【二月廿九番外篇】《沒有穿越的平行時空》: 第十八章 過渡
第十八章 過渡
此時，Ryan看見寫在家聰和Yeesa中間的「男朋友」三個字。
Ryan︰「男朋友呀！你哋都未開始，我就係第三者！你話俾我聽，你係咪鍾意Yeesa？」
家聰：「你醉喇，我幫你call車。」
Ryan捉著家聰的上衣，道：「唔夠膽講呀？」
家聰撥開了Ryan的手，道：「你好喇吓！」
Ryan揮拳打中家聰的臉頰，家聰不示弱，立刻揮拳還擊。兩個大男人，就這樣大打出手，一直在混戰當中，直至巴西龜回到基地，才成功分開二人。
巴西龜送了Ryan上的士，便返回基地。家聰叫巴西龜千萬不要將今日他與Ryan打架的事說給其他人知，巴西龜答應。
※※※※※※※※※※
翌日晚上，Yeesa下班後，順路去探家聰的外婆，剛巧家聰也在外婆家。Yeesa見到家聰臉上有瘀痕，立即問家聰原因。家聰回答是撞傷，沒有大礙，Yeesa也不以為然，沒有追問。
趁家聰在廚房執拾的時候，家聰外婆靜靜跟Yeesa悄悄話：「睇嚟你唔係太了解家聰。」
Yeesa︰「吓，咩事呀？」
家聰外婆：「家聰做事一向小心，我從未見過佢撞傷塊面。」
Yeesa︰「咁你覺得係咩事？」
家聰外婆：「知唔知佢最近有冇同人爭執過？」
Yeesa︰「應該冇喎！」
家聰外婆：「我覺得係同人打交囉。細個嗰陣同人打交，番到嚟屋企問佢做咩事，佢回答嘅方法同語氣，同頭先我問佢係一模一樣。Yeesa，多啲了解一下家聰啦，你係佢女朋友嚟㗎！」
Yeesa︰「知道喇。」
家聰送Yeesa回家的時候，Yeesa決定問清楚家聰傷勢的來源。
Yeesa︰「喂，你唔好扮嘢喎，你塊面啲瘀傷唔似撞傷喎。」
家聰：「唔似撞傷，咁似咩傷？」
Yeesa︰「俾人打傷囉！」
家聰：「我行過公園，俾個細路個波省中吖嘛！」
Yeesa︰「古古怪怪咁，唔理你喇。我上去喇，拜拜！」
※※※※※※※※※※
第二天，Yeesa想約Ryan出來吃晚飯，Ryan推說最近壽司店太忙，不會有時間出來吃到晚飯。Yeesa問Ryan何時放假，Ryan答最近人手不足，他也不知何時才可以放到假。Yeesa也不想再問下去。
Yeesa覺得Ryan有些古怪。她心想，莫非是她上次拒絕了Ryan，所以Ryan想避她？她決定下班後到壽司店找Ryan。
Yeesa來到壽司店，不見Ryan蹤影。她詢問店員Ryan在哪裡，店員說Ryan請了三天假，現在不在壽司店。
Yeesa覺得很奇怪，為何Ryan要講大話騙她。她whatsapp問Ryan在哪裡，Ryan仍然推說自己正在上班。Yeesa決定直接上Ryan屋企找他。
Ryan的確在家。兩日前他和家聰打架，實際上Ryan比較傷，因為喝醉的是他，神志不清下被打的時間居多。他臉上有兩處瘀痕，很礙眼，所以索性請三天假，在家休養。幸好芷晴跟了母親上大陸拜山，這幾天都不在香港，暫時沒人發現。
Ryan聽到門鐘響，他以為外賣到，於是不看防盜眼就開門，才發現原來是Yeesa。今次真的完全「斷正」！
Yeesa︰「做咩你塊面傷成咁？」
Ryan︰「冇嘢，唔小心仆親，撞成咁。」
Yeesa︰「咁你做乜同我講大話吖？」
Ryan︰「唔想你擔心吖嘛，咪呃你話我冇事照番工囉。」
Yeesa︰「馬智浩，我想知道真相，我唔想你呃我。」
Ryan聽到Yeesa叫他全名，知道事態嚴重，而且如果他再繼續說謊，到時被Yeesa知道真相，Yeesa一定會更討厭他。於是，他最終對Yeesa從實招來，說出兩日前打架的事。
Ryan︰「Sorry呀Yeesa，我今次承認係我太魯莽，同埋我唔應該飲咁多酒。」
Yeesa︰「做乜你要走去打家聰？呢件事同佢一啲關係都冇！」
Ryan︰「我知我依家講咩都冇用，我只係想講多一聲sorry。我遲啲會去學會嗰度親自同佢講！」
Yeesa︰「我唔想再諗呢件事喇，你好好休養啦，我走喇！」
