【甜/真人真事】我是他的常餐情人: 七十六

第76章
我地帶住醉意係大家最敏感脆弱嘅地方流連，好似係將要犯禁之前嘅掙扎。

「我想錫你。」話聲一落啊熙嘅氣息就疊上我，帶住繾綣同煙酒夾雜嘅猖狂撬開我嘅唇舌，我哋過去嘅親吻唔需要小心翼翼地詢問，畢竟我哋都唔再係當年嘅對方，呢雙唇已經有太多多餘嘅人親吻過。

我哋對上一次咁親密已經諗唔起有幾耐之前，大概比我同Tony 一齊之前更加久遠嘅時間，久違嘅親吻令我心頭有種輕顫嘅感覺，佢反覆吸啜我雙唇，探入口腔勾纏，我沉迷於同佢嘅角力，佢進攻時我都賣力同佢纏綿，再到大家接近缺氧時先意猶未盡地放開。

分開之後，佢繼續將我個頭按係佢心口，今次我明顯聽到佢嘅心跳比起啱啱要快得多，耳邊亦都聽到佢短促嘅深呼吸。佢呼出嘅氣打落我比佢撟咗頭髮而暴露係空氣嘅耳仔，令我有種想更親近嘅感覺。
「你..」我係佢心口抬頭望佢，見到大家眼中都有氤氳嘅水氣，名為慾望嘅氣味。係四目相交嗰下佢又輕啄咗我一下。我望咗一下深夜無人嘅公園，係本應該屬於小朋友玩樂嘅地方，跨坐上佢大髀，然後將佢雙手環上我後腰，低頭回吻佢。



係Issac身上面學到，男人嘅親吻唔一定需要有幾喜愛對方，佢地可以為咗偽裝自己係個好情人而隨意親吻，正如佢啱啱同我曖昧嘅時候，又例如上次我話係佢最後一次要睇佢表現成點嘅時候，都可以扮作深情地親吻。但係我只係記得後期係公司就算肢體有幾親密都好，都唔一定會有親吻，因為呢樣對於佢只不過係多餘嘅嘢。

「喂你有心撩我咁..」佢按住我後腦加深唇舌嘅交纏，我都抓住佢隻手放入我衫尾。

「咁你唔鐘意咩？」我離開佢雙唇，用條脷點點佢嘴唇。

「我不嬲都鐘意，只係怕你唔鐘意。」佢無頭無尾地講咗一句，抽出咗係撫摸緊我赤裸腰部肌膚嘅手，將我更加深地攬入懷抱。