【二月廿九番外篇】《沒有穿越的平行時空》: 第十二章 曖昧
第十二章 曖昧
Yeesa︰「Sorry呀，書店有事。」
巴西龜：「唔緊要啦，依家人都到咗啦，我哋開始啦！」
家聰：「我嚟問你，JR札幌站附近有幾多間百貨公司？」
Yeesa不記得。
家聰：「咁札幌有幾多個路面電車站？」
Yeesa也不知。
家聰：「醫院、警局嘅日文點講？」
Yeesa︰「唔識有幾出奇喎，咁短時間點可能記得晒！」
家聰：「我哋呢度好多人都係有正職，放工先抽到時間嚟幫你，而你就根本冇努力過，根本冇重視過我哋，冇尊重過我哋。成日喺度自怨自艾，成日賴自己黑仔。你估你之前真係轉運咩？」
Yeesa︰「你講咩呀？使唔使咁惡呀？」
家聰：「我查過，你依家做緊嘅書店，並唔係嘉嘉嘅親戚，而係佢阿爸開㗎。間鋪喺幾個月前轉咗名俾嘉嘉，佢知道你冇工開，覺得你好可憐，所以先搵你番嚟做。至於你多咗嘅freelance，都係Fiona暗中幫你搵番嚟。你估你真係轉運呀？你係有班朋友可憐你，先暗中幫你喳！」
Yeesa︰「你搵人查我？」
家聰：「你根本唔重視自己嘅未來，冇盡過自己本分，冇為自己人生負責過，無論做啲乜，都淨係識怨天怨地！」
Yeesa已經迅速哭成淚人。
Yeesa︰「好，我自己嘅事自己負責，唔使你粗心。」
Yeesa哭著離開神聖幾何。
※※※※※※※※※※
神聖幾何眾人都覺得會長做得有點過份，暗中查Yeesa的私人事，甚至當眾奚落Yeesa，打擊Yeesa的自信心。事實上，家聰是一個理性的人，不會被情緒影響判斷，而打從心裡想，家聰覺得Yeesa是一個有缺點的女仔，她想Yeesa做人要有責任感，懂得承擔責任，想她有所進步。
況且，在家聰的內心深處，他覺得現時這個時空的Yeesa，真的有機會在未來的2020年2月29日，在札幌因交通意外而死。他不想Yeesa死，非常捨不得她，但他不會將這些心底話講出口，現在只是想辦法喚醒Yeesa，讓她更著緊自己未來的事。
Yeesa傷心回家，但情況「沒有最差，只有更差」。她看見辰叔偷偷將coupon放入信封，而辰叔一見她回來，立刻煞有介事地將信封放入雜物堆中。她終於知道，她之前覺得稍有運氣的小事，如抽獎抽中coupon，也是父親偷偷地為她所做的行為。
Yeesa︰「你哋係咪都係覺得我好可憐，因為可憐我，先至靜雞雞做咁多嘢嚟幫我吖？我做人真係咁失敗？」
辰叔不知他這種行為會惹怒女兒，對女兒的反應有點錯愕。Yeesa憤而離家。
※※※※※※※※※※
Yeesa在街上漫無目的地走著、走著，心情並沒有平復下來。她非常認同家聰說的話，覺得自己做人很失敗，身邊人都可憐她，所以去幫她，沒有他們的幫助就好像生存不到一樣。
就在此時，Yeesa遇到剛下班的Ryan。Ryan見她心情很差，想好好陪著她。她只想好好地靜一靜，Ryan建議到他家的後樓梯坐坐。
Yeesa坐在樓梯已超過十分鐘，一粒聲也沒有出，Ryan不敢貿然去騷擾她，只想讓她自己冷靜一下。
Yeesa又再次想起余家聰罵她的情況，突然再次哭了起來，Ryan連忙遞紙巾給她。
Ryan︰「我可以借個膊頭你挨下，除非你嫌棄佢啦！」
Yeesa抹掉眼淚，回應Ryan︰「嫌棄㗎，骨杉杉，都唔舒服。」
此時Ryan從袋裡拿出他親手做的玉子燒，說：「本來想請你食㗎，係我親手做嘅玉子燒，依家我唔俾你食喇，我自己食番，費事俾人話我骨杉杉啦！」
Yeesa搶去Ryan的玉子燒，說：「你食幾多都係骨杉杉㗎啦，邊關事。」
Yeesa打開蓋，看見形狀古怪的玉子燒，和她閃影時見到的那盒玉子燒，賣相相距甚遠。她知道這是Ryan一心一意為她做的玉子燒，就算賣相很差，心裡仍有少許甜絲絲的感覺。不過，她隨即又想起余家聰的說話。
Yeesa︰「你係咪因為可憐我，所以先整玉子燒俾我食？」
Ryan︰「吓！」
Ryan不知怎樣回應，Yeesa竟然說是自己可憐她才整玉子燒，根本就完全沒有關係。
Yeesa︰「我成世人都好黑仔，黑仔嘅時候真係好黑，好彩嘅時候又唔見得好好彩，你明唔明？」