Ryan知道他自己今次闖禍，會令Yeesa對自己的印象大打折扣，也增加了Yeesa現時的煩惱。Fiona的事一日未完全解決，Yeesa一日都不會安心。Ryan非常後悔自己喝醉了酒，以致犯下這個不必要的錯。
※※※※※※※※※※
今天，是Fiona做手術的日子。身為Fiona的好姊妹，Yeesa和嘉嘉也在醫院，陪伴著Joanthan和Fiona的家人，一同為Fiona打氣。
在等候Fiona手術的途中，嘉嘉發覺Yeesa一副沒精打采的樣子。
嘉嘉：「做咩呀你，太緊張Fiona嘅手術？唔使擔心，Fiona嘅手術風險唔算好高，你放鬆啲啦！」
Yeesa︰「我知，我相信Fiona一定會大步檻過。我煩緊另一樣嘢。」
嘉嘉：「如果唔係擔心Fiona嘅事，咁就係男人嘅事啦！」
Yeesa︰「唉！」
嘉嘉：「講嚟聽吓啦！」
Yeesa將之前Ryan向她表白、她拒絕了Ryan、Ryan醉酒和家聰打架的事，原原本本講給嘉嘉知道。
嘉嘉：「乜咁激呀，兩個男人為咗你打交喎！」
Yeesa︰「唉，我都唔知點算好。」
嘉嘉：「Ryan做乜咁唔爭氣，飲醉酒仲要打人呀！」
Yeesa︰「我唔知呀，之前我識嘅Ryan唔會咁樣。」
嘉嘉：「梗係你傷咗人個心在先啦，咁樣拒絕人！明明你對Ryan都有意思，點解你唔試吓同Ryan拍拖喎？」
Yeesa︰「我都冇直接拒絕佢，只不過我想確定自己係咪真係過到2020年嘅生日喳嘛！」
嘉嘉：「你仲要唔係拒絕佢，而係拖住人。呢啲都係你嘅藉口啦，咩過唔過到生日，你分明心裡面已經有家聰，你又唔認。」
Yeesa︰「我……我唔係呀……我都唔知點算。依家佢哋打交，打完又唔俾我知，我都唔知點收科。」
嘉嘉：「見步行步啦。嚟緊呢半年都係Fiona康復嘅關鍵時期，我哋就專心陪住Fiona啦，男人嘅嘢就唔好理住啦！」
Yeesa決定在2018年10月1日前，即另一個平行宇宙的Fiona可能因癌症離世的日子之前，都不再想感情事。
※※※※※※※※※※
Fiona的手術相當成功，但要再配合一段後續的治療，才可確保癌細胞不會擴散。
在這半年的時間，Yeesa漸漸疏遠了家聰和Ryan，但仍然有聯系。Yeesa曾經在街上遇見Ryan，但只是彼此談談各自的近況，Ryan也不想在10月1日前再生其他支節，不做勉強Yeesa的事。至於家聰，Yeesa也有定時探他的外婆，也有兩次碰到家聰，但情況與Ryan一樣，Yeesa也沒有跟家聰再有進一步的關係，只是在婆婆面前故作和家聰親密而已。
終於到10月1日，三姊妹還故意約在嘉嘉的家裡過夜，一同見証著Fiona成功渡過10月1日，成功扭轉了另一個時空的Fiona在10月1日前會因病去世的局面。
Fiona︰「多謝你哋兩個喺呢半年裡面一直陪住我，猶其呢半年Jonathan喺事業上真係好忙，唔係有太多時間可以陪到我。好多謝你哋！」
說罷，Fiona忍不住哭，嘉嘉和Fiona在旁加以安慰。
Fiona︰「我冇事，喜極而泣者！我依家冇死到，即係證明我哋呢個時空，任何事都可以改變，第二個時空所見到嘅嘢，未必會發生。」
Fiona將目光放在Yeesa身上。
Yeesa︰「做咩呀？」
Fiona︰「你2020年都會大步檻過㗎！」
嘉嘉：「係啦，唔好再用呢個藉口去拖住Ryan喇！」
Yeesa︰「你又講咗去邊呀！」
Fiona︰「嘉嘉之前講咗你啲嘢我聽喇！我依家已經冇事，最近一次檢查都見唔到有癌細胞，你就放心去搵番你嗰兩個男人啦！」
Yeesa︰「我諗起佢哋就覺得好煩！我寧願佢哋都冇鍾意過我！」
嘉嘉：「嘩，晒命咁話喇吓！你捨得佢哋㗎喇咩，一個嘅說話充滿住哲理，教你搵人生意義，一個就柔情暖男，等你等到2046都會制……」
Yeesa︰「夠喇！瞓覺喇！」
三人在一片嬉戲聲中渡過10月1日的凌晨。
翌日早上，Yeesa回家，看見一個蛋糕盒放在飯桌上。