BB，等同殺死他一樣。有好姊妹傾訴，可以短暫舒緩她內心的哀傷，但仍未能完全讓她釋懷。