Ryan搲晒頭，顯得非常無奈。
Yeesa︰「你係咪可憐我，先留番啲特價壽司俾我吖？」
Ryan︰「因為我想請你食囉，就係咁簡單。」
Yeesa︰「我覺得自己真係好無用，突然有新工，突然有freelance，返到屋企又有coupon收，點知原來，係阿爸同朋友，見我好慘，好可憐，唔想我唔開心，先靜雞雞塞俾我。」
Ryan終於知道Yeesa為何這樣難過。
Ryan︰「咁有咩問題呀？」
Yeesa︰「係余家聰講我先知，仲話我只係識怨天尤人，淨係計住幾時好彩，幾時唔好彩，從來都冇為自己嘅將來負過責任。」
Ryan︰「佢真係咁講呀？」
Yeesa︰「係。都係因為我冇用，佢地先咁幫我者，我明嘅！」
Ryan︰「我覺得你成世人都好好彩吖，至少你黑仔嗰陣有人肯幫你，你諗下，如果佢地唔鍾意你，唔覺得你重要，點解要幫你，咁仲唔係好好彩呀。如果我係你，我肯定會好感激佢地呀，就當係自己嘅好運。」
Yeesa心情好了少許，終於吃了Ryan整的玉子燒。
Ryan︰「好唔好味呀？」
Yeesa︰「唔……OK啦！」
Ryan立即吃了一口，原來非常難吃。
Ryan︰「原來我真係冇做廚師嘅材料。」
Yeesa︰「唔係吖，你整嘅壽司好好味呀！」
Ryan︰「邊係我整吖，大部分工序都係機器做。其實，我都想正正式式做個廚師。」
Yeesa︰「咁點解唔做？」
Ryan︰「都做咗超市十幾年，仲出番嚟做咩，講出嚟都俾人笑啦！」
Yeesa︰「你知唔知咩叫做『吸引力法則』？」
Ryan搖頭。
Yeesa︰「當你好想做一樣嘢，你每日諗住佢，就有一日做到㗎喇！雖然唔係一嘢就去到終點，但都叫越行越近吖！」
Ryan︰「你話你自己好冇用，我絕對唔認同你嘅講法！」
Yeesa︰「吓！」
Ryan︰「我聽咗你嘅安慰之後，我突然間充滿正能量，好想即刻去做廚。你就係對朋友好，識得安慰朋友，鼓勵朋友，好在乎朋友嘅感受，朋友先會對你好，根本唔存在可憐你嘅成份。」
Yeesa聽到Ryan這一席話，心裡已再沒有不安的感覺。
Ryan︰「為咗證明你個『吸引力法則』係啱嘅，我會每日都諗住你……」
Yeesa︰「你想講咩呀？」
Ryan︰「……你今日所講嘅每一句說話，到我正式成為真正嘅壽司師傅，我一定會報答你。」
Yeesa︰「點報答先？」
Ryan︰「日日都整嘢俾你食！」
Yeesa︰「你整我就要食㗎喇！」
Ryan︰「你唔食我食，養番肥我個膊頭，等你唔好嫌棄佢。」
Yeesa和Ryan之間，開始了這種曖昧的關係。
※※※※※※※※※※
Ryan回家後，芷晴有事相求，原來她想報讀神聖幾何的哲學班。Ryan一聽到神聖幾何，一聽到余家聰，愉快的心情立刻變差。
Ryan︰「你無端端報咩哲學班，仲要係神聖幾何嘅哲學班！」
芷晴：「你上次睇緊佢哋個YouTube Channel，瞓著咗，咁我又八卦睇吓囉，點知發覺嗰個Dr Yu真係好有學識，好charm，真係好正。」
Ryan︰「呢個人呃飯食㗎喳！你上到大學，大把哲學班你上！」
芷晴：「咁點同呢！嚟啦阿哥，俾我去讀啦！」
由細到大，芷晴想學甚麼，Ryan都會支持，心理上和經濟上都支持。雖然很不願意，但Ryan最終都讓芷晴報讀余家聰主講的哲學班。
第一堂哲學班，Ryan說不放心，要陪芷晴一同前往。現場沒有其他學生，只有芷晴一個，Ryan心想余家聰真的是「呃飯食」。
家聰點起香煙，吸了一口。這個簡單動作，足以令芷晴神魂顛倒。
家聰：「你點解想讀哲學？」
芷晴：「不外乎……都係……探索吓啲人生意義，搵吓答案咁啦！」
家聰：「初時我讀哲學嗰陣都係咁諗。」
芷晴：「咁你搵到未呀？」
家聰：「所謂答案同意義都係相對嘅，當你覺得自己搵到嘅同時，就係另一個問題嘅開始。唔怕老實同你講吖，由你選擇讀哲學嘅嗰一刻開始，你解答唔到嘅問題就會一直跟住你，直到永遠。」
Ryan一邊聽著家聰說哲學的理論，一邊搖頭，愈來愈覺得家聰只是滿口理論，沒有實質學識。但見芷晴聽到如痴如醉，心知不妙，看來芷晴一定會繼續上課。