【二月廿九番外篇】《沒有穿越的平行時空》: 第十七章 表白
第十七章 表白
Ryan︰「Yeesa！」
Yeesa拿高她買來的蛋糕，示意她買了蛋糕給Ryan吃。Ryan在此時此刻見到Yeesa，顯得異常開心。
Yeesa跟Ryan進入壽司店，坐在吧枱位置。
Yeesa︰「上次你喺我最唔開心嘅時候陪住我，幫我諗點樣解決問題，我都仲未多謝你。嗱，個蛋糕係我特登買俾你食㗎！」
Ryan打開蛋糕盒，發現蛋糕已經走了樣。
Yeesa︰「唔好意思呀，頭先拎住個蛋糕嗰陣可能動作太大，Sorry呀！」
其實Ryan又怎會介意，只要是Yeesa請他吃，任何食物都會變得美味。
Ryan︰「咁當份子料理食啦。嘩，好好味呀！」二人都笑得合不攏嘴。
Ryan︰「上次我整俾你食嗰個生日蛋糕，好唔好食呀？」
Yeesa︰「吓！死喇，我太掛住Fiona件事，我已經忘記咗。我放咗入雪櫃，之後冇再理到喇。對唔住呀！」
Ryan︰「唔緊要啦，蛋糕可以再整過俾你食，但你有冇留意過個蛋糕盒？」
Yeesa︰「我相信隔咗咁耐，個蛋糕應該發咗霉，成個盒應該已經俾阿爸丟咗，佢又唔食甜嘢。個盒係咪有特別嘢㗎？」
Ryan︰「冇特別嘢。」
Yeesa︰「Sorry呀，唔好嬲啦！」
Ryan︰「咁要懲罰喎！」
Yeesa︰「吓，懲罰！咩懲罰呀！」
Ryan︰「罰你做白老鼠囉！」
Ryan走入吧枱的開放式廚房，預備再整玉子燒給Yeesa吃。其實Ryan在學師頭半年，都只是做雜務、切椰菜、蘿蔔之類的工作，那有機會做玉子燒。只是他間中在晚上所有同事都離開的時間，偷偷自學做玉子燒，希望可以做到一個滿意的給Yeesa。
在Ryan整玉子燒的時候，有電話打來找Yeesa，應該是神聖幾何的人。聽Yeesa與對方的對話，大概是他們要Yeesa下次回學會基地時，幫他們買東西，Yeesa還打趣地責備他們得寸進尺。Ryan聽到又是那個奇怪學會的人找Yeesa，心裡再次感到不是味兒，因為他覺得，一日都是那個余家聰做學會會長，這個學會都不會是好東西。
Ryan預備好玉子燒，讓Yeesa試食。
Yeesa︰「唔……係有進步嘅，不過仲有好大嘅進步空間。」
Ryan聽到這個評語，決心要在未來的日子繼續苦練玉子燒。
在這個二人獨處一室的情況之下，增加不少Ryan的勇氣。上次曾有機會向Yeesa表白，但無功而還。Ryan覺得機會可一不可再，而且他知道這段時間Yeesa和家聰之間的關係非常密切，錯過了可能會恨錯難返，於是再次鼓起勇氣，向Yeesa講出心底話。
Ryan從廚房走出來，坐在Yeesa旁邊。Yeesa叉了一塊玉子燒，並遞給Ryan。
Yeesa︰「你都試吓啦！」
Ryan︰「Yeesa，其實我有啲嘢想同你講好耐㗎喇！」
Yeesa聽到Ryan突如其來的認真，好像感覺到Ryan想講甚麼。
Ryan︰「嗰次你喊呢，唔知點解，我個心都好唔舒服。後嚟我知道喇，原來你唔開心，我都會好唔開心。有人話呢，原來鍾意一個人，其實自己都控制唔到㗎！其實我識咗你之後，你真係影響左我好多㗎，就好似呢，我辭咗我超市份工，我嚟咗呢度做……」
Yeesa︰「做咩咁突然呀？」
Yeesa打斷了Ryan說話。她不知如何是好，唯有中斷他的說話，並迴避他的眼神。
Ryan︰「Yeesa……」Ryan捉住了Yeesa的手，但Yeesa隨即鬆開。
Yeesa︰「Ryan，我呢一刻淨係想專注喺Fiona件事度，我想陪佢捱過咗呢一關先……」
