【二月廿九番外篇】《沒有穿越的平行時空》: 第十章 約會
第十章 約會
Yeesa放開了手，家聰也將水杯放回枱上。他們感到尷尬，但心跳的感覺蓋過了一切。
現場的眾人也看得出來，家聰和Yeesa互相有好感，猶其是家聰，手錶的響聲沒有停止過，証明心跳沒有平復過。
巴西龜做打破尷尬局面的一個：「依家證明到一樣嘢，就係會長同Yeesa接通咗一啲嘢，令到Yeesa可以再次見番第一次見會長時閃起嘅畫面，而且比上次更加詳細。」
耶穌：「而且確認到時間係2020年2月29日，即係三年後Yeesa生日嗰日。」
Alien︰「仲知道Yeesa真係識穿越，不過唔似係呢個時空嘅Yeesa。」
關羽：「距離真相又邁進一大步。」
Fiona︰「各位，不如咁吖，Yeesa都應該好攰㗎喇，不如今日到此為止先啦，之後再傾啦！」
大家一致認同。Fiona、嘉嘉和Yeesa先行離開。
※※※※※※※※※※
她們三人搭的士離開。
嘉嘉︰「頭先真係好嘈呀，余家聰隻錶！」
Fiona︰「唔知佢隻錶係壞咗吖，定係真係心跳加速？」Fiona掩著咀笑。
嘉嘉：「我都心跳加速啦，俾Yeesa隻手捉住成分幾兩分鐘喎！」
Yeesa︰「唉，你哋即管繼續講啦，我係唔會聽㗎！」
嘉嘉︰「喂，余家聰同Ryan，你揀邊個先？」
Yeesa︰「我揀我阿爸。」
Fiona︰「計我話，一於揀余家聰啦，又係會長，又博學多才，又有領導才能，同埋冇想像之中咁高傲同目中無人吖！」
嘉嘉：「我就唔係咁諗喇，一睇就知嗰個余家聰係毒毒啦，開口埋口淨係理論。不過我未見過Ryan，到時見到再幫你做總結。」
Yeesa已不想花精神去回答她們問題，遲些再算。
另一邊廂，神聖幾何各人都沒有再繼續討論Yeesa的事，家聰只顧吸煙，心裡不知在想甚麼。
家聰：「我之前離開香港太耐，好耐未同過屋企人食飯，我走先喇。關羽，你幫我check吓隻錶有冇壞，下次俾番我。」
家聰離開後，大家都將視線集中在關羽手上的手錶。關羽檢查後，劈頭第一句就說：「佢個腦就壞，唔好屈隻錶。」
Alien：「佢個腦冇壞，係心律不正者，哈哈！」
眾人也一同取笑會長這個不尋常舉動。
巴西龜：「上次Yeesa講過將來嘅會長話係佢男朋友，我初時唔信㗎，今日我信喇！」
跳掣：「可能真係Yeesa溶化咗我哋會長嘅心。」
在眾人眼中，會長的世界只有哲學，只有探求真相的心，很少提及感情事。今次，大家都很雀躍，希望Yeesa真的能將他那座冰山劈開。
※※※※※※※※※※
某天中午，Ryan帶著壽司，前來書店找Yeesa。
Ryan︰「上次催眠順唔順利呀？」
Yeesa︰ 「順利，我哋確認咗我見到嘅畫面係真嘅，真係有呢個地方，係2020年2月29號嘅札幌。同埋，我係由2017年嘅香港穿越去2020年嘅北海道。」
Ryan︰「咁，足以證明你睇到嘅時空，唔係我哋依家身處嘅時空，而且未必會影響到我哋。」
Yeesa︰「可能係啦，依家我唔諗咁多喇，余家聰會幫我諗㗎喇！」
Ryan聽到Yeesa提起余家聰，心裡再次感到不好受。
Ryan︰「你唔覺得神聖幾何班人有啲怪怪哋㗎咩？」
Yeesa︰「初時都覺，但後來我覺得佢哋係真心幫我，佢哋雖然怪啲，但講嘅嘢唔係冇道理㗎，相反仲要好有哲理。」
Ryan本想繼續講出自己的看法，但Yeesa收到電話，說辰叔在文具鋪扭傷腳，Yeesa立即離開書店，到文具鋪看辰叔。Ryan陪伴她一同前往。
他們來到文具鋪。
Yeesa︰「做咩咁論盡㗎，整親邊度呀？」
辰叔：「冇事啦，嗰個權叔又係嘅，少少嘢就大驚小怪，咁小事就叫你過嚟。我捽吓跌打酒就冇嘢㗎喇！」
Yeesa︰「你睇吓你吖，成隻腳腫晒喇，仲話冇嘢。我帶你去醫院check吓啦。」
辰叔：「你都痴線㗎，咁小嘢就入醫院。我唔去呀！」
Yeesa︰「冇得唔去呀，我依家就去call車。」
Yeesa到外面打電話call車。
Ryan看見辰叔的腳真的腫了不少，想勸服辰叔到醫院檢查。
Ryan︰「辰叔，我叫Ryan呀，係Yeesa嘅朋友。你不如聽Yeesa講，入醫院check check啦！」
辰叔：「唔使，都話捽吓跌打酒就冇事咯！」
Ryan︰「辰叔，我係做壽司㗎，之前我有同事俾條雪魚整親腳，少少腫以為冇事，繼續跛下跛下做嘢，返屋企腫到成隻鵝蛋咁。之後佢用跌打酒捽，越捽越痛，最終頂唔順去咗醫院。檢查之後發現，本來就輕微骨折，但最終移咗位，要做手術呀，要三四個月先返得工呀！」
辰叔：「吓，係咪真㗎？」
Ryan︰「情況同你一模一樣呀！就算你覺得好小事，但你都做個樣俾Yeesa睇啦，佢真係好關心你㗎！」
Yeesa回來，說無論如何也要抬他上車。
辰叔：「使乜你抬我，我自己識得上車去醫院，唔使你粗心。」
Yeesa覺得驚訝，望著Ryan，Ryan笑而不答。
醫院幫辰叔照了X光，幸好沒有骨折，沒有大礙，開了藥，只叫他休息多點。
辰叔覺得Ryan不似是女兒的普通朋友，為免阻礙他們，他識趣地搭車自己回家。
Ryan和Yeesa並肩而行。
Yeesa︰「你都幾犀利㗎喎，好少有人攪得掂我阿爸。」
Ryan︰「老人家係受軟唔受硬㗎，我阿媽都係咁，有時氹下就冇事㗎喇！」
之後二人有一段dead air。Ryan想打破沉默，開口說話，但Yeesa同時又開口。
Ryan︰「你講先啦。」
Yeesa︰「你依家得唔得閒呀？」
Ryan︰「得呀。」
Yeesa︰「我見今日煩咗你大半日，想請你食餐飯。」
Ryan︰「好呀！」
Ryan正煩惱怎樣開口約Yeesa食飯，現在剛好，很自然就開始了他們的第一次約會。
不過，很快便出現阻滯。Ryan和Yeesa在街上碰到芷晴。
芷晴：「哥！乜咁啱嘅！咦，乜又係你呀！」
Ryan︰「喂，唔好咁冇禮貌，叫人先啦，佢叫Yeesa呀！」
芷晴：「Hello Yeesa！」
Yeesa︰「你係咪叫芷晴呀？」
芷晴：「係呀！你哋去邊呀？係咪去食飯呀？不如一齊吖！」
Ryan心想：「你快啲即刻彈開啦，阻住晒！」最終當然沒有講出口。
Yeesa︰「好呀，一齊啦！我請埋你啦！」
Ryan無奈地讓芷晴一同吃晚餐。
※※※※※※※※※※
芷晴嚷著要吃法國菜，建議一間法國餐廳，她最近才吃過一次，質素不俗，想帶他們去吃。Ryan說不想Yeesa請吃那麼貴的法國菜，芷晴說不會太貴，Yeesa最終也同意。Ryan的心情簡直是跌落谷底。
他們就座後，Ryan看見餐牌全是英文，面露尷尬神色。Ryan中學畢業就出來工作，當年公開試英文科更是「肥佬」。對於突如其來的約會，沒有充足準備之下，也不知妹妹是否存心為難，硬要來這種沒有中文餐牌的地方，想他在Yeesa面前當眾出醜，破壞他在Yeesa心目中的形象。
外國人侍應問是否可以點餐，Yeesa流利地用英文點餐，Ryan只能尷尬地說「Same Same」，心底裡出現很強烈的自卑感。幸好芷晴突出地用大家都不熟識的法文去點餐，減低了Ryan的尷尬感覺。
Ryan︰「嘩，你幾時學法文㗎？」
芷晴：「喂，馬智浩，我DSE有修法文㗎，你身為我阿哥竟然唔知。」
Ryan︰「馬芷晴，你讀埋咁多我唔識嘅科，之前又話讀咩Visual Arts，依家又話讀法文，點記得咁多！」
Ryan和芷晴繼續爭拗著。Yeesa覺得Ryan兩兄妹感情很好，雖然表面上互相頂撞，但彼此也流露了關懷之情。
用餐期間，Yeesa覺得餐廳掛出來的畫作有些奇怪，便在他們的對話中提出了此觀點。
芷晴：「呢兩幅係本地藝術家嘅畫作，叫『我』同『非我』，睇唔明嘅人係唔會明白。」
Yeesa︰「抽像表演主義、通俗藝術放埋一齊，根本就唔夾，重點係呢兩幅貓同兔仔嘅畫像係淘番嚟，加上呢度嘅畫作、主題、空間、裝修風格都唔太統一，視覺上，有啲九唔搭八。」
Ryan知道Yeesa是讀設計，她對餐廳裝修有這樣的評價，不足為奇，但芷晴聽到後，覺得很驚訝。她覺得剛才「寸」錯了Yeesa。
基本上，剩餘的時間，都是Yeesa和芷晴討論Visual Arts的事，Ryan完全插不到咀。而芷晴也愈來愈喜歡Yeesa，覺得她在藝術方面是一個很叻的人。
Yeesa埋單時，不小心跌了信用卡在地上，Ryan想幫她拾起，Yeesa也在做同一個動作。似曾相識的橋段，Yeesa正握著Ryan的手。