【二月廿九番外篇】《沒有穿越的平行時空》: 第十一章 有意
第十一章 有意
此時，Ryan拾起了Yeesa丟在地上的信用卡，而Yeesa則握著Ryan的手。有了上次她跟家聰的經驗，Yeesa以為這樣的接觸，會被憶起她與Ryan的閃影畫面。但最終沒有出現任何畫面。
吃過晚飯後，芷晴發覺自己真的阻住哥哥和Yeesa，便說自己有事做，自行離開。Ryan再次跟Yeesa獨處。
Yeesa︰「你個妹都幾得意㗎喎，又聰明！」
Ryan︰「你係第一個讚佢得意嘅人喎，不過佢的確係聰明嘅，至細讀書都好叻，阿爸阿媽啲聰明基因全部都俾晒佢。」
Yeesa︰「我覺得你哋感情幾好吖，你仲要大佢咁多年喎！」
Ryan︰「係呀，相差十幾年㗎，但佢唔好彩，一出世阿爸就走咗。我有份照顧佢㗎，我十幾歲就識得換片、餵奶㗎喇！」
Yeesa︰「係咪要叫你一聲奶爸呀！」
二人笑不攏嘴。
他們經過便利店，不知Yeesa見到甚麼，立即衝入去買東西。Yeesa最終買了新口味魚蛋。
二人坐在自助洗衣店門口的椅子上吃魚蛋。
Ryan︰「你竟然仲未飽？」
Yeesa︰「新口味吖嘛，忍唔住買囉。你想話我大食喳嘛！」Yeesa扁咀。
Ryan︰「我想話你可愛喳。」
Yeesa沒有望向Ryan，尷尷尬尬地低頭吃著魚蛋。當她想篤下一粒魚蛋之際，魚蛋汁濺中Ryan的襯衣。
Yeesa︰「對唔住呀，我真係輪盡。」
Yeesa連忙拿出紙巾幫Ryan抹去衫上的污跡。他們二人的距離很近，大家又再次有心跳的感覺。
Ryan不知哪裡來的勇氣，捉住了Yeesa的手。他想趁此時此刻向Yeesa表白，立即心跳加速。
突然，Yeesa再次閃起Ryan的畫面。
Ryan︰「Yeesa，我……」
Yeesa︰「Ryan，你唔好講嘢住，你繼續捉住我隻手先啦。」
Ryan覺得Yeesa這個要求很奇怪，但也照做。
Yeesa合著雙眼，將頭挨在Ryan。Ryan的心跳更加急促，但他不想破壞此時的氣氛，而且剛才Yeesa也說過叫他不要說話，所以他沒有多講半句。
過了大約兩分鐘，Yeesa掙開眼，並停止挨在Ryan身上，也鬆開了Ryan的手。
Ryan︰「Yeesa，做咩呀？」
Yeesa︰「Sorry呀，我冇特別意思，只係我頭先又有閃影，係你嘅畫面。」
Ryan以為Yeesa對他也有意思，才做出剛才的舉動。當他得知Yeesa只是別有用意，頓時感到失望。
Ryan︰「咁，你見到啲咩？」
Yeesa︰「我見到，我突然出現喺札幌嘅電車站路軌，係你救咗我，所以我頭先咁肉緊挨住你，其實係我暈咗喺你嘅身上，所以做咗啲反射動作。」
Yeesa怕Ryan有誤會，特別解釋了剛才為何將頭挨向Ryan身上。
Yeesa︰「之後我醒番，喺醫院。你問我今年係咩年，我話係2017年，你個樣變得好無奈。之後你見我肚餓，就請我食你親手整嘅玉子燒。」
Ryan︰「玉子燒？我唔識整㗎喎。」
Yeesa︰「我見到我食咗一啖，個樣好驚訝，應該係好好味，之後我極速食晒成盒玉子燒。」
Ryan︰「跟住呢？」
Yeesa︰「跟住你走咗去打電話，之後就話有事要做，叫我唔好離開醫院，你就走咗喇，畫面就消失咗。」
Ryan有點兒失望，因為Yeesa腦裡閃起的畫面中，只有余家聰說是她男朋友，Ryan自己則甚麼也沒有說，證明那個時空的Yeesa是跟余家聰拍拖。況且，剛才Yeesa多番強調，她剛才的所有舉動都只是為了看清楚閃影時的畫面，沒有其他意思，足以證明她對自己沒有那種感覺。
Ryan︰「唔好諗咁多喇，拿拿臨食埋啲魚蛋，我送你番屋企啦！」
※※※※※※※※※※
今天，Yeesa獨自去神聖幾何的基地，和他們討論有關她閃影的事。
家聰吸了一口煙，在黑板上寫出他們分析到的資料。
家聰：「最初我哋係諗到有兩個可能性，第一，係預知再加穿越。但當日Yeesa嘅閃影畫面已證實咗，Yeesa observe到嘅時空，根本唔係我哋宜家身處嘅時空，因為喺2017年2月28日我哋嘅Yeesa根本冇穿越過，只係出現閃影，而Yeesa observe到嗰個2017年嘅自己，係真真正正有穿越去2020年2月29日嘅北海道。」
Yeesa和神聖幾何眾人都同意。
家聰：「宜家只剩番第二個可能性，就係Yeesa睇到嘅係另一個平行時空嘅自己。嗰個平行時空嘅Yeesa，因某一啲嘅因素，啟動咗穿越嘅能力，令2017年嘅Yeesa有能力穿越去2020年嘅北海道。而我哋身處呢個時空，Yeesa冇穿越能力，但會睇到有穿越能力嗰個Yeesa嘅時空所發生嘅嘢。」
Yeesa︰「咁點解我依家會冇呢個能力，而另一個時空嘅自己又有嘅？仲有，點解又會有兩個平行宇宙嘅？」
家聰：「上次講過嘅多世界詮釋，呢個世界有無限個分裂出嚟嘅宇宙。情況就好似『Schrödinger's Cat』咁，你一日唔打開個盒，一日都未知會有啲咩可能性。或者仲有機會有第三個平行宇宙，甚至更多。」
關羽：「依家連打開呢個盒嘅機會都冇。」
家聰：「未必。Yeesa，你記唔得你喺出現閃影之前，即係2月28號之前，有冇做過啲咩特別嘢，又或者遇到啲咩特別嘅事？」
Yeesa︰「2月28號之前……等我諗諗先。啊，我記起喇，我轉運呀！」
耶穌：「轉運？」
Yeesa︰「係。其實我由細到大都好黑仔，成日都行衰運。就係喺生日之前一個禮拜左右開始，我發覺我好運咗。本身我冇工番，但突然間有一份書店嘅工等我去做，之前freelance嘅job又好順利收到尾數，之後又有好多freelance等住我去做，之前係完全未試過。」
巴西龜：「咁一定係轉運之前做咗一啲嘢，而令到你嘅磁場有變，先會轉運同出現閃影，我部機先會detect到。」
Yeesa︰「印象中我冇做過啲咩特別嘅嘢。」
家聰：「如果諗唔到唔緊要，我哋依家要集中處理將來可能會發生嘅事。如果Yeesa你係因為某啲原因而得到呢種力量，我相信你出現閃影呢種行為唔只會出現一次。」
Alien︰「會長你係咪講Yeesa可能會出現第二次閃影？」
家聰：「冇錯！上一次Yeesa出現閃影係2017年2月28號同3月1號中間嗰個0時0分0秒，因為Yeesa有2月29號出世嘅獨特性，我相信Yeesa會喺出年、即係2018年嘅2月28號，再一次有閃影，而且好大機會會見到另一個平行宇宙嘅你，喺2018年穿越去2020年時嘅影像。」
巴西龜：「係，呢個諗法好符合邏輯。」
家聰：「所以，Yeesa，你要好好把握出年你生日時出現閃影嘅機會，要記清楚嗰兩分鐘嘅片段。雖然之後可以再用催眠回憶番，但催眠唔一定每次都work。」
跳掣：「你太睇小我喇會長！」
家聰：「成功做到催眠嘅機會率唔係100%，我哋喺預知嘅情況之下，一定唔可以放過佢第一次閃影出現嘅影像。所以，Yeesa，嚟緊你要進行特訓！」
Yeesa︰「吓，特訓？」
家聰：「係，冇錯，係特訓！」
家聰所說的特訓，是記憶宮殿、日文應用和札幌地理。因閃影的畫面可能只有兩分鐘，Yeesa一定要記下她所見到的事物，所以要增強記憶力；而日文應用更是必需，因她會有機會見到日文字，和聽到日本人講日文；認識札幌地理則可令她更快知道地點的所在地。
家聰不信Yeesa突然轉運是因為得到神秘力量，所以暗中去查Yeesa工作的書店和freelance job的來源。
※※※※※※※※※※
在特訓期間，Yeesa並不專心。可能她覺得，另一個平行宇宙的事，就是「這麼近，那麼遠」，一個看似很接近、但又非常遙遠的領域，對自己身處的時空，正如Ryan所講，未必會有影響。Yeesa更在聽家聰的課堂時，偷偷在書中畫下家聰的樣貌。由此看來，特訓未必提高到Yeesa對捕捉閃影的把握，但增進了Yeesa對家聰的感情。
就在其中一次訓練當中，出現了支節。Yeesa因為書店有事，所以遲了足足個多小時才到達神聖幾何的基地。Yeesa覺得是小事，大家都沒有其他怨言，唯獨家聰大發雷霆。
家聰：「攪錯呀你，你知唔知你遲咗幾多呀？成個幾鐘呀，我哋等咗你個幾鐘呀！」
大家見到會長有這反應，都大吃一驚。