Ryan︰「我明嘅，我可以等㗎！」
Yeesa︰「而且，我唔可以咁自私，因為我生命裡面，仲有幾個對我好重要嘅人……」
Ryan︰「重要嘅人呀。」
Yeesa︰「我唔知點講呀，當有啲人對你變得重要，你人生每一個重大決定，都會考慮埋佢地嘅感受。」
Ryan仍然不放棄：「我可以陪你㗎，以後無論有啲咩，我地兩個都一齊去面對吖，好唔好？」
Yeesa︰「你俾啲時間我吖，或者等Fiona個病好番，或者等我真係過到2020年嘅2月29……」
Ryan︰「我明呀Yeesa，你都俾啲時間我吖，我會努力㗎，我都希望有一日，可以成為你生命裡面一個好重要嘅人。」
Yeesa望著Ryan，報以一個微笑，並將玉子燒遞給Ryan。Ryan為免大家尷尬，很快將話題轉移到Fiona身上，大家也暫時忘卻剛才的事。
※※※※※※※※※※
Ryan回家後，攤在床上，回想剛才表白時的細節。他覺得現時是在最差的狀況，Yeesa沒有直接拒絕，只採取拖字訣，希望自己能渡過2020年的生日，過得到再算。
Ryan想仔細去解讀Yeesa的回答。Yeesa說想先處理Fiona的事，Ryan完全明白，而且這也只是半年左右的事。但Yeesa再說，想等到2020年2月29日，這也未免想得太遙遠吧。更何況，Ryan一直覺得，2020年未必會有大事發生，他慨嘆Yeesa為何不給他機會。他在想，他寧願被Yeesa拒絕，也比現在好。
是家聰。Ryan再想深一層，一定是Yeesa心裡有了家聰，而此人正是另一個平行宇宙的Yeesa男朋友。家聰可能被Yeesa冠以「另一個時空的男朋友」來看待，Ryan此時根本就是輸在起跑線上。
但Ryan沒想過放棄，就算要他等待，要他的狀況像「兵」一般的生活在Yeesa身邊，他也願意，因為Ryan知道，他確實是深愛著Yeesa。
翌日Ryan放假。心情鬱悶的他，返回以前工作的超市，找Thomas閒聊吹水。Thomas見Ryan為女而煩惱，於是開了兩罐啤酒，一邊飲一邊吹水。
不過，Ryan本身不懂飲酒，以前也曾經試過酒醉，差點反轉了屋企，他本來並不想再飲酒。但飲了兩啖，覺得醉了還好，可以暫時忘卻煩惱，於是一直飲，一直飲，飲了不知多少罐啤酒，即時醉倒現場。
此時，Ryan收到電話，是妹妹芷晴打來，叫他幫忙交哲學班的學費。他一聽到是哲學班，又是和余家聰有關，好像他身邊的人都和余家聰有關，每個人都喜歡他。Ryan一時無名火起，立即狠狠地將手機擲在地上。這一舉動，當場嚇呆了Thomas，因為他識了Ryan這麼久，完全未見過他如此失控和衝動。
Thomas︰「唔好飲喇，我送你番屋企啦！」
Ryan︰「唔使你送，我自己識搭的士！」
Thomas送了Ryan上的士，原本真的是回家，但Ryan臨時改變初衷，直接去神聖幾何找家聰。
當時，神聖幾何的基地只有家聰一個。家聰見Ryan一副酒醉的樣子，不知他所為何事。
家聰：「Yeesa唔喺度喎。」
Ryan︰「佢點解會唔喺度？你又喺度，我個妹又喺度，點解個個都鍾意你㗎？」
家聰：「你講乜嘢呀？」
Ryan將鈔票大力抛在家聰身上。
Ryan︰「我個妹搵唔搵到人生意義就靠你喇。」
家聰：「無論你想講啲咩，依家都唔適合，不如等你清醒啲再……」
Ryan︰「我好清醒！」Ryan一手推開家聰。
Ryan醉得開始站不穩腳。跌跌撞撞之間，他看見壁報板上寫著Yeesa在兩次閃影時見到的情景分析。當中，最礙眼的詞語，就是寫在家聰和Yeesa中間的「男朋友」三個